Toyasha le anto akina —Lo mbâwandolaka
1 Lowando la l’otema ɔtɔi keketshaka onto, mbôtshutshuyaka dia nde mbɔsa yɛdikɔ mɔtshi ndo mbɔngɛnyangɛnyaka. Apandjudi efula wakɛnyi dia tɔtɛkɛta tongana toto ta lowando la l’otema ɔtɔi, kimanyiyaka anto mbala efula dia vɔ tohokamɛ dimɛna l’olimu w’esambishelo. Ngande wakokaso mandola anto etena kayangaso dia mbasambisha lokumu l’ɔlɔlɔ?
2 Toshishimake: L’ɔkɔngɔ wa nde kalola l’olongo, Yeso Kristo akasɛdingola la yambalo tshɛ etsha w’ɛlɔlɔ wa tshumanelo esambele dia l’Asie Mineure. (Eny. 2:2, 3, 13, 19; 3:8) Woho akɔ wâmɛ mbele, ndjasha l’otema ɔtɔi le anto wahomana laso l’esambishelo ayototshutshuya dia sho nyangaka waaso wa mbâwandolaka. Ɛnyɛlɔ, naka wakɔmbi sɛkɛ dimɛna, ombutshi ekɔ lo kɛnɛmɔla ngandji otsha le anande, kana wambotolongola l’ɔngɛnɔngɛnɔ, akambo asɔ tshɛ wekɔ waaso wakokaso mbâwandola. Onde wɛ shishimaka ndo kambaka la waaso wa ngasɔ?
3 Tohokamɛke dimɛna: Etena kasambishaso, tokake anto ambola wahombama dia vɔ mbuta kɛnɛ kele l’etema awɔ. Tɛnya dia sho mbashaka nɛmɔ lo mpokamɛka la yambalo tshɛ kɛnɛ katawɔ. (Romo 12:10) Lo sala ngasɔ, ondo tayoka dikambo dimɔtshi diotshiwɔ dia sho ndjowândola l’otema ɔtɔi ndo lâsɔ mbayotokoka tɛkɛta lo dikambo diosangiso la wɔ lolemi.
4 Tonge la shɛnɔdi: Kakɔna kahombaso sala naka ompokami aso ambota dikambo dimɔtshi diahɔtɔnɛ la kɛnɛ kata Bible? Lo dihole dia tona kɛnɛ kotshinde, andolande ndo tetemala mbotɛ tɔtɛkɛta tele oko “lambɛna dia wɛ mɛtɛ akadjisha yimba lo dikambo sɔ.” (Kol. 4:6) Kânga naka nde mbidjaka tâmu, sho kokaka mbôwandola lo woho wayashande l’otema ɔtɔi lo dikambo diasawolaso. Naka sho monga la memakana ka ngasɔ, kete sho koka kânga tutsha kɛlɛ ka ɔnɛ latona lokumu l’ɔlɔlɔ la wolo tshɛ.—Tuk. 25:15.
5 Dia lowando laso keketsha, paka lɔ ndja oma k’ɛse otema. Kamba l’ɛtɛkɛta wakeketsha wa ngasɔ tombolaka Jehowa ndo koka kimanyiya anto akina dia vɔ mbetawɔ losango la Diolelo.