Onde sho kokaka mbetɛ ngɔndɔ ka Nɛi 2000, Ngɔndɔ koleki tshɛ dimɛna le so?
1 Lushi la Sato la dikɔlɔ, Ngɔndɔ ka Nɛi 19, ayonga lushi loleki ohomba l’ɔnɔnyi aso w’olimu. Lushi lɔsɔ, lam’ayotɔtɔka wonya yema yema, tshumanelo kâmɛ ndo elui tshɛ w’Ɛmɛnyi wa Jehowa wa l’andja w’otondo wayosala Eohwelo ka nyɔi ka Kristo. Oyadi dihole diakɔna diodjashiso, eohwelo k’olambo wa Yeso Kristo ayonga dikambo dioleki ohomba ɔnɔnyi ɔnɛ. Datɛ dia lushi lɔsɔ l’Eohwelo diekɔ bamba lo Alamanaka w’Ɛmɛnyi wa Jehowa 2000 Ngɔndɔ ka Nɛi.
2 Ngɔndɔ ka Nɛi k’otondo toshaka diaaso dia dimɛna efula dia sho mɛnya l’otema ɔtɔi lowando laso lo ngandji k’otamanya kakatoke Jehowa lo kimɔ Ɔnande oko olambo. Ngande wakokaso mɛnya lowando lɔsɔ na? Ɔpɔstɔlɔ Paulo akafunde ate: “Ne dia ngandji ka Kristu atutosedingaka, ne dia shu mbetawoka shati: Otoi kakavwela tshe, okone tshe wakavu. Ndi akavwela tshe, ne dia waku weli la lumu, tawuyalaki la lumu dia dikambu diawo vame, keli dia one lakavwela, lakulwama dikambu diawo.” (2 Kor. 5:14, 15) Lo Ngɔndɔ ka Nɛi, sho kokaka mɛnya ɔnɛ tekɔ lo nsɛna aha lo dikambo diaso shamɛ koko lo dikambo dia ɔnɛ lakatovwɛ naka tayetɛ ngɔndɔ kakɔ ngɔndɔ koleki tshɛ dimɛna le so sho ekambi wa Diolelo.
3 Onga ombatshi mboka wa tshanda Ngɔndɔ ka Nɛi: Ɔpɔstɔlɔ Paulo akatosha ɛnyɛlɔ ka dimɛna efula lam’akandate ate: “Keli dimi halali lumu lami nti: Ushinga a wulu mbelo, dia nshidiya esakelu kami ka luwangu, la ulimu wakamalungula uma le Khumadiondjo Jesu, dia mvuta lukumu l’ololo la ngandji ka mamba ka [Nzambi].” (Etsha 20:24) Tekɔ la diɛsɛ diakɔ diamɛ dia sambisha akambo wa Jehowa Nzambi. L’ɔkɔkɔ ɔsɔ mbalangaso mbetɛ Ngɔndɔ ka Nɛi, ngɔndɔ koleki tshɛ dimɛna dia kamba oko ambatshi mboka wa tshanda!
4 Oko wetɔ la nshi ya samalo tshanu la nshi ya mingu tshanu, Ngɔndɔ ka Nɛi 2000 ayonga ngɔndɔ koleki dimɛna le anto efula dia kamba olimu w’ombatshi mboka. Lo Ngɔndɔ ka Samalo 1997, lam’akatakonya lofulo l’ambatshi mboka wa tshanda loleki lo République démocratique du Congo, anto 8260 wakakambe olimu ɔsɔ waki oko yɛdikɔ ya % 9 y’apandjudi tshɛ. L’ɔkɔngɔ w’ɛnɔnyi ehende, lofulo l’apandjudi tshɛ wakakimɔ alapɔlɔ l’ɔnɔnyi wa 1999 lakadɛ % 6. Dikambo sɔ mɛnyaka dia tekɔ l’akoka wa ndekanya lofulo lɔsɔ l’ambatshi mboka wa tshanda. Ndo nto, lam’ele lofulo la wenya lalɔmbama lambokitshakitshama, anto efula l’etshumanelo kokaka monga l’akoka wa kamba olimu ɔsɔ. Opandjudi tshɛ wambobatizama pombaka kana dikambo sɔ ɔlɔlɔ dia menda kana nde kokaka monga ombatshi mboka wa tshanda Ngɔndɔ ka Nɛi kɛnɛ.
