Woho wakokaso kondja ɔngɛnɔngɛnɔ efula oma lo nsanganya
1 Nsangaya tokimanyiyaka efula dia monga la lonyuma l’ɔlɔlɔ. Ɔngɛnɔngɛnɔ wakondjaso oma lo nsanganya yakɔ ndjâka oma lo kɛnɛ kasalaso la ntondo ka nsanganya, wonya wa nsanganya ndo l’ɔkɔngɔ wa nsanganya. Ngande wakokaso ndjâkimanyiya ndo kimanyiya anto akina dia mongaka l’ɔngɛnɔngɛnɔ w’efula lo mbɔtɔka lo nsanganya na?
2 La ntondo ka nsanganya: Ɔlɔngɔswɛlɔ ekɔ la shɛngiya ya wolo efula l’ɔngɛnɔngɛnɔ wakondjaso oma lo nsanganya. Sho tolekaka ndjela losanganya la yambalo tshɛ ndo toshaka kɔmatɛrɛ lɔkɔ naka takayalɔngɔsɔdi dimɛna. Ndo nto, sho la dia nɔngɔsɔlaka oseka sawo tshɛ dialongolaso dimɛna l’oyango wa disha dimɛna lo ndjela alako wakatalongola ndo kotola yambalo y’ampokami. Sho la dia divusola dimɛna dimɛna. Etena katshaso tshɛ dia nsanganya keketsha ndo mbodia onto tshɛ, ehamelo kakiso tombaka sɛkɛ ndo sho mongaka l’ɔngɛnɔngɛnɔ w’efula.—1 Tim. 4:15, 16.
3 Wonya wa nsanganya: Tayɔngɛnangɛna nsanganya dimɛna naka sho mbishaka kɔmatɛrɛ lɔkɔ. Ose etshumanelo tshɛ pombaka mbɔsa tenyi nɛ dia wembola l’ekadimwelo oko ɔkɛndɛ wakandalongola. Kɔmatɛrɛ ya tomondo ndo yasembɔ tɔɔ lo dikambo mongaka l’etombelo woleki amɛna. Anto kokaka keketshama efula naka wɛ mbakɔndɔlɛ lo tshena pe awui amɔtshi wakahomana la yɛ kana wakahomana l’onto ɔmɔtshi wakoka mbakeketsha ndo mbasha wolo. Ndo sho pombaka monga suke dia mbuta awui akɔ wonya tshɛ wɛnaso ɔnɛ kokaka. (Tuk. 15:23; Etsha 15:3) Lam’asalaso sawo dimɔtshi lo losanganya, sho pombaka tɛkɛta la wangasanu ndo l’eshikikelo tshɛ, dietɛ dimɛna, mbuta awui woho wewɔ ndo kɛnɛmɔla ohomba adiɔ.
4 L’Ɔkɔngɔ wa nsanganya: Sawola l’anto dimɛna, mbasha mɔyɔ la loshilambo tshɛ ndo tɛkɛta towui tɔmɔtshi t’ohomba takatɛkɛtami lo nsanganya ayotokimanyiya sho tshɛ. Ngandji kaso k’onto l’ɔnango pɛtahɛtaka kana fulaka wonya wɛnyaso ɔngɛnɔngɛnɔ wakongi la so oma lo kɔmatɛrɛ yakasha dikɛnda, opalanga kana oyoyo ɔmɔtshi. Lo dihole dia tɛkɛta kɔlɔ lo lokombo l’anto amɔtshi wahaye lo nsanganya, sho pombaka kahana lawɔ ɔngɛnɔngɛnɔ wakatakondjisha lo nsanganya, ngasɔ mbayotâkeketsha dia vɔ mbɔtɔka lo nsanganya.—Heb. 10:24, 25.
5 Aha sho pandja ɛlɔngɔswɛlɔ kɛsɔ k’ohomba ka keketshana lam’asaso. (Romo 1:11, 12) Naka tayotshaka tshɛ, kete tayongaka l’ɔngɛnɔngɛnɔ lam’ɔtɔso lo nsanganya y’Akristo.