Yadjɛ oyango wa nɔmbɔla wekelo wa Bible
1 “Nyedia ashu anyu, nyendi dikambo diambela dia muna.” (Joa. 4:35) Ɛtɛkɛta ɛsɔ wakate Yeso Kristo mbɔtɔnɛka dimɛna la kɛnɛ kahomana la ekambi w’Akristo ɛlɔ kɛnɛ.
2 Anto wele l’etema w’ɛlɔlɔ wele la nsaki ka mbetshama mboka yaki Jehowa wâkatanema. Dui sɔ mɛnamaka oma lo lofulo la ambeki w’eyoyo wabatizama ɔnɔnyi tshɛ. Kakɔna kakokayɛ sala naka wɛ ekɔ la nsaki ka l’otema ɔtɔi ka nɔmbɔla wekelo wa Bible?
3 Yadjɛ oyango: Ntondotondo, yadjɛ oyango wa tatɛ ndo nɔmbɔlaka wekelo wa Bible mbala la mbala. Lama oyango ayɛ lo yimba etena kayashayɛ l’olimu w’esambishelo. Lam’ele olimu aso w’Okristo mendanaka la wetshelo, kâmɛ ndo esambishelo, sho tshɛ pombaka nyanga waaso wa pamia olimu wa mbeka l’anto Bible.—Mat. 24:14; 28:19, 20.
4 Awui akina wa mbohɔka: Apandjudi wa Diolelo pombaka salaka alɔmbɛlɔ wa l’otema ɔtɔi. Mbala la mbala, sho tanaka anto wakalɔmbɛ dia kondja ekimanyielo ka lo nyuma. Ekɔ mɛtɛ ɔtshɔkɔ dia Jehowa kamba laso dia nyanga ndo mbetsha anto asɔ!—Hang. 2:7; Etsha 10:1, 2.
5 Kadiyɛso kɛmɔtshi akalɔmbɛ Jehowa dia nde mbeka la onto ɔmɔtshi Bible ndo oma lâsɔ nde akakitsha kɔpi mɔtshi ya traktɛ Aimeriez-vous en savoir plus sur la Bible ? lo dihole diande di’olimu. Etena kakɔshi mama kɛmɔtshi traktɛ kɛmɔtshi, nde akakiadia ndo akatatɛ ndodia tshenyi ya dikatshi yahembolawɔ l’ekomelo, kadiyɛso kɛsɔ akasawola la nde ndo aki l’akoka wa tatɛ wekelo wa Bible.
6 Wanyayɛ apandjudi wele l’akoka wa tatɛ ndo nɔmbɔla wekelo wa Bible kokaka kokimanyiya dia wɛ kotsha oyango ayɛ wa nɔmbɔla wekelo wa Bible. Lɔmba Jehowa dia wɛ tatɛ nɔmbɔla wekelo wa Bible ndo kamba la tɛdikɔ takoka kokimanyiya dia wɛ kotsha oyango akɔ. Ondo kem’edja wɛ ayonga l’ɔngɛnɔngɛnɔ wa nɔmbɔla wekelo wa Bible.