‘Tonge la lowando’
1 Etena kakakɔnɔla Yeso akanga wa sudi dikumi, paka ɔtɔi oto la l’atei awɔ mbakakalola dia ndjowosha losaka. Yeso akambola ate: “Aha antu dikumi mbokonwe, keli, lend’eli divwa?” (Luka 17:11-19) Ekɔ mɛtɛ ohomba dia sho monga la lowando ndo mbokaka Jehowa Nzambi, Shɛso ka ngandji kele l’olongo ndo kele la lokaho losaka l’ɔtɛ wa weshasha tshɛ w’ɛlɔlɔ ndo wa kokele watoshande!—Kol. 3:15; Jak. 1:17.
2 Naa diangɔ dimɔtshi diatoshande diahombaso monga la lowando? Tekɔ la lowando lo tshungo, mbuta ate woshasha woleki woke wakasha Nzambi anto. (Joa. 3:16) Sho mbokaka Jehowa losaka nto lo woho watokotolande oya le nde. (Joa. 6:44) Kâmɛ kaso k’Okristo ekɔ ɔkɔkɔ okina wahombaso monga la lowando. (Osam. 133:1-3) Aha la tâmu, wɛ kokaka kanyiya dikambo dia weshasha ekina efula watosha Jehowa. Tatongake oko ase Isariyɛlɛ waki komonga la lowando wakohɛ kɛnɛ kakasalɛ Jehowa!—Osam. 106:12, 13.
3 Tɛnya lowando laso: Kânga mbele ondo akanga wa sudi dikumi waki la lowando lo kɛnɛ kakasalɛ Yeso, paka ɔtɔi oto mbakɛnya lowando lande. (Luka 17:15) Woho akɔ wâmɛ mbele, sho mɛnyaka lowando laso lo ndjasha l’ohetoheto l’olimu w’esambishelo. Naka mɛtɛ tekɔ la lowando lo kɛnɛ tshɛ katosalɛ Shɛso ka ngandji kele l’olongo, kete etema aso wayototshutshuya dia mbokoya ngandji ndo lokaho lande lo mbewoya anto akina akambo wendana la nde. (Luka 6:45) Lo wedi okina, etena kewoyaso anto akina akambo wendana la ‘etsha wa diambo efula waki Jehowa ndo awui wakandakane lo dikambo diaso,’ ngandji kawokaso ndo lowando lele laso otsha le nde pamaka.—Osam. 40:5.
4 Tokeketsha anto akina dia vɔ mɛnya lowando: Sho pombaka nyangaka waaso wa kimanyiya ana ndo ambeki wa Bible dia vɔ mbokanaka losaka. Ambutshi wekɔ la waaso efula wa sala dikambo sɔ, ɛnyɛlɔ etena kendawɔ diangɔ diakatonge Jehowa kâmɛ la anawɔ. (Romo 1:20) Etena kalɔmbɔlaso wekelo wa Bible, sho mbeyaka mimbola ombeki aso wa Bible ɔnɛ: “Dui nɛ atetshadiɔ lo kɛnɛ kendana la woho w’onto wele Jehowa?” Etena katahame lowando l’ombeki wa Bible, mbatahame ndo ngandji kokande Nzambi la yɛdikɔ yande ya mbɔngɛnyangɛnya.
5 Lo nshi y’ekomelo nyɛ, anto efula bu la lowando ndo hawokana losaka. (2 Tim. 3:1, 2) Jehowa mɛtɛ ayɔngɛnangɛna dia mɛna ekambi ande wakayakimɔ wɛnya lowando lawɔ lo ndjasha l’ohetoheto tshɛ l’olimu w’esambishelo!—Jak. 1:22-25.