‘Toyele wanya ande dimɛna dimɛna’
1. Ngande wakokaso koma ekambi wa tomanamana?
1 Yeso kɔmbɔtɔ kalasa y’ewandji w’ɛtɛmwɛlɔ w’ase Juda, koko nde aki Okambi woleki woke weyama lo ɔkɔndɔ w’anto w’otondo. Diɛsɛ ko, ɔkɔndɔ wendana la olimu waki Yeso wakombama dia wahɔ aso. Dia monga ekambi wa tomanamana, sho pombaka ‘ndjela wanya ande dimɛna dimɛna.’—1 Pet. 2:21.
2. Kakɔna kayotokimanyiya dia sho mboka anto ngandji oko Yeso?
2 Tɛnya ngandji kokaso anto: Yeso akayakiyanyaka la ngandji tshɛ dikambo di’anto. (Mako 6:30-34) Anto efula wa lo ɛtshi kaso ka nkɛtɛ ‘wekɔ lo sowa’ ndo wekɔ l’ohomba efula wa mbeya akambo wa mɛtɛ. (Romo 8:22) Kana yimba lo asui wasowawɔ ndo woho wayakiyanya Jehowa la ngandji tshɛ dikambo diawɔ ayototshutshuya dia sho tetemala sambisha. (2 Pet. 3:9) Ndo nto, anto wayoleka monga suke dia mbetawɔ losango laso naka vɔ mɛnaka dia sho ndjakiyanyaka l’otema ɔtɔi dikambo diawɔ.
3. Lo waaso akɔna wakasambishaka Yeso anto akina?
3 Tosambisha lo diaaso tshɛ: Yeso akakambaka la diaaso tshɛ dia sambisha anto lokumu l’ɔlɔlɔ. (Mat. 4:23; 9:9; Joa. 4:7-10) Woho akɔ wâmɛ mbele, sho nangaka ndjalɔngɔsɔla dia mbewoyaka akambo wa mɛtɛ etena kakambaso elimu aso wa lushi la lushi. Anto amɔtshi mongaka la Bible ndo la ekanda wonya tshɛ dia vɔ sambisha l’olimu, la kalasa, etena kewɔ lo lɔkɛndɔ, etena kasombawɔ diangɔ ndo tena dikina.
4. Ngande wakokaso mbetɛ Diolelo ɔtɛ a dui wa esambishelo kaso?
4 Toleke tɛkɛta dikambo dia Diolelo: Yeso akalekaka tɛkɛta dikambo dia lokumu l’ɔlɔlɔ la Diolelo l’esambishelo kande. (Luka 4:43) Kânga mbele mbeyaka monga ko mbɔtwɛlɔ kaso hatɛkɛta mbala kakɔ ɔtɔi dikambo dia Diolelo, sho nyangaka dia kimanyiya ompokami aso dia nde mɛna ohomba adiɔ. Kânga etena katɛkɛtaso di’awui wa kɔlɔ weta lo andja wɛnya dia tekɔ lo nsɛna lo nshi y’ekomelo, sho ndekaka ‘tɛkɛta dikambo dia lokumu l’ɔlɔlɔ l’akambo w’amɛna.’—Romo 10:15.
5. Dia sho monga la etombelo w’ɛlɔlɔ l’esambishelo, dihole diakɔna diahomba monga la Bible?
5 Toyaɛkɛ lo Ɔtɛkɛta wa Nzambi: Lo edja tshɛ kakasambishaka Yeso, nde akayaɛkɛka lo Afundelo. Nde kombetsha ndoko dui oma lo lolango lande. (Joa. 7:16, 18) Nde akekaka Ɔtɛkɛta wa Nzambi ndo akakambe la wɔ etena kakohembe Satana. (Mat. 4:1-4) Dia sho mbetsha anto akina dimɛna, sho pombaka mbadiaka Bible lushi la lushi ndo kambaka la awui akɔ. (Romo 2:21) Etena kakadimolaso ambola l’esambishelo, sho pombaka shila divɛsa dimɔ diasukɛ kɛnɛ kataso ndo naka kokaka, sho la dia diadia mbala kakɔ ɔtɔi oma lo Bible. Sho nangaka di’ompokami aso mɛna dia aha tokanyi taso hita mbatondjaso, koko awui tshɛ wataso ndja oma le Nzambi.
6. Kakɔna kakasalaka Yeso dia munanda etema w’ampokami ande?
6 Tonande etema w’anto etena ketshaso: “Nduku untu edja ndu kakiane akateketa wuhu oso.” (Joa. 7:46) Kɛsɔ mbakate apulushi etena kakawambola ɛlɔmbɛdi wa lâdiko la Afarisɛ lande na kakiwɔ komunda Yeso. Lo dihole dia komɛ tsho lo mbuta tshondo ya dikambo, Yeso aketshaka lo yoho yakanandaka etema w’anto wakandetshaka. (Luka 24:32) Nde akakambe la bɛnyɛlɔ diakeyaka anto dimɛna dia mbakimanyiya dia vɔ mboka losango lande. (Mat. 13:34) Yeso kɔpɔpaka ampokami ande la awui efula. (Joa. 16:12) Nde akakotolaka yambalo yawɔ oya le Jehowa koko aha oya le nde. Lo ɛnyɛlɔ ka Yeso, sho koka koma embetsha w’eshika lo ‘tetemala mbidja yimba lo yoho yaso ya mbetsha.’—1 Tim. 4:16.
7. Lande na kaki Yeso kompekɔ sambisha?
7 Wendjodi ndo ɔlɔshamelo watotohekoyake: Kânga mbakasale Yeso ahindo, anto efula kombohokamɛ. (Luka 10:13) Kânga ase nkumbo kande wakakane vate kana nde “ambudjo dadi.” (Mako 3:21) Koko, Yeso kompekɔ. Nde aki la ekanelo k’ɔlɔlɔ nɛ dia nde aki la eshikikelo dia nde aki la akambo wa mɛtɛ wakakoke tshungola anto. (Joa. 8:32) La ekimanyielo kaki Jehowa, sho lawɔ tamboyashikikɛ diaha mpekɔ.—2 Kor. 4:1.
8, 9. Ngande wakokaso mbokoya Yeso lo ndjahombia dikambo di’esambishelo ka lokumu l’ɔlɔlɔ?
8 Toyahombia dia ndeka sambisha: Yeso akayahombia diangɔ dia l’emunyi l’ɔtɛ w’esambishelo. (Mat. 8:20) Nde akasambishaka aha la mpekɔ ndo mbala mɔtshi polo ndo l’otsho. (Mako 6:35, 36) Yeso akeyaka dia nde komonga la etena efula ka sambisha. Lam’ele “nshi yaya ka nshila,” sho lawɔ pombaka ndjahombia wenya aso, wolo aso ndo ekundji aso l’ɛnyɛlɔ ka Yeso.—1 Kor. 7:29-31.
9 Akristo wa lo ntambe ka ntondo waki ekambi wa tomanamana nɛ dia Yeso mbakawaetsha. (Etsha 4:13) Sho lawɔ koka kamba olimu aso dimɛna dimɛna naka sho mbokoya Okambi woleki woke wa l’ɔkɔndɔ w’anto.—2 Tim. 4:5.