Toyasha le anto akina—Lo mbâkanɛka ndo lo mongaka la loshilambo
1 Kânga mbele Jehowa Omboledi w’andja w’otondo, nde kanɛka anto ndo ekɔ la loshilambo otsha le anto wele kema kokele. (Etat. 13:14; 19:18-21, 29) Sho koka ndowanya yoho yasambishaso lokumu l’ɔlɔlɔ lo mbokoyaka Nzambi kaso ka loshilambo. (Kol. 4:6) Dui sɔ halembetshiya tsho monga la loshilambo kana kamba la ɛtɛkɛta wɛnya dia tekɔ la dilɛmiɛlɔ.
2 Lo esambishelo ka lo soko la soko: Ko kayotota naka tambotshɔ tenda onto lo wonya wende bu l’etena ka tolongola kana wende la wesanu efula? Sho pombaka mbidja yimba lo akambo asɔ lo susa sawo diaso kana mbɔlɔmba dia sho ndjowenda wonya okina. Naka anto wambotona nongola ekanda aso, hatohombe tɛtɛ dia vɔ mbalongola. Kanɛka anto akina ayototshutshuya dia sho nɛnya diangɔ diawɔ, ɛnyɛlɔ oko mbadihɛ lokuke la lokombo kana mbakaloyɛ esongo wakatadjashi ndo mbetshaka anaso dia vɔ sala ngasɔ. Sho pombaka ndjashikikɛ dia ambetshetshi hawotɛna ekanda wotshikeso wanɛ wahatatanyi lawakawɔ. Lo mɛtɛ, kanɛka anto akina ndo loshilambo ayototshutshuya dia sho salɛ anto akina akambo lo yoho yalangaso vɔ tosalɛ.—Luka 6:31.
3 Lo esambishelo ka lo toshinga: Etena keso l’esambishelo ka lo toshinga, sho kokaka mɛnya dia tekɔ la loshilambo lo mbewɔ dia ndihaka mboka kana tshumanaka olui la ntondo ka makashinyi. Sho pombaka ndjadja lo dihole di’anto akina, lo nyangaka dia sawola la wanɛ wele la yema y’etena ka tohokamɛ, lo dihole dia nyanga dia sawola la wanɛ wɛnama dia wekɔ prɛse. Mbala mɔtshi, mbeyaka monga ohomba sho tɛkɛta la yema ya dui dia wolo di’anto toka dimɛna etena keso lo toshinga tele londjo efula. Ɔnkɔnɛ, sho pombaka sala dui sɔ la kɛnɛmɔ, diaha sho kotola yambalo y’anto oya le so.—Mat. 12:19.
4 Etena kasambishaso lo telefɔnɛ: Kanɛka anto akina ayototshutshuya dia sho sambishaka lo telefɔnɛ lo ahole wele londjo bu efula. Sho mɛnyaka dia tekɔ la loshilambo etena kawatɛso aha la tshimbatshimba lokombo laso ndo oyango woweleso. Tɛkɛta mbala kakɔ ɔtɔi lo boite vocale ndo mongaka la dui dia dimɛna ayotokimanyiya dia sho sawola l’anto dimɛna awui w’oma l’Afundelo. (1 Kor. 14:8, 9) Lo kanɛka anto akina ndo lo monga la loshilambo lo toho totshikitanyi tɔsɔ, sho mbokoyaka Jehowa, Nzambi kaso.