Onde Wɛ “Nangaka” Kimanyiya Anto Akina?
1 Yeso mɛtɛ akakimanyiyaka anto. Lam’akɔlɔmbɛ kanga sudi ekimanyielo, Yeso akasembola lonya lande, akawonanda, ndo akate ate: “Dimi nangaka, okono.” (Mako 1:40-42, sho mbɛnganyisha alɛta ango.) Lo toho takɔna takokaso mbokoya dionga diaki Yeso lo kɛnɛ kendana la kimanyiya anto akina?
2 Anto Wele la Nsaki: Onto tshɛ lele l’atei w’etshumanelo ekɔ l’ɔkɛndɛ wa kimanyiya anto wele la nsaki dia vɔ koma atɛmɔdi waki Jehowa. Etena kaya anto w’eyoyo lo nsanganya, shawɔ mɔyɔ ndo yaekesanyiya la wɔ. Yanga toho ta mbakeketsha. Andolawɔ lo kɔmatɛrɛ yashawɔ. Andola welo wadjawɔ dia kamba l’atɔndɔ wa lo Bible lo nsɛnɔ yawɔ. Kimanyiyawɔ dia vɔ mbeya diaaso diele lawɔ dia monga l’angɛnyi w’eshika l’atei w’etshumanelo.
3 Asekaso Ambetawudi: “Ambetawudi” mbaleka sungana kondja ekimanyielo kaso lo toho totshikitanyi. (Ngal. 6:10) Anto efula wekɔ lo ndɔshana la wa hemɔ. Lam’awaembolayɛ dia mbakeketsha, wɛ koka monga osekawɔ l’oshika ndo ondo wɛ mbeyaka nto mbasha ekimanyielo kewɔ latɔ ohomba. Amɔtshi mbeyaka monga l’ekakatanu ekina lo nsɛnɔ yawɔ. Ɛnya woho wayashayɛ le wɔ lo tshungola etena ka mbahokamɛ ndo mbakeketsha. (1 Tes. 5:14) Dikumanyi lawɔ wekɔ l’ohomba w’ekimanyielo kaso etena kewɔ lo kotsha ɛkɛndɛ awɔ. (Heb. 13:17) Naka sho tayonga la lumu la ngandji ndo la kimanyiya anto akina, kete sho kokaka ‘monga ekimanyielo kakeketsha’ le asekaso ambetawudi.—Kol. 4:11.
4 Ase Nkumbo: L’ɛnyɛlɔ ka Yeso, sho pombaka sala la wolo dia ndjakiyanyaka dikambo di’ase nkumbo kaso hita. Woho wayakiyanya ambutshi dikambo di’anawɔ mbatshutshuya ‘dia mbaodia lo ɛlɛmbɛ ndo lo wetshelo waki Jehowa.’ (Ef. 6:4) Ana koka vɔ lawɔ mbisha lonya lo ndjalɔngɔsɔlaka dikambo dia wekelo wa lo nkumbo, dia nsanganya ya l’etshumanelo, kana di’olimu w’esambishelo. Ana wambola kokaka monga la dionga dia kɛtshi l’ɛnyɛlɔ kaki Yeso lo kimanyiya ambutshi dia vɔ ndɔshana dimɛna la pâ yele lawɔ lo menda woho wayawɔ esombe. L’akambo asɔ kana akina, sho tshɛ kokaka “menya khumbu [yaso] ngandji.”—1 Tim. 5:4.
5 Etena kokoyaso Yeso lo kimanyiya anto akina, sho koka monga l’akoka wa kitshakitshaka ekakatanu awɔ ndo salaka woho wa kâmɛ monga lo nkumbo yaso ndo l’etshumanelo. Ndo kɛnɛ koleki tshɛ ohomba, ele sho mbishaka Jehowa, “Shesu ka ketshi,” kɛnɛmɔ.—2 Kor. 1:3.