Onde wɛ mbetawɔka ngandji ka Kristo?
1 Lo kanyiya lo yoho ya lɔsɛnɔ yaki l’Owandji ande, ɔpɔstɔlɔ Joani akafunde ate: ‘Yeso akalange anto ande waki l’andja ɔnɛ, nde akâlange polo ndo l’ekomelo.’ (Joani 13:1) L’etena kɛnɛ ka Eohwelo, tokanyi taso tshɔ̂ka lo yoho yoleki ɔlɔlɔ yakɛnya Kristo ngandji kande. Sho kokaka mɛnya lowando lo ngandji kɛsɔ, lo monga la mbetawɔ lo tshungo, lo sambisha l’ohetoheto ndo lo tetemala “edja ndu l’ekumelu” oko Yeso.—Mat. 24:13; 28:19, 20; Joani 3:16.
2 Têtawɔ ngandji ka Kristo: Yeso akakambe efula lo lomingu l’ekomelo la lɔsɛnɔ lande la lanɛ la nkɛtɛ. (Mat. 21:23; 23:1; 24:3) Lam’ele tekɔ lo mbokoya Kristo, ngandji mbatotshutshuya sho lawɔ dia ‘ndjasha la wolo tshɛ’ l’olimu wa Jehowa. (Luka 13:24) Onde wɛ hakoke kamba la tɛdikɔ tokina tambɔsama lo Ngɔndɔ ka Nɛi kɛnɛ lo kɛnɛ kendana l’olimu w’esambishelo dia wɛ fudia wenya wayoyetsha l’olimu ɔsɔ?
3 Ɔnɔnyi ɔnɛ, Dambo dia Nkumadiɔndjɔ dia Dikɔlɔ diayosalema la dikɔlɔ dia Lushi la Sato, Ngɔndɔ ka Nɛi 19. Anto angana wayotanema lo diaaso sɔ di’ohomba efula na? Lo yɛdikɔ y’efula, dikambo sɔ nemanɛka la kɛnɛ kayotosala. Onde wɛ ambofunda nkombo ya wanɛ walangayɛ mbelɛ—ambeki ayɛ wa Bible, angɛnyi w’akambo wa mɛtɛ, ewotɔ ayɛ, anyayɛ w’ase okanda, ndo wa la kalasa? Onde wɛ ambɛnanaka la wɔ ndo ambowatɛka l’eshikikelo tshɛ dia vɔ ndja? Onde wɛ ayowaohola nshi mɔtshi ngana la ntondo ka Eohwelo kɛsɔ? Onde vɔ wekɔ l’ohomba w’ekimanyielo kayɛ dia vɔ koma lo dihole dia losanganya? Dikumanyi vɔ lawɔ, wayelɛ opandjudi tshɛ wahayoleka tomba l’esambishelo. Kânga mbele Eohwelo kɛsɔ kayosalema la dikɔlɔ dimɔtshi dia l’atei atei wa lomingu koko aha lo wikɛndɛ, kɛsɔ hɛnya dia bu ohomba anto tshɛ ndja.
4 Yâlɔngɔsɔla: Ekɔ ohomba efula sho ndjâlɔngɔsɔla ndo monga la dionga kana yimba y’ɔlɔlɔ lam’eso lo losanganya la Eohwelo. Paulo akakɔkɔmiya asekande ambetawudi di’aha vɔ mbohɛ ohomba wa dikambo nɛ. (1 Kor. 11:20-26) Nyu kokaka mbadia tshapita 13 polo 17 y’Evanjiliɔ wa Joani wonya wasalanyu wekelo wa Bible wa lo nkumbo ndo ose nkumbo tshɛ kɔndɔla kɛnɛ kalembetshiya olambo wa Yeso le nde. Ndo nto, tanyohɛke wadielo wa Bible wa lushi la lushi wendana la lomingu la Eohwelo!
5 Tekɔ lo mboka Kristo Ngandji k’efula, ndo tayokiɛnya polo ndo l’edia ka Ngɔndɔ ka Nɛi 19. Tamboyashikikɛ dia mɛnya ngandji kawokaso pondjo pondjo! Eohwelo k’ɔnɔnyi ɔnɛ ayotokimanyiya dia keketsha yɛdikɔ shɔ.