‘Toyalɔngɔsɔlɛ dia kamba elimu tshɛ w’ɛlɔlɔ’
1 Etena kakatatɛ Yeso yoho y’oyoyo y’esambishelo, nde akɔshi etena ka nɔngɔsɔla ambeki ande. (Mat. 10:5-14) Kânga mbeso sho tshɛ la wesanu efula, mbɔsa minitɛ ngana dia ndjalɔngɔsɔla la ntondo ka tosambisha lo soko la soko ayotokimanyiya dia sho kondja etombelo w’ɛlɔlɔ.—2 Kor. 9:6.
2 Woho wa ndjalɔngɔsɔla: Sho kokaka tatɛ ndjalɔngɔsɔla dimɛna lo manyamanya ekanda wakatalɔngɔsɔdi dia tosha anto. Sho pombaka nto kanyiya dikambo di’anto wa lo ɛtshi kaso ka nkɛtɛ. Awui akɔna wayakiyanyawɔ? Lo ɛtɛmwɛlɔ akɔna walekawɔ ndjasha? Sho kokaka menda bɛnyɛlɔ dia mbɔtwɛlɔ diele lo Olimu aso wa Diolelo ndo lo dibuku Comment raisonner à partir des Écritures.
3 Ndo nto, ndjela la yambalo y’efula wɛnyɛlɔ wasalema lo Losanganya l’olimu ayotokimanyiya. Etena kakomaso tomanyi lo kamba la mbɔtwɛlɔ kaso, hatotɔsaka nto wenya efula dia ndjilɔngɔsɔlaka. Koko, mbala tshɛ la ntondo ka sho ntshɔ l’esambishelo, naka sho tâkanyiyisha kɛnɛ kayototota ndo tetemala ndowanya mbɔtwɛlɔ kaso, kete tayoleka kondja etombelo w’ɛlɔlɔ. Sho pombaka nto mbɔsa etena ka menda kana tapa diaso di’esambishelo diekɔ la diangɔ tshɛ diayonga laso ohomba.
4 Kakɔna kayotokimanyiya dia sho mbohɔka mbɔtwɛlɔ yaso? Mboholaka mbɔtwɛlɔ yakɔ la dui dia wolo tokimanyiyaka dia sho ndjikimɛ l’ɔtɛ. Anto amɔtshi ngɛnangɛnaka mvusola mbɔtwɛlɔ yakɔ lo wonya wa wekelo awɔ wa lo nkumbo. Akina mɛnaka dimɛna ndjifunda lo yɛtshi ya dikatshi yakokawɔ mbokaka sso la ntondo ka koma lo soko dimɔtshi.
5 Ohomba wa ndjalɔngɔsɔla: Ndjalɔngɔsɔla dimɛna tokimanyiyaka dia sho ndeka kondja etombelo w’ɛlɔlɔ ndo fudia ɔngɛnɔngɛnɔ aso l’esambishelo. Dui sɔ diayotokimanyiya dia sho ndjaoka dimɛna ndo minya wɔma. Tayoleka monga l’akoka wa ndeka mbidja yimba le ompokami aso lo dihole dia sho ndjakiyanya dia mbeya kɛnɛ kayangaso mbuta. Ndo nto, mbeya dimɛna awui wele l’ekanda wayotosha anto ayotokimanyiya dia sho ndeka mbasha la waasaso.
6 Afundelo tokeketshaka dia sho ‘ndjalɔngɔsɔla dia kamba elimu tshɛ w’ɛlɔlɔ.’ (Tito 3:1) Onde ekɔ olimu ɔmɔtshi woleki wa sambisha lokumu l’ɔlɔlɔ? Lo ndjalɔngɔsɔlaka dimɛna, sho mɛnyaka dilɛmiɛlɔ diashaso ompokami letawɔ tohokamɛ ndo Jehowa Nzambi keso enyimpala ande.—Is. 43:10.