Esambishelo kaha la ɛtɛkɛta
1 Aha la tondja ndoko ɔtɛkɛta, etongelo kɛnama ka Jehowa kekɔ lo kɛnɛmɔla hwe waonga ande wahɛnama. (Osam. 19:1-3; Romo 1:20) Woho akɔ wâmɛ mbele, lɔkɛwɔ laso l’ɔlɔlɔ, waonga aso w’Akristo, ndo ɛnamelo kaso kaha kawotake ekɔ tshondo y’esambishelo kaha la ɛtɛkɛta. (1 Pet. 2:12; 3:1-4) Sho tshɛ pombaka kombola dia ‘nɛnga wetshelo wa Nzambi Oshimbedi aso, lo akambo tshɛ’ oma lo dionga diaso.—Tito 2:10.
2 Ngande wakoka anto wele bu kokele nyomoleka nɛnga wetshelo wa lo Bible? Dikambo sɔ kokaka salema paka oma lo ɛlɔmbwɛlɔ ka Ɔtɛkɛta wa Nzambi ndo oma lo wolo wa nyuma k’ekila. (Osam. 119:105; 143:10) Ɔtɛkɛta wa Nzambi ‘wekɔ la lɔsɛnɔ ndo la wolo woleki; vɔ wekɔ la mpɛmɔ koleki yɔɔmbɔ ya mpɛmɔ wedi ehende.’ (Heb. 4:12) Vɔ nyɔngɔmɛka l’etei ndo tokimanyiyaka dia ndɔta lonto l’oyoyo. (Kol. 3:9, 10) Nyuma k’ekila tɔshaka waonga w’ɛlɔlɔ wele oko lɔsɛngɔ, ɔlɔlɔ, memakana, ndo ndjakimɛ. (Ngal. 5:22, 23) Onde sho mbetawɔka dia ɔtɛkɛta wa Nzambi ndo nyuma kande monga la shɛngiya lo nsɛnɔ yaso?—Ef. 4:30; 1 Tes. 2:13.
3 Anto akina wekɔ lo nembetɛ: Etena kayelaso ɛlɛmbɛ wa Jehowa ndo kayaketembolaso dia kɛnɛmɔla waonga ande, anto akina nembetɛka. Ɛnyɛlɔ, pami kɛmɔtshi akɔnywamaka oma le asekande wa l’olimu nɛ dia nde aki mondo. Koko, kadiyɛso kɛmɔtshi kakakambaka dihole diakɔ ɔtɔi la nde akawɔlɛnyaka. Kɛsɔ akatshutshuya pami kɛsɔ dia nde mombola lande na kakandatshikitana la anto akina. Nde akôlembetshiya dia dionga diande dia dilɛmiɛlɔ aki etombelo wa woho wakandakitanyiyaka atɔndɔ wa lo Bible lo lɔsɛnɔ lande. Nde akosambisha dikambo dia elongamelo ka diambo ka Diolelo. Pami kɛsɔ akatatɛ mbeka Bible ndo akahame polo lo batizama. Etena kakandakalola lo ngelo kande ka lôtɔ, ewotɔ ande wakanandema efula oma lo lɔkɛwɔ lande l’ɔlɔlɔ, ko efula l’atei awɔ waketawɔ akambo wa mɛtɛ.
4 L’olimu, la kalasa, ndo etena kasɛnaso la ewotɔ ndo la asukanyi aso, lɔkɛwɔ laso l’ɔlɔlɔ kâmɛ la esambishelo kaso kokaka tshutshuya anto akina dia vɔ tombola Nzambi.—Mat. 5:16.