“Nyembe lokoho lami”
1 Lo andja ɔnɛ woludi l’ekakatanu ndo la nyangu, sho kondjaka ekeketshelo ka mɛtɛ lo mbetawɔ leeta la dimɛna laki Yeso la mɛmba lɔkɔhɔ lande. (Mat. 11:29, 30) Mbetawɔ monga ombeki waki Yeso nembetshiyaka ndjasha l’olimu wele aha tsho wolo, koko ndo wakeketsha. Olimu ɔsɔ mendanaka la sambisha lokumu l’ɔlɔlɔ la Diolelo ndo kimanyiya anto akina dia ndo vɔ lawɔ kondja ekeketshelo lo mɛmba lɔkɔhɔ l’osadi laki Yeso.—Mat. 24:14; 28:19, 20.
2 Ekeketshelo kaya oma l’esambishelo: Yeso kɔnɔmba ambeki ande dia vɔ kotsha oshikɔ ande lâdiko dia wetsho waki lawɔ. Koko, nde akâlɔmbɛ dia vɔ tshika eshikɔ awɔ wa wetsho dia vɔ mɛmba wande w’osadi. Etena kɛsɔ hatotodiɛnɛ la wetsho waya oma lo nyangu ndo ekiyanu wa lo dikongɛ nɛ di’akambo kana hatotokambɛ ekundji wa lo tshanda mɔtshi tsho. (Luka 21:34; 1 Tim. 6:17) Kânga mbeso la wesanu ndo mbahombaso kamba elimu dia kotsha ehomba aso wa lushi la lushi, sho mbetshaka ɔtɛmwɛlɔ waki Nzambi lo dihole dia ntondo lo nsɛnɔ yaso. (Mat. 6:33) Tayɛnaka nshi tshɛ dia esambishelo ekɔ olimu wakeketsha, koko aha oko wotsho ɔmɔtshi, naka sho monga la kanyi y’ɔlɔlɔ lo kɛnɛ kendana la awui woleki ohomba.—Fil. 1:10.
3 Sho ngɛnangɛnaka tɛkɛta la anto akina kɛnɛ kangɛnangɛnaso. (Luka 6:45) Akristo tshɛ ndjashaka efula lo awui wendana la Jehowa ndo l’ɛtshɔkɔ wakandalake. Ɔnkɔnɛ, ekɔ mɛtɛ ekeketshelo dia mbewoya ‘lokumu l’ɔlɔlɔ l’akambo w’ɛlɔlɔ’ ndo minya yimba lo ekiyanu aso wa lushi la lushi etena kasambishaso! (Romo 10:15) Lo mɛtɛ, lo yɛdikɔ y’efula yasalaso dui dimɔtshi mbalekaso dieya ndo dingɛnangɛna. Omalɔkɔ, mbetsha wenya efula lo esambishelo naka tekɔ l’akoka wa sala dui sɔ ayoleka tokeketsha. Ekɔ mɛtɛ dui di’ekeketshelo etena ketawɔ anto esambishelo kaso! (Etsha 15:3) Oyadi etena kahomanaso la wendjodi kana la ɔlɔshamelo, esambishelo kayotokeketsha lo nyuma naka sho tetemala la mbohɔ dia welo wadjaso ngɛnyangɛnyaka Jehowa ndo ɔnɛ nde mbatɔtshɔkɔla mbakondjaso etombelo w’ɛlɔlɔ.—Etsha 5:41; 1 Kor. 3:9.
4 Lo mbetawɔ leeta laki Yeso, sho mongaka la diɛsɛ dia kamba kâmɛ la nde oko Ɛmɛnyi wa Jehowa. (Is. 43:10; Eny. 1:5) Ndoko dui diakoka tokeketsha efula oko dui sɔ!