‘Sambisha ɔtɛkɛta . . . l’etete’
1 Ngande wokukiyɛ sala naka wɛ ambolongola ɛngɔ kɛmɔtshi kofundjiwɔ ɔnɛ “ESADI ESADI”? Tshɛkɛta “esadi esadi” nembetshiyaka “kɛnɛ kahomba salema aha la tshimbatshimba.” Lâsɔ mɛtɛ, ɔpɔstɔlɔ Paulo komindja lam’akandadjangɛ Akristo dia ‘sambisha ɔtɛkɛta . . . l’etete.’ (2 Tim. 4:2) Onde wɛ mbetawɔka kamba olimu ɔnɛ aha la tshimbatshimba?
2 Ondo Paulo akoke ɔnɛ anango amɔtshi wakayotatɛka ‘tɛwɔla anya l’olimu awɔ’ w’Akristo. (Romo 12:11) Ɔnkɔnɛ, olimu awɔ kondjɔtɔ elowa efula ndo kondjonga l’ɔngɛnɔngɛnɔ w’efula wotowokoka kondja lo kimanyiyaka anto akina.
3 Woho wakɔsaka Yeso esambishelo: Yeso mɛtɛ akangɛnangɛnaka olimu ande w’esambishelo! Nde akate ate: “Ma diami, dieli ntsha lulango la one lakantumi, la dia nshidiya ulimu andi.” Ɛnyɛlɔ ka Yeso akatshutshuya ambeki ande, wanɛ wakandakeketsha lo mbatɛ ɔnɛ “dikambo diambela kasakasa, dia muna.” (Joa. 4:34, 35) Etete ndo kanyi ya kamba esadi esadi yaki la Yeso oma k’etatelo polo ndo l’ekomelo k’olimu ande w’esambishelo akɛnama etena kakandatɛ ambeki ande dia vɔ “[nɔmba le] Khumadiondjo, kanga dinela, keli ndi atumi ekambi lu dinela diandi.” (Mat. 9:38) Yeso akangɛnangɛna nɛ dia olimu ande aki wa sambisha, ndo nde kombetawɔ kânga dui ɔtɔi mboshimba dia ntsha olimu ɔsɔ.
4 Ko sho ngande? Ɛlɔ kɛnɛ, oleki nshi ya ntondo, ekɔ ohomba efula sho tɔla olimu w’esambishelo otsha la ntondo la kanyi y’ɔnɛ etena kambotshikala kaya bu kambe. L’ahole efula wa l’andja ɔnɛ, dikambɔ diambɛla kasakasa dia muna. Kânga lo wedja wɛnama di’oko wambokindjakindjama l’esambishelo, nunu di’anto batizamaka ɔnɔnyi tshɛ. Lam’ele ekomelo k’andja ɔnɛ wa kɔlɔ kekɔ lo ndjasukana esadi esadi, ‘awui efula wa ntsha wekɔ l’olimu wa Nkumadiɔndjɔ.’ (1 Kor. 15:58) Oleki tena dikina tshɛ, nshi nyɛ mbamboleka mɛnama ohomba wa sho ndjâketembola la wolo aso tshɛ dia mbewoya anto akina losango la Diolelo.
5 Nyɛsɔ toyasha l’etondo aso tshɛ l’olimu wa mbewoya anto akina lokumu l’ɔlɔlɔ, oyadi lo luudu la luudu kana l’ahole tshɛ wokokiso tana anto lo lɛtshi laso la nkɛtɛ. Lam’ayashaso tshɛ l’esambishelo, sho mɛnyaka hwe dia sho mbetshaka Diolelo lo dihole dia ntondo lo nsɛnɔ yaso. (Mat. 6:33) Kɔlamelo yaso lo sambisha ɔtɛkɛta l’etete ayotosha ɔngɛnɔngɛnɔ efula.