“Tônge la Lotutsha”
1 Oko wɛnaso woho wayaleke sukana ekomelo ka dikongɛ nɛ di’omusu diaki Satana, ekɔ ohomba efula sho “monga la lotutsha” lam’akongɛso lushi layototshungola Jehowa. Djekoleko lo tshenyi ya wonya nyɛ yambotshikala, ɛdiɛngɛ wekɔ lo ntsha tshɛ dia minya yambalo yaso oma lo dikambo dioleki ohomba dia lowandji loleki tshɛ laki Jehowa ndo tohembaka dia sho mbekola yimba yaso lo lokema l’eyango aso shamɛ. Lo yoho shɔ, Satana nangaka tokonya lo sho tshika kana tutsha olimu aso w’esambishelo ka Diolelo. (Jak. 5:7, 8; Mat. 24:13, 14) Lo weho akɔna wakokaso mɛnya lotutsha lɔsɔ lahombama na?
2 Lo Mbikikɛka Solo: Etena kahomanaso la wendjodi kana wekamu l’olimu aso, solo dia lotutsha ayotokimanyiya efula dia tetemala l’esambishelo. Hatotokaka wɔma esadi eto kana nyanga naka anto wahomana la so hawotolongola dimɛna kana wekɔ kɔlɔ. (1 Pet. 2:23) Wolo ɔsɔ wa l’etei k’otema koka tokimanyiya di’aha sho tɛkɛta kɔlɔ lo dikambo di’anto wa lo mbilo kaso wendjola kana wɔnyɔla olimu aso, teya ɔnɛ ɛtɛkɛta wa ngasɔ wayotɔkɔmɔla alemba sho la wanɛ wakamba la so olimu w’esambishelo.
3 Lo Mongaka la Lotutsha ndo l’Etete: Lotutsha laso kokaka nɛmba naka l’ɔkɔngɔ wa sho sawola dimɛna l’onto lakɛnya saki l’esambishelo, ko aya sho ndja ndjowenda ko hatotanyi. Dui sɔ koka ntshama nto naka wanɛ weka la so hawohame esadi esadi kana hawɔshi yɛdikɔ lo dikambo dia mɛtɛ. Koko, mbala efula etete mongaka l’etombelo w’ɔlɔlɔ. (Ngal. 6:9) Kadiyɛso kɛmɔtshi akembola mama kɛmɔtshi mbala efula la ntondo ka vɔ ndjotatɛ mbeka Bible. Mbala tshanu yakandawembola ntondo, womoto akɔ aki paka l’elimu. Mbala ka samalo, kadiyɛso akatɔlwɛka longembe la mvula ko kotana ndoko onto la ngelo. Koko, kadiyɛso akalange paka mbisha womoto akɔ diɛsɛ mbala k’ekomelo ko nde akatshu dia towenda nto ko tôtana bu l’olimu ko vɔ wakeke. L’ɔkɔngɔ, nde akahame esadi eto ndo akakimɔ lɔsɛnɔ lande le Jehowa.
4 Sho mbeyaka ɔnɛ lushi la Jehowa halototshimbatshimba. Ɔnkɔnɛ, tekɔ lo kongɛ lushi layondokotsha akambo tshɛ, teya ɔnɛ lotutsha la Nzambi layosha etombelo w’ɔlɔlɔ. (Hab. 2:3; 2 Pet. 3:9-15) Sho pombaka monga la lotutsha oko Jehowa ndo tatotshikake sambisha. ‘Oma lo mbetawɔ la lotutsha,’ kongɛ le Jehowa dia nde kofuta l’olimu ayɛ wa wolo.—Heb. 6:10-12.