Tosambisha aha la mpekɔ
1 Lo tena dimɔtshi, sho mbeyaka mɛna diele oko tambokindjakindja ɛtshi kaso ka nkɛtɛ mbala ko mbala koko anto hawoleke mbetawɔ. Koko tekɔ l’ɛkɔkɔ w’eshika wa tetemala sambisha.—Mat. 28:19, 20.
2 Oko djembetelo: Yeso akatatshi dia esambishelo ka Diolelo kayonga etenyi kɛmɔtshi ka djembetelo ya tenyi tenyi ya ‘ekomelo ka dikongɛ nɛ di’akambo’ ndo dia olimu ɔsɔ wayoyala ‘oko djembetelo le anto wa lo wedja tshɛ.’ (Mat. 24:3, 14) Etena katɛna anto lam’atatasambisha lokumu l’ɔlɔlɔ la Diolelo, djembetelo ya wolo yekɔ lo mbishama. L’ɔkɔngɔ wa sho mimɔ oma lo lokombo lɔmɔtshi, anto amɔtshi mbeyaka tɛkɛta lo kɛnɛ kendana la wendelo aso l’edja ka wenya kana ka nshi efula oyadi kânga hawohokame losango laso. Mbeya ɛkɔkɔ watotshutshuya dia sho sambisha ayotokimanyiya dia sho tetemala. Sho ngɛnyangɛnyaka Jehowa lo woho washaso lonya l’okotshamelo wa prɔfɛsiya ya lo Bible lo mbewola