‘Toleshamake la ɛtɛkɛta wa mbetawɔ’
1 Nsɛna lɔsɛnɔ la mamema Nzambi nɔmbaka welo efula. (1 Tim. 4:7-10) La wolo aso hita, tayɔlɛmba esadi eto ndo tayohekɔ dia nsɛna yoho ya lɔsɛnɔ la ngasɔ. (Is. 40:29-31) Yoho mɔtshi yakokaso kondja wolo w’oma le Jehowa ele lo ‘ndeshamaka la ɛtɛkɛta wa mbetawɔ.’—1 Tim. 4:6.
2 Mbo ya ndɛ ya lo nyuma y’ɛlɔlɔ: Jehowa toshaka mbo ya ndɛ ya lo nyuma y’ɛlɔlɔ l’ekimanyielo k’Ɔtɛkɛta ande ndo oma lo tshimbo ya ‘ɔhɔmbɔ wa kɔlamelo ndo wa kɛsɔ.’ (Mat. 24:45) Onde sho salaka tshɛ dia kondja wahɔ oma lɔkɔ? Onde sho mbadiaka Bible lushi tshɛ? Onde sho ndjaombɛka etena dia wekelo w’onto ndamɛ ndo dia kanaka yimba la awui wekaso? (Osam. 1:2, 3) Mbo ya ndɛ y’ɛlɔlɔ shɔ tokeketshaka ndo tokokɛka oma lo andja waki Satana. (1 Joa. 5:19) Naka sho ndeshaka yimba yaso l’akambo w’ɛlɔlɔ asɔ ndo kambaka la wɔ lo nsɛnɔ yaso, kete Jehowa ayonga la so.—Fil. 4:8, 9.
3 Jehowa tokeketshaka nto oma lo tshimbo ya nsanganya ya l’etshumanelo. (Heb. 10:24, 25) Wetshelo wa lo nyuma ɔsɔ ndo lɔngɛnyi la dimɛna latanaso lo nsanganya shɔ tokeketshaka dia sho shika tanga lama wadiɛnaso la ehemba. (1 Pet. 5:9, 10) Osekaseka ɔmɔtshi w’Okristo akate ate: “Dimi ntshɔka la kalasa lushi l’otondo ndo dikambo sɔ nɛndjakami heyama. Koko, nsanganya yekɔ oko dihole dia diomuyelo lo oswe wa shɛnga, lɛnɛ akondjami wolo wa dimi nyomokikɛ lushi lokina la kalasa.” Sho mɛtɛ tshɔkwamaka efula lo welo wadjaso dia mbɔtɔka lo nsanganya!
4 Tosambisha akambo wa mɛtɛ: Sambisha anto akina aki oko mbo ya ndɛ le Yeso. Olimu ɔsɔ wakawoshaka wolo. (Joa. 4:32-34) Woho akɔ wâmɛ, etena kasawolaso la anto akina lo kɛnɛ kendana la alaka wa diambo waki Nzambi, sho keketshamaka nto. Monga nto la olimu efula l’olimu w’esambishelo tokimanyiyaka dia otema aso ndo yimba yaso mbikama paka lo Diolelo ndo lo ɛtshɔkɔ wayangaso kondja. Dikambo sɔ mɛtɛ tokeketshaka.—Mat. 11:28-30.
5 Tekɔ mɛtɛ la diɛsɛ dia kondja wahɔ oma lo mbo ya ndɛ ya lo nyuma y’ɛlɔlɔ yasha Jehowa ekambi ande nshi nyɛ! Nyɛsɔ totetemale mbida ekoko wa ɔngɛnɔngɛnɔ dikambo dia lotombo lande.—Is. 65:13, 14.