Tekɔ l’ɔngɛnɔngɛnɔ dia ndjasha l’olimu waki Jehowa!
1 Ɔpɔstɔlɔ Paulo akangɛnangɛna lo woho ‘wakandayasha tshɛ’ dia kotsha olimu ande w’Okristo. (2 Kor. 12:15) Woho akɔ wâmɛ mbele ɛlɔ kɛnɛ, Akristo efula kambaka la etete tshɛ oko ambatshi mboka. Akina wanɛ wele la ɛkɛndɛ wa wetsho efula lo nkumbo ndjatshungwɛka etena dia ndjasha lo esambishelo lomingu tshɛ kânga mbewɔ l’awui efula wa sala. Anto amɔ wele la hemɔ ya wolo kambaka la yema ya wolo tshitshɛ yele lawɔ dia tɔla wahɔ wa Diolelo otsha la ntondo. Ekɔ mɛtɛ dui diakeketsha dia mɛna ekambi waki Jehowa oyadi ɛnɔnyi kana ekakatanu wele lawɔ wayasha l’olimu ande!
2 Ngandji ka wonyaso onto: Sala kɛnɛ tshɛ kakokaso sala dia kambɛ Jehowa ndo mɛnya ngandji kokaso Jehowa ndo wonyaso onto toshaka nkum’otema ka pudipudi. Lam’ele Paulo akakimɔ anima ande dia mbewoya lokumu l’ɔlɔlɔ, nde akakoke mbuta l’ɔngɛnɔngɛnɔ tshɛ ate: “Dimi lambunyutela elo nti: Dimi laha la unungu wa dikila dianyu, nyu tshe.” (Etsha 20:24, 26; 1 Tes. 2:8) Ndjasha l’esambishelo lo yɛdikɔ yɛdimi l’akoka aso tokimanyiyaka diaha sho monga l’onongo wa dikila.—Ezek. 3:18-21.
3 Ndjasha dia kimanyiya anto akina toshaka ɔngɛnɔngɛnɔ efula. (Etsha 20:35) Ɔnangɛso ɔmɔ akate ate: “La dikɔlɔ, etena kakalolami la ngelo l’ɔkɔngɔ wa mbetsha lushi l’otondo l’olimu wa Jehowa, dimi ndjaokaka mɛtɛ dia lambɔlɛmba. Koko dimi mongaka l’ɔngɛnɔngɛnɔ ndo mbishaka Jehowa losaka lo woho wambishande ɔngɛnɔngɛnɔ wahakoke ndoko onto kɔsɔlami.”
4 Ngandji ka Nzambi: Ɔkɔkɔ woleki woke wayashaso l’olimu waki Jehowa ele nɛ dia dui sɔ ngɛnyangɛnyaka Shɛso lele l’olongo. Ngandji kokaso Nzambi totshutshuyaka dia sho kitanyiya ɛlɛmbɛ ande, mbidja ndo ɔlɛmbɛ wa sambisha la mbetɛ anto ambeki. (1 Joa. 5:3) Sho tetemalaka ndjasha lo olimu waki Jehowa l’ɔngɛnɔngɛnɔ kânga etena kele anto la wendjodi kana kewɔ lo tɔlɔsha.
5 Ɔnɛ kema etena ka kitshakitsha olimu aso w’esambishelo. Tekɔ lo nsɛna lo etena ka dinela. (Mat. 9:37) Lo nshi ya dinela, okambi wa dikambɔ kambaka wenya efula nɛ dia nde pombaka tshumanya diangɔ dia dinela esadi esadi la ntondo ka diɔ tatɛ pɔnda. Etena ka kamba olimu wa dinela dia lo nyuma kambotshikala yema tshitshɛ. Lam’ele sho mbeyaka nshi yasɛnaso, nyɛsɔ sho tshɛ totetemale ndjasha tshɛ lo olimu w’esambishelo.—Luka 13:24; 1 Kor. 7:29-31.