‘Tɔlɔtɛ Lonto l’Oyoyo’
1 Akristo ngɛnangɛnaka woho wamboweya sɔlɔ. Sho mbekaka di’aha sɛna oko ase andja ɔnɛ. Lam’ele ‘vɔ wakangana oma lo lɔsɛnɔ la Nzambi, tokanyi tawɔ tekɔ wodjima oto.’ (Ef. 4:18) Sho mbekaka dia minya tokanyi t’andja ɔnɛ lo kolola lonto l’edjedja ko ndɔta lonto l’oyoyo.—Ef. 4:22-24.
2 Lonto l’edjedja nyɔngɔmiyaka onto tsho otsha lo lɔkɛwɔ la kɔlɔ ladja onto mindo ndo l’okonya lo nyɔi. Omalɔkɔ, tambokeketsha wanɛ walonga losango la Diolelo dia vɔ minya akambo anɛ tshɛ: odudu, nkɛlɛ, kɔlɔ, tɛngɔ ndo ɛtɛkɛta wa mindo. Wanɛ walanga mbetawɔma le Nzambi pombaka kolola lonto l’edjedja tshɛ tshɛ woho watowokololaka dihɔndɔ dia mindo.—Kol. 3:8, 9.
3 Wolo w’Oyoyo Wahɛtshahɛtsha Yimba: Dia ndɔta lonto l’oyoyo, sho pombaka monga oyoyo lo wolo wahɛtshahɛtsha yimba yaso. (Ef. 4:23) Ngande wetɛ onto wolo ɔsɔ, kana lokanyi lɔsɔ, oyoyo, woho wa nde mbɛdiya yimba yande lo mboka k’ɔlɔlɔ na? Ele lo mbekaka Dui dia Nzambi tena tshɛ l’etete ndo lo kanaka yimba lo kɛnɛ ketshadiɔ. L’ɔkɔngɔ k’onto ndjonga la yoho kina ya kanyiya ndo mɛna akambo lo woho wawaɛna Jehowa la Kristo. Lɔsɛnɔ l’onto kadimɔka lam’alɔtande lokema la waonga wa Kristo, ɛnyɛlɔ oko: kɛtshi, ɔlɔlɔ, ndjakitshakitsha, wɔlamu, lotutsha ndo ngandji.—Kol. 3:10, 12-14.
4 Lam’alɔtaso lonto l’oyoyo, sho ndjânganyaka l’andja ɔnɛ. Lɔkɛwɔ laso totshikitanyaka lawɔ. Sho mbutaka sɔlɔ ndo tondjaka ɛtɛkɛta wa pudipudi wodia anto akina. Sho mbikikɛka nkɛlɛ ndo tekɔ la losembwe ndo waonga walanga Nzambi lo dihole dia monga la tokumbɛkumbɛ, ehangohango, tɛngɔ ndo akambo tshɛ wa kɔlɔ. Sho dimanyiyanaka oleki woho watɔlɔmbawɔ. Sho tshaka ngasɔ oma ka tshina di’otema.—Ef. 4:25-32.
5 Tatokololake lonto l’oyoyo pondjo. Hatokoke kambɛ Jehowa lo yoho yalangande naka sho bu la lɔ. Lonto laso l’oyoyo ndo la dimɛna lakotole anto oya lo sɔlɔ ndo latombole Jehowa, Otungi a lɔ!—Ef. 4:24.