Tokimanyiya anto akina dia vɔ koma angɛnyi wa Nzambi
1 Ɛlɔ kɛnɛ, anto wa lo wedja tshɛ wekɔ lo mbetshama mboka yaki Jehowa. (Is. 2:2, 3) Koko di’anto asɔ ‘ntɔ elowa oma lo ekikelo kawɔ,’ vɔ pombaka mboka Jehowa ngandji. (Luka 8:15; Mako 12:30) Aha la ngandji ka ngasɔ, vɔ hawotonga la wolo wa shika ekolo la ntondo ka tɔsɛngiya ta kɔlɔ kana monga la dihonga dia ntsha kɛnɛ kele ɔlɔlɔ. Yoho mɔtshi ya kimanyiya anto akina dia vɔ monga la diɔtɔnganelo di’ɔlɔlɔ la Jehowa ele mbakeketsha dia vɔ ndeka nanga waonga ande. Keketshawɔ dia vɔ kana yimba la awui wele lo dibuku Yasukanya la Jehowa.
2 Ɛnyɛlɔ kayɛ: Lɔkɛwɔ layɛ kokaka monga la shɛngiya ya wolo le ambeki wa Bible. Vɔ kokaka tshutshuyama dia monga la diɔtɔnganelo dia ma ma la Jehowa etena kɛnawɔ dia wɛ mbɔsaka diɔtɔnganelo diasayɛ la Jehowa la nɛmɔ ndo kɛnawɔ shɛngiya yele la diɔtɔnganelo sɔ lo lɔsɛnɔ layɛ. (Luka 6:40) Lo mɛtɛ, ɛnyɛlɔ kaso mongaka tena efula la shɛngiya ya wolo le anto akina oleki kɛnɛ kataso.
3 Yoho mɔtshi ya dimɛna yetsha ambutshi anawɔ dia mboka Jehowa ngandji ele oma lo ɛnyɛlɔ kawɔ. (Euh. 6:4-9) Wadi l’omi amɔtshi wakakombolaka mbodia anawɔ lo akambo wa mɛtɛ wakambola ambutshi wakatondoya dia sala dui sɔ dia kondja alako. Omi mbutaka ɔnɛ: “Anto tshɛ wakasawola la mi wakambutɛ ɔnɛ ɛnyɛlɔ kasha ambutshi kekɔ ohomba efula.” Ɔnkɔnɛ, lo yoho yawɔ ya lɔsɛnɔ tshɛ, ambutshi kokaka mbisha ana ɛnyɛlɔ ka dimɛna ka kɛnɛ kalembetshiya monga “ongenyi a [Nzambi].”—Jak. 2:23.
4 Dɔmbɛlɔ di’oma k’ɛse otema: Wɛ kokaka nto kimanyiya anto akina dia vɔ mbɔtɔ lɔngɛnyi la Jehowa lo mbaetsha woho wa nɔmbaka oma k’ɛse otema. Wɛ kokaka kotola yambalo yawɔ lo dɔmbɛlɔ di’ɛnyɛlɔ diaki Yeso ndo lo alɔmbɛlɔ akina w’eshika wele lo Afundelo. (Mat. 6:9, 10) Etena kahokamɛwɔ alɔmbɛlɔ wasalayɛ, ana ndo ambeki ayɛ wa Bible kokaka mbeka woho wa nɔmbaka. Etena kahokamɛwɔ alɔmbɛlɔ ayɛ w’oma k’ɛse otema, vɔ shihodiaka nsaki yele layɛ otsha le Jehowa. Keketshawɔ dia vɔ ‘tetemala nɔmba’ etena kahomanawɔ l’ehemba. (Romo 12:12) Lam’ayowɛna ekimanyielo kawasha Jehowa lo etena kewɔ l’ohomba w’ekimanyielo, vɔ wayotatɛ ndjaɛkɛ le nde ndo mbôka ngandji oko ɔngɛnyi wa mɛtɛ.—Osam. 34:8; Fil. 4:6, 7.