‘Tɔhɛtɛ oko Esase’
1 L’atei wa dikongɛ di’akambo nɛ diele lo wodjima wa lo nyuma ndo wa lo ditshelo, suke la miliyɔ shamalo y’atɛmɔdi wa Jehowa Nzambi ka mɛtɛ, wekɔ ‘lo mpɛta oko esase’ lo wedja 234 wa l’andja w’otondo. (Fil. 2:15) L’ɔtɛ wa dikambo sɔ, sho mbeyamaka esadi eto. Woho akɔna wangamulaso osase wa dimɛna waya oma le Jehowa na?—2 Kor. 3:18.
2 Ditshelo Diaso: Anto mbeyaka lɔkɛwɔ laso esadi eto. (1 Pet. 2:12) Womoto ɔmɔtshi akɛnyi dia ɔmɛnyi wa Jehowa wakakambaka la nde aki kanga ɔlɔlɔ ndo akokimanyiyaka ndo kɔtɛkɛtaka awui wa sɔnyi kana mbɔla etena kasalema shɛkɛshɛkɛ y’awui wa mindo. Etena kakahembaka anto akina dia tɛkɛta awui wa sɔnyi lo washo ande, nde akatshikalaka ki ndo akayelaka paka kɛnɛ kele dimɛna. Naa shɛngiya yaki la kɛnɛ kakasalaka ɔnangɛso le womoto ɔsɔ na? Womoto akɔ mbohɔka ate: “Dionga diande diakamambia efula woho ɔnɛ wele lakatatɛ la mboka wembola lo kɛnɛ kendana la Bible. Dimi lakatatɛ mbeka Ɔtɛkɛta wa Nzambi ndo l’ɔkɔngɔ diko lakayobatizamaka.” Nde akate nto ate: “Dionga diande mbakatshutshuya dia dimi sɛdingola awui wetawɔ Ɛmɛnyi wa Jehowa.”
3 Dionga diele laso otsha le emboledi, woho wɔsaso awui wasalema l’andja ɔnɛ, ndo ɛtɛkɛta w’amɛna watondjaso salaka dia Ɛmɛnyi wa Jehowa mbeyama oko anto wasɛna lo ndjela ɛlɛmbɛ w’oma lo Bible wa lâdiko. Elimu w’ɔlɔlɔ wa ngasɔ koka tombola Jehowa ndo kotola anto akina oya l’ɔtɛmwɛlɔ ande.
4 Ɛtɛkɛta Aso: Lo mɛtɛ, wanɛ wɛna dionga diaso dia dimɛna hawokoke mboka woho wotshikitanyiso l’anto akina naka hatowate awui wendana la mbetawɔ kaso. Onde anto wakamba la yɛ olimu kana wɔtɔ la yɛ kalasa mbeyaka dia wɛ ekɔ Ɔmɛnyi wa Jehowa? Onde wɛ nyangaka diaaso dia kadimola sawo di’awui akina oya l’esambishelo? Onde wɛ ambɔsa yɛdikɔ ya ‘mpɛtsha osase ayɛ la ntondo k’anto’ lo diaso tshɛ diatanema?—Mat. 5:14-16.
5 Dia kotsha ɔkɛndɛ aso w’amɛmbi w’osase, nɔmbamaka dia sho monga la yimba ya ndjahombia. Naka tayoyakimɔ l’otema aso tshɛ, kete tayonya yimba oma l’akambo wele kema ohomba efula dia nyomoleka kondja diaaso dia sala olimu w’esambishelo kana wa mbetɛ anto ambeki.—2 Kor. 12:15.
6 Oma l’ɛtɛkɛta ndo l’etsha aso, nyɛsɔ totetemale la mpɛta oko esase. Naka sho sala dikambo sɔ, kete anto akina mbeyaka tshutshuyama dia sangana kâmɛ la so dia mbishaka Jehowa lotombo.