Ɛnyɛlɔ le akɛnda la epalanga

Nɔa aki la diɔtɔnganelo dia dimɛna ndo dia ma ma la Nzambi. Nde akayakimɔ lɔsɛnɔ lande l’otondo dia sala lolango la Jehowa. Nde ‘akakɛndakɛnda la Nzambi ka mɛtɛ’ ndo akatshɔkwama l’ɔtɛ wa dui sɔ. Nɔa ekɔ ɛnyɛlɔ ka dimɛna kahomba akɛnda la epalanga ndjela. (Etat. 6:⁠9) Vidɛo yele l’ɔtɛ a dui ɔnɛ: Noé : il marchait avec Dieu yayokokimanyiya dia wɛ mɛna yoho ya lɔsɛnɔ yaki la Nɔa, lande na kakɔtshɔkɔla Jehowa, ndo woho wakokayɛ mbokoya waonga ande w’ɛlɔlɔ.

DVD dia Noé diekɔ ndo la ɛkɔnya wayela ɛnɛ. Enda vidɛo nyɛ ndo yambola ɔnɛ: 1) Dui diakɔna dia kɔlɔ diakasale andjelo amɔtshi, ndo waa Nefilimɛ akiwɔ? (Etat. 6:​1, 2, 4) 2) Lande na kakaleke anto monga kɔlɔ, ndo ngande wakayaoke Nzambi lo dikambo sɔ? (Etat. 6:​4-6) 3) Ngande wakatshikitana Nɔa la anto akina? (Etat. 6:22) 4) Ngande wakalanyema anto wa kɔlɔ? (Etat. 6:17) 5) Woke wa ngande waki la wato? (Etat. 6:15) 6) Kakɔna kakasale Nɔa nto, ndo ngande wakasale anto? (Mat. 24:​38, 39; 2 Pet. 2:⁠5) 7) Nyama tshɛ ngana ngana yakɔtshiyama lo wato lo ndjela weho ayɔ? (Etat. 7:​2, 3, 8, 9) 8) Nshi ngana yakalɔ mvula, ndo nshi ngana yakatshikala elola lâdiko dia nkɛtɛ? (Etat. 7:​11, 12; 8:​3, 4) 9) Lande na kakake Nɔa nde la nkumbo kande? (Etat. 6:​18, 22; 7:⁠5) 10) Lende akatemalaka wato? (Etat. 8:⁠4) 11) Ngande wakeye Nɔa dia ambokoka vɔ tomba oma lo wato? (Etat. 8:​6-12) 12) Kakɔna kakasale Nɔa etena kakandatombe oma lo wato? (Etat. 8:​20-22) 13) Ngolo aki djembetelo ya na? (Etat. 9:​8-16) 14) Kakɔna kalembetshiya ‘kɛndakɛnda la Nzambi’? (Etat. 6:​9, 22; 7:⁠5) 15) Kakɔna kahombaso sala dia sho tɛnana la Nɔa lo Paradiso? (Mat. 28:​19, 20; 1 Pet. 2:⁠21)

Wetshelo akɔna wakondjayɛ oma l’ɔkɔndɔ ɔnɛ wa lo Bible wendana l’okitanyiya ndo la kɔlamelo yaki Nɔa dia wɛ lawɔ ‘kɛndakɛnda la Nzambi’ ndo monga la mbetawɔ lo akoka wele la Jehowa wa tshungola ekambi ande wa nshi nyɛ?​—⁠Etat. 7:1; Tuk. 10:16; Heb. 11:7; 2 Pet. 2:⁠9.