5 L’ekimanyielo ka Alamanaka 2000 Ngɔndɔ ka Nɛi, lɔngɔsɔla ekongelo kayɛ dimɛna lo kɛnɛ kendana la ngɔndɔ kâye. Enda nshi yakɔna yayoyokokaka tomba l’esambishelo, ndo kotsha lofulo la wenya lafɔnyayɛ dia wɛ kokaka sambisha ngɔndɔ kâye. Dja ndo wenya wayoyosambishaka anto akina lo tshakitudi. Onde lofulo lakɔ ekɔ suke la koma wenya 50 walɔmbawɔ ambatshi mboka wa tshanda? Naka wɛ ekɔ lo pandja wenya ɛmɔtshi dia kotsha lofulo lalɔmbama, ondo wɛ kokaka nɔngɔsɔla yema y’ekongelo kayɛ dia wɛ kondja yema y’etena ka kamba oko ombatshi mboka wa tshanda? Wɛ ekɔ l’ohomba wa sambishaka yɛdikɔ ya wonya ɔtɔi a tango la minitɛ 40 lushi tshɛ dia wɛ kotsha wenya 50 walɔmbama lo ngɔndɔ.
6 Lam’ele wambokitshakitsha lofulo la wenya walɔmbawɔ ambatshi mboka wa pondjo, onde wɛ hasangoya mbɔtɔ l’ɔnɔngɔ awɔ? Bonde kahombayɛ konga polo ndo lo nshi ya vakashi ya Ngɔndɔ k’Esambele dia wɛ ndjomɛ olimu ɔsɔ na? Ngɔndɔ ka Nɛi ekɔ ngɔndɔ ka dimɛna efula dia tatɛ! Naka wɛ mɛnaka dia wɛ hatonga l’akoka wa kotsha wenya 70 walɔmbama, bonde kahayakambe oko ombatshi mboka wa tshanda Ngɔndɔ ka Nɛi, ndo ndjadjɛ oyango wa wɛ kotsha wenya 70 na? Kam’ayoyɛna dia wɛ ambokoka kamba olimu ɔsɔ, kete wɛ kokaka mbɔsa yɛdikɔ ya mbɔtɔ l’ɔnɔngɔ w’ambatshi mboka wa pondjo aha la tshimbatshimba.−Enda lo dibuku Notre ministère, lɛkɛ 113-114.
7 Yasha tshɛ oko opandjudi wa lokumu l’ɔlɔlɔ: Le so sho tshɛ, oyadi apandjudi kana ambatshi mboka, ngandji k’oshika kokaso Nzambi ndo anyaso anto totshutshuyaka dia sho ndjasha l’etondo aso tshɛ l’olimu wa Jehowa lo ndjela lɔsɛnɔ lele l’onto l’onto. (Luka 10:27) Lâsɔ mbayotɛnya ɔnɛ ‘tekɔ lo kamba la wolo ndo tekɔ lo ndjâketembola, l’ɔtɛ w’elongamelo kele laso le Nzambi kasɛna lele Oshimbedi wa weho w’anto tshɛ, djekoleko wanɛ wele la mbetawɔ.’ (1 Tim. 4:10) Diɔ diako dialongamɛso ɔnɛ Ngɔndɔ ka Nɛi kɛnɛ apandjudi tshɛ wayoyakimɔ l’olimu wa Diolelo.
