Onde wɛ nɔmbaka ombeki ayɛ dia wɛ sawola l’angɛnyi ndo l’ewɔtɔ ande?
Naka wɛ ekɔ lo nɔmbɔla wekelo wa Bible, lande na kahayambola ombeki ayɛ dia kana angɛnyi ndo ewotɔ ande ɛmɔtshi wayolanga mbeya kɛnɛ ketsha Bible? Lam’asalaso ngasɔ, tena efula ombeki toshaka nkombo y’anto amɔtshi. Naka ombeki ayɛ ambokosha lotshungɔ, kete wɛ kokaka tota ndo lokombo lande etena katshɔyɛ dia tembola anto asɔ dia mbasɛngɔla dia nyu mbeka Bible. Wɛ koka mbuta wate: “[Lokombo l’ombeki ayɛ] ngɛnangɛnaka wekelo wa Bible, ndo nde fɔnyaka dia ndo wɛ koka ngɛnangɛna kondja wahɔ oma lo ekongelo kaso ka wekelo wa Bible.” Oma lâsɔ, ko wɛ mɛnya lo tshena pe woho wasalema wekelo, lo kamba la dibuku Bible etshatɔ.
Naka wɛ ekɔ l’ombeki watahame dimɛna, kete wɛ koka mbôkeketsha dia nde kɔndɔlɛka angɛnyi ande ndo ewotɔ ande wɛnya nsaki woho wasalema wekelo. Nde koka mbaelɛ dia vɔ ndjoyela la nde wekelo. Ko naka ngasɔ hakoke, kete wɛ koka mbokana la nde dia wɛ tɛnana la wɔ dia mbaɛnya woho wasalema wekelo. Lo sala ngasɔ, sho koka kimanyiya ombeki dia nde tatɛ sambisha anto akina.
Wanɛ watshɔyɛ dia tenda mbala la mbala kokaka kosha nkombo ya angɛnyi awɔ, kânga naka vɔamɛ watetawɔ wekelo wa Bible wa mbala la mbala. Etena kawashayɛ dibuku Bible etshatɔ, wɛ koka mbambola wate: “Onde nyu mbeyaka anto amɔtshi wele la ohomba wa dibuku nɛ?”
Lo menda ohomba wa tena diotɔsɛna nɛ, sho nangaka kamba la diaaso tshɛ dia kimanyiya anto dia vɔ mboka ndo mbetawɔ lokumu l’ɔlɔlɔ. Onde wɛ nɔmbaka ombeki ayɛ dia wɛ sawola l’angɛnyi ndo l’ewɔtɔ ande?