Kakɔna kokoki tokimanyia dia shikikala lo mbetawɔ?
1 Lam’akatatatɛ mbɔtɔ l’ɔlɔngɔswamelo wa Jehowa, ehamelo kaso ka lo nyuma aki kiɔkɔ y’ɔngɛnɔngɛnɔ le so! Omalɔkɔ, dia tetemala ‘mbika edio, ndjaodia, la ndjashikikɛ lo mbetawɔ’ shikaa, ekɔ ohomba tetemala pama lo nyuma. (Kol. 2:6, 7) Etena kɛnɛ kele anto efula wekɔ lo tahame lo nyuma, amɔtshi wekɔ lo takɔ mboka nɛ dia ‘hawoshikikala lo mbetawɔ.’ (1 Kor. 16:13) Sho koka mbewɔ di’aha dui dia ngasɔ ndjotokomɛ. Woho akɔna na?
2 Etete l’akambo wa lo nyuma: Tônge l’ekongelo k’ɔlɔlɔ k’akambo wa lo nyuma kɔtɔnɛ l’ɔlɔngɔswamelo waki Jehowa. Lɔkɔ, ehomba aso wa lo nyuma kotshamaka lo yoho y’efula. Nsanganya ya l’etshumanelo, ndo ya weke ya weho tshɛ totshutshuyaka dia pama ndo monga nge lo nyuma, ndo tokeketshaka dia kongɛka ɛtshɔkɔ lushi tshɛ. (Heb. 10:24, 25) Ekongelo k’oshika ka wadielo wa Bible, wa Tshoto y’Etangelo ndo wa Réveillez-vous !, l’abuku wele la mbo ya ndɛ ya wolo y’Ɔtɛkɛta wa Nzambi ayotokimanyiya dia edio aso wa lo nyuma ntshɔ etale ndo keketala efula. (Heb. 5:14) Naka sho ndjadjɛ eyango wa lo nyuma ndo ntsha tshɛ dia mbakotsha, kete sho tayokondja ndo ɛtshɔkɔ wa pondjo.—Fil. 3:16.
3 Ekimanyielo k’anto wambotshunda: Yanga dia mbɔtɔnɛ l’anto wambotshunda lo nyuma wele l’etshumanelo. Ona dia mbeya dikumanyi dimɛna, nɛ dia vɔ mbele anto wa ntondo wakoka tokeketsha. (1 Tes. 2:11, 12) Etawɔ alako tshɛ wakokawɔ kosha. (Ef. 4:11-16) Ekambi w’olimu wekɔ nto l’ɔkɛndɛ wa kimanyiya anto akina dia shikikala lo mbetawɔ, lâsɔ yangaka ekeketshelo le anangɛso asɔ.
4 Onde wɛ ekɔ l’ohomba w’ekimanyielo l’olimu w’esambishelo? Tɛkɛta la dikumanyi, ndo lɔmba ekimanyielo. Ondo vɔ mbeyaka ndjôkodja l’ɔnɔngɔ w’anto wahomba kimanyiama oma le ambatshi mboka. Onde eke esadi wolongodiyɛ batismu? Naka wɛ mbeka dibuku Notre ministère ndo kamba l’awui wa lɔkɔ, kete wɛ ayohama esadi esadi lo nyuma. Onde wɛ ekɔ ombutshi? Tetemala la keketsha lonyuma l’anayɛ.—Ef. 6:4.
5 Lam’akaso edo ndo washikimalaso lo mbetawɔ, sho mongaka la diɔtɔnganelo dia wolo sho la Jehowa ndo sho la anangɛso. Kɛsɔ toshaka wolo wa shika tanga lo tolonga ta Satana, ndo keketshaka elongamelo kaso ka lɔsɛnɔ la pondjo lo nshi yayaye.—1 Pet. 5:9, 10.