8 Tatohɛke dako diaki Yeso di’ɔnɛ: ‘Dinela diekɔ woke, kele ekambi wekɔ yema tshitshɛ. Ɔnkɔnɛ, nyɔlɔmbɛ Owandji wa dinela dia nde toma ekambi lo dinela diande.’ Kam’akandashidiya la tɛkɛta ɛtɛkɛta ɛsɔ, Yeso akatshumanya apɔstɔlɔ ande 12 ko akâtome dia tosambisha. (Mat. 9:37, 38; 10:1, 5, 7) Oko ɔnɔnyi ɔtɔi l’ɔkɔngɔ, lâsɔ ko apɔstɔlɔ asɔ 12 wambohokɔ olimu w’esambishelo, Yeso “akasonola akina akumi esambeli, akâtumi” l’olimu ɔsɔ ko nde mbatɛ woho akɔ wâmɛ ate: “Keli dinela diekɔ efula, . . . okone nyolombe uwandji wa dinela, dia nyutumela ekambi lu dinela diandi.” (Luka 10:1, 2) Dibuku dia lo Bible dielɛwɔ Etsha kɔndɔlaka nganɛ wakakadimola Jehowa lo alɔmbɛlɔ asɔ. Lo Pɛntɛkɔsta ka l’ɔnɔnyi wa 33 T.D., lofulo l’ambeki lakadɛ oya lo 120. Oma lâsɔ ko ndjokoma 3000 edja ndo lofulo l’ambeki ndjokoma 5000. (Etsha 1:15; 2:41; 4:4) L’ɔkɔngɔ wa lâsɔ, ‘lofulo l’ambeki lakatatetemalaka fula.’ (Etsha 6:7) Yoho yakɔ yâmɛ, lo nshi yaso nyɛ, sho pombaka tetemala nɔmbaka Owandji wa dinela dia nde nyomototomɛ esambisha wa Diolelo. Lo ndjela alɔmbɛlɔ aso, opandjudi tshɛ wa l’etshumanelo pombaka ndjalɔngɔsɔlaka dia sambishaka ngɔndɔ tshɛ.
9 Nyonyomoka sso lo Alamanaka 2000 Ngɔndɔ ka Nɛi. Lam’ele lushi la ntondo la la hende la ngɔndɔ kɛsɔ ayonga Lushi la Samalo la la Lomingu, onde wɛ hakoke ndjalɔngɔsɔla dia tomba l’esambishelo wikɛndɛ ɔsɔ, dia kamba olimu kam’atatɛ ngɔndɔ kakɔ? Onde wɛ kokaka sukɛ “Lushi la Periodikɛ” tshɛ la lo ngɔndɔ kɛsɔ kâmɛ l’olui ayɛ wa Wekelo wa Dibuku wa l’Etshumanelo? Onde wɛ ayosambishaka Lushi la Lomingu tshɛ wonya ɔtɔi wa tango kana ndekana? Onde wɛ kokaka ndjalɔngɔsɔla dia sambishaka akɔlɔ amɔtshi? Wonya weyɛ l’olimu, la kalasa, kana lo ntsha ntumu nkina, tohɛke kamba la waaso tshɛ wakondjayɛ dia sambisha lo tshakitudi. Dja tolembetelo lo nshi yayoyotombaka l’esambishelo lo alamanaka dia mbohɔka tena diayoyosambishika lo ngɔndɔ.
10 Ngɔndɔ ka Nɛi ayonga etena k’ɔlɔlɔ le anto tshɛ wele l’akoka ndo wambetawɔma oma le dikumanyi dia tatɛ kamba oko apandjudi wahatabatizama. Naka wɛ ekɔ lo mbeka Bible l’onto ɔmɔtshi, onde nde ambohama dimɛna woho ɔnɛ wakokande tɛkɛta nde l’omendji walɔmbɔla dia nde mbɔsama oko opandjudi wa lokumu l’ɔlɔlɔ? Naka wɛ ekɔ l’ana wahatabatizama, onde wɛ ambosawolaka la dikumanyi lo kɛnɛ kendana l’ehamelo kawɔ ka lo nyuma? Shi ɔnɛ ekɔ etena k’ɔlɔlɔ le wɔ dia vɔ tatɛ sambisha?—Enda lo Notre ministère, lɛkɛ 97-100.
11 Lam’ayatshutshuyaso dia mbetɛ Ngɔndɔ ka Nɛi 2000, ngɔndɔ koleki tshɛ dimɛna le so, sho tshɛ la dia sambisha ndo kimɔ alapɔlɔ aso w’olimu l’ekomelo ka ngɔndɔ. (Enda lo Mako 6:30.) Pombaka keketsha apandjudi w’eyoyo wele mbala kawɔ ka ntondo ka vɔ sambisha dia kimɔ alapɔlɔ awɔ w’olimu. Naka sho tshɛ mbidja lonya, kete alapɔlɔ wa Ngɔndɔ ka Nɛi ayonga dimɛna efula ndo Jehowa ayotombɔma efula oma lo weolo wayotodja dia sambisha.
