Woho wa kotsha eyango anyu wa lo nyuma
1. Eyango akɔna wa lo nyuma wele la ɛlɔngɔlɔngɔ l’esekaseka w’Akristo?
1 Oko wenyu ɛlɔngɔlɔngɔ l’esekaseka w’Akristo, eyango anyu wa lo lɔsɛnɔ sɛngiyamaka mɛtɛ oma lo ngandji kokanyu Jehowa ndo oma lo ɛtɛkɛta wakatɛ Yeso Akristo tshɛ dia ‘nyanga ntondo diolelo.’ (Mat. 6:33) Eyango anyu koka monga wa pamia olimu anyu lo kamba oko ambatshi mboka kana ntshɔ dia tokamba lɛnɛ ele ohomba w’efula w’apandjudi wa Diolelo. Amɔtshi koka monga la kanyi ya ndjâkimɔ la lolango l’olimu wa wokelo kana dia tokamba lo bɛtɛlɛ. Ɔsɔ mɛtɛ ekɔ eyango w’ɛlɔlɔ ndo wakoka mandɔma!
2. Kakɔna kakoka nyokimanyiya dia kotsha eyango anyu wa lo nyuma?
2 Dui dimɔtshi diakoka nyokimanyiya dia kotsha eyango anyu ele funda eyango akɔ lofunda. Tshoto y’Etangelo ya Ngɔndɔ k’esambele 15, 2004 lo Falase, mbutaka ɔnɛ: “Kanyi yahokɛma dimɛna ndjokɛmaka hwe naka onto ambotana tɔtɛkɛta takokande mbuta kanyi yakɔ. Ɔnkɔnɛ [nyu] kokaka funda eyango anyu lo dikatshi ndo kɛnɛ [kakokanyu] sala dia kotsha eyango akɔ.” Lâdiko dia lâsɔ, eyango wakokanyu kotsha nshi nyɛ koka nyokimanyiya dia nyu menda ohamelo anyu ndo tetemala mbidja yimba lo eyango ekina wa lo nshi yayaye.
3. Shila eyango ɛmɔtshi wakoka kimanyiya onto dia kotsha kɛnɛ kalɔmbama dia nongola batismu.
3 Eyango wakokanyu ndjadjɛ nshi nyɛ: Naka wɛ atabatizama, kete enda kɛnɛ kahombayɛ sala dia kotsha oyango ɔsɔ. Wɛ mbeyaka monga l’ohomba wa eokelo k’oshika ka wetshelo wa tatelo w’oma lo Bible. Naka ngasɔ, kete yadjɛ oyango wa manyamanya dibuku Bible etshatɔ, lo mbadiaka avɛsa tshɛ woshilami. (1 Tim. 4:15) Yadjɛ nto oyango wa mbadia Bible k’otondo, oma l’Etatelu polo l’Enyelo, oko walɔmbama ase Bɛtɛlɛ la ambeki wa lo kalasa ka Ngiliyadɛ. Oma lâsɔ, ko wɛ nama ekongelo kayɛ ka wadielo wa Bible wa lushi la lushi. (Osam. 1:2, 3) Kɛsɔ mɛtɛ ayokokimanyiya efula dia wɛ pama lo nyuma! Tatɛka ndo kumiyaka wadielo ndo wekelo wa Bible la dɔmbɛlɔ di’oma k’ɛse otema, ndo yangaka nshi tshɛ dia wɛ kambaka la kɛnɛ kekayɛ.—Jak. 1:25.
4. Eyango akɔna wa nshi nyɛ wakoka ndjadjɛ Okristo wele l’eyango wa lo nshi yayaye wele oko wa tokamba lo Bɛtɛlɛ kana oko ombatshi mboka wa lânde?
4 Naka wɛ ambobatizamaka, naa eyango ekina wakokayɛ ndjadjɛ? Onde wɛ ekɔ l’ohomba wa ndowanya diewo diayɛ dia sambisha? Ɛnyɛlɔ, onde wɛ hakoke ndjadjɛ oyango wa nyomoleka mbeya kamba l’Ɔtɛkɛta wa Nzambi l’olimu w’esambishelo? (2 Tim. 2:15) Ngande wakokayɛ pamia olimu ayɛ w’esambishelo? Yadjɛ eyango ɛmɔtshi wa shikaa wakokayɛ kotsha nshi nyɛ wɔtɔnɛ l’ɛnɔnyi ayɛ kana l’akambo wele layɛ ndo wayokokimanyiya dia wɛ ndjokotsha eyango wa lo nshi yayaye.
5. Ngande wele ndjadjɛ eyango wa kotsha nshi nyɛ akakimanyiya ɔnangɛso ɔmɔtshi dia nde kotsha oyango ande wa tokamba lo Bɛtɛlɛ?
5 Ɔkɔndɔ ɔmɔtshi wa dimɛna efula: Lam’akinde l’ɛnɔnyi 19, Tony akatshu dia tenda Bɛtɛlɛ kɛmɔtshi ka Ɛmɛnyi wa Jehowa, ko nsaki ka tokamba lo Bɛtɛlɛ kakonɛma l’otema ande. Koko, yoho yande ya lɔsɛnɔ yaki kɔlɔ, ndo lâsɔ ko nde atayâkimɔ kânga le Nzambi. Tony akɔshi yɛdikɔ ya mbɔtɔnganyiya lɔsɛnɔ lande la mboka yaki Jehowa ndo akayadjɛ oyango wa sala kɛnɛ tshɛ kalɔmbama dia batizama. L’ɔkɔngɔ wa nde kotsha oyango ɔsɔ, nde akayadjɛ oyango wa kamba oko ombatshi mboka wa tshanda ndo l’ɔkɔngɔ wa pondjo, ndo nde akafunde adatɛ wakandahombe tatɛ olimu akɔ lo alamanaka ande. Ohokanyiya ɔlɔ waki lande etena kakawawelɛ lo Bɛtɛlɛ l’ɔkɔngɔ wa nde kamba olimu w’ombatshi mboka lo tshanda mɔtshi!
6. Kakɔna kakoka kokimanyiya dia kotsha eyango ayɛ wa lo nyuma?
6 Ndo wɛ lawɔ koka kotsha eyango ayɛ wa lo nyuma naka wɛ mbetsha wahɔ wa Diolelo lo dihole dia ntondo. Kitsha “elimu aye tshe” l’anya wa Jehowa lo dɔmbɛlɔ ndo sala la wolo tshɛ dia kotsha eyango ayɛ.—Tuk. 16:3; 21:5.