Totetemale La Ndjela Yeso
1 Osangɔ ɔmɔtshi, Yeso akate ate: “Naka onto alanga ndjelami, nde ayasɛkɛ ndamɛ, ɔshi otamba ande w’asui kele atetemale la ndjelami.” (Mat. 16:24, NW) Mɛtɛ sho nangaka mbetawɔ leeta la Yeso. Tênde olembetshiyelo wa leeta lakɔ lo sɛdingola tshɛkɛta la tshɛkɛta.
2 “Ayasɛkɛ Ndamɛ”: Lam’akimɔso lɔsɛnɔ laso le Jehowa, sho ndjasɛkaka shamɛ. Kitshimudi ya ntondo ya tshɛkɛta ya lo Ngirika yokadimɔmi ɔnɛ ‘ndjasɛka’ ele “mbuta ɔnɛ hai.” Dui sɔ nembetshiyaka ɔnɛ shamɛ tambotona ndjayangɛ lokumu, nsaki yaso ndo ndjaokiya ɔlɔ, kâmɛ ndo ɛngɛnɔngɛnɔ aso shamɛ, tambɔsa yɛdikɔ dia ngɛnyangɛnya Jehowa pondjo pondjo.—Romo 14:8; 15:3.
3 “Ɔshi Otamba Ande w’Asui”: Sɛna oko Okristo kɛdikɛdi sɛna lo mbɔsa otamba w’asui mbut’ate kambɛ Jehowa la yimba ya ndjahombia. Yoho mɔtshi ya mɛnya yimba ya ndjahombia shɔ ele ndjasha tshɛ l’olimu w’esambishelo. Oma k’etatelo k’ɔnɔnyi ɔnɛ, apandjudi efula wambokamba olimu w’ombatshi mboka wa tshanda. Naka ndo wɛ mbele l’ɔnɔngɔ awɔ, kete wɛ kokaka suya mɛtɛ ɔnɛ ɛtshɔkɔ wakondjayɛ oma l’olimu akɔ ndekaka kɛnɛ kakâyahombia fwa. Apandjudi waha la diaaso dia kamba olimu ɔsɔ ndjalɔngɔsɔlaka tena la tena dia sambisha efula. Diɔ diakɔ diosala tshumanelo dimɔtshi nsanganya yawɔ y’otsha l’esambishelo k’ɔlɔmɔ. Lam’ele taya lo nshi y’ɔwɔ, apandjudi efula mbɔsaka etena kɛnɛ kahâfutanya mvula dia vɔ sambisha. Amɔtshi wakakondja etombelo w’ɔlɔlɔ efula, paka lam’akawalange sambisha lo ‘luudu la komelo’ kana nyomosambisha ‘taahe tɔmɔtshi.’
4 Ndjadjɛ eyango w’onto ndamɛ ekɔ yoho kina ya mɛnya yimba ya ndjahombia. Amɔtshi wakakome ambatshi mboka wa pondjo lam’akawasale ekongelo k’ɔlɔlɔ ndo akawalɔngɔsɔla ekongelo kawɔ ka wenya. Akina wakeye ndjalɔngɔsɔla ko komonga nto la wesanu dia kamba lo Bɛtɛlɛ kana oko misiɔnɛrɛ. Akina nto wakatshu dia todjasɛ lo tenyi dia nkɛtɛ diele ohomba efula w’apandjudi wa Diolelo.
5 “Atetemale Ndjelami”: Kânga mbakahomana ambeki wa Yeso l’ehemba efula, vɔ wakakondja ekeketshelo oma lo ohetoheto l’etetemalo waki la Yeso l’olimu ande. (Joa. 4:34) Yimba yawɔ yakayoyalaka oyoyo oto lam’akawawɛnaka ndo lam’akandasambishaka. Diɔ diakɔ diakokaka wanɛ wakatawoyelaka ɔngɛnɔngɛnɔ wa mɛtɛ. (Mat. 11:29) Ndo sho lawɔ, tokeketshanake l’asaso dia sho kamba l’etetemalo olimu w’ohomba ɔnɛ wa sambisha Diolelo ndo mbetɛ anto ambeki.
6 Nyɛsɔ sho tshɛ tetawɔ leeta la Yeso la tetemala la mbôyela lo monga la yimba ya ndjahombia! Lo salaka ɔsɔku, tayonga l’ɔngɛnɔngɛnɔ wa woke oma ko kakianɛ ndo tayokoka kongɛ ɛtshɔkɔ woleki weke lo nshi yayaye.