12 Eta anto akina oya lo losanganya la eohwelo: Onde hatotɔngɛnangɛna dia mɛna lofulo l’oyoyo loleki l’anto anɛ wayɔtɔ lo losanganya la Eohwelo ka nyɔi ka Kristo la 2000? Tayɔngɛnangɛna mɛtɛ! Kɛsɔ mɛnyaka ɔnɛ anto efula wambotshumana kâmɛ dia mɛnya lowando lele lawɔ lo ngandji koleki woke kakatoke Jehowa Nzambi nde la Yeso Kristo! (Joa. 3:16; 15:13) Yalɔngɔsɔla weho tshɛ wahombama di’aha ndoko dikambo ndjokoshimba wɛ la nkumbo kayɛ dia nyu mbɔtɔ lo losanganya la Eohwelo.
13 Etena ka sho tatɛ mbelɛ anto akina oya lo Eohwelo tɔ kɛnɛ. Funda nkombo y’anto tshɛ wayoyolanga vɔ ndja lo losanganya lɔsɔ. Kofunde nkombo ya wanɛ tshɛ wakekaka la yɛ Bible ndo wanɛ weka la yɛ Bible nshi nyɛ, kâmɛ ndo wanɛ watshwɛ têmbolaka. Dja ndo nkombo y’asekayɛ wa l’olimu, wa la kalasa, y’asukanyi ayɛ, ndo wanɛ wanda la yɛ okanda. Tohɛke funda nkombo y’angɛnyi ayɛ akina ndo y’ase nkumbo kayɛ. L’ɔkɔngɔ wa wɛ shidiya la funda nkombo y’anto asɔ, ko wɛ ndjomɛ mbisha onto l’onto dikatshi diande dia leeta. Lembetshiyawɔ hwe etena ndo dihole diayosalema losanganya la Eohwelo. Naka Ngɔndɔ ka Nɛi 19 kambosukana, ko wɛ mbohola wanɛ tshɛ wakayafunde nkombo yawɔ, kana mbaewoya dikambo diakɔ lo telefɔnɛ. Ewoyawɔ dia vɔ monga la yɛ kâmɛ lo losanganya la Eohwelo la dikɔlɔ diakɔ.
14 Lo ndjela alako wakatalongola ntondo oma le Société, elui wa dikumanyi wayoyatshutshuya lo yoho ya lânde dia keketsha apandjudi tshɛ wa lo bɛtshi diawɔ dia nkɛtɛ wahayosalasala dia mbɔtɔ lo losanganya lɔsɔ la Eohwelo. (Mat. 18:12-14) Dikumanyi kawovusole mukanda waki Société wa Ngɔndɔ ka Hende 2, 1999. Sekeletɛlɛ ka l’etshumanelo pombaka funda nkombo y’apandjudi tshɛ wahayosalasala, ndo omendji w’olimu ayɔsɔna dikumanyi dimɔtshi dia towaeta oya lo losanganya la Eohwelo. Ondo lam’ayowɛna dikumanyi wamboya ndjowaenda l’oyango wa mbakeketsha, vɔ kokaka kimanyiyama dia sambishaka dimɛna oko akawasambishaka ntondo, ko sambisha kânga lo Ngɔndɔ ka Nɛi. Vɔ wayokeketshama efula naka vɔ tomba l’apandjudi wa tomanamana l’esambishelo.
15 Keketsha anto dia vɔ sukɛ Ngɔndɔ ka Nɛi kɛnɛ dimɛna! Dikumanyi, ekambi w’olimu la ewandji wa nkumbo kokaka ntsha tshɛ dia mbetɛ Ngɔndɔ ka Nɛi 2000 ngɔndɔ koleki tshɛ dimɛna le so. Dikumanyi pombaka mbidja tshete dia nɔngɔsɔla akambo tshɛ ndo mbisha ɛnyɛlɔ l’akambo akɔ. (Heb. 13:7) Pombaka mbɔsa tɛdikɔ tɔmɔtshi t’eshika lo kɛnɛ kendana la nsanganya y’otsha l’esambishelo ya lushi la lushi ndo ya nshi ya wikɛndɛ. Ondo ayonga dimɛna nɔngɔsɔla nto nsanganya y’otsha l’esambishelo l’ɔkɔngɔ a midi kana la dikɔlɔ dia yɔɔ. Pombaka panɛ ekongelo k’akambo tshɛ wambɔlɔngɔswama Ngɔndɔ ka Nɛi. Ondo nyayɔlɔmba onto ɔmɔtshi dia ntshaka nsanganya y’otsha l’olimu. Pombaka nɔngɔsɔla bɛtshi dia nkɛtɛ.
16 Ngɔndɔ ka Nɛi tayokahɛ anto Tshoto y’Etangelo la Réveillez-vous ! Tayoshaka wanɛ wɛnya nsaki biukubuku Katɔlɔmba l’oyango wa tatɛ mbeka la wɔ Bible. Pombaka monga la nambo k’ɔlɔlɔ ka periodikɛ la tobukubuku lo lɔkɔtɔ.
17 L’ekomelo ka Ngɔndɔ, wanɛ tshɛ walɔmbɔla wekelo wa dibuku l’ɛhɛna awɔ, pombaka keketsha onto tshɛ dia kimɔ alapɔlɔ ande w’olimu kam’ashila losanganya. Ondo vɔ kokaka nɔmba alapɔlɔ ɔsɔ kânga Lushi la Lomingu, Ngɔndɔ ka Nɛi 30. Oma lɔkɔ, wonya wadja sekeletɛlɛ alapɔlɔ ɛsɔ l’ɔnɔngɔ, naka nde ambɛna di’apandjudi amɔtshi kokimɔ alapɔlɔ awɔ, kete nde kokaka mbaohola la ngandji tshɛ dia vɔ kimɔ alapɔlɔ awɔ la ntondo ka Ngɔndɔ ka Tanu 6, etena kahombande tomɛ Société alapɔlɔ ɔsɔ. Nde kokaka mbitɛ ɛnɔmbɔdi wa dibuku dia mbosha lonya lo mumbola opandjudi tshɛ.
18 Nshi y’Eohwelo mbele nshi ya l’ɔnɔnyi yoleki ohomba le ekambi wa Nzambi. Ɔsɔ ekɔ etena kahombaso sho tshɛ ndjasha l’olimu wa Jehowa. Ɔsɔ ayonga etena ka sho tshɛ ndjakimɔ la tshondo l’olimu w’esambishelo oko opandjudi wa lokumu l’ɔlɔlɔ, naka wanɛ wele l’akoka wayokamba oko ambatshi mboka wa tshanda, ndo naka tayodja tshete dia mbelɛ anto akina oya lo losanganya la Eohwelo ka nyɔi ka Kristo. Tɔlɔmbɛ dia Jehowa tɔtshɔkɔla lam’atshaso tshɛ dia mbetɛ Ngɔndɔ ka Nɛi 2000 ngɔndɔ koleki tshɛ dimɛna le so. Kɛsɔ tshɛ ele dia lotombo laki Nzambi!—Heb. 13:15.
[Caption on page 3]
[Box on page 3]
Ambatshi Mboka wa Tshanda
Lofulo Lakaleke l’Ɛnɔnyi wa Ntondo:
Congo-Kinshasa: 8260 (Ngɔndɔ ka Samalo 1997)
Congo-Brazzaville: 472 (1995)
[Caption on page 4]
[Box on page 4]
Apandjudi Tshɛtshɛ
Lofulo l’Oyoyo Loleki tshɛ:
Congo-Kinshasa: 114071 (Ngɔndɔ ka Divwa 1999)
Congo-Brazzaville: 4001 (Ngɔndɔ ka Dikumi 1998)
[Caption on page 5]
[Box on page 5]
Anto Wakɔtɔ lo Eohwelo
Lofulo l’Oyoyo Loleki Tshɛ:
Congo-Kinshasa: 574736 (1997)
Congo-Brazzaville: 20144 (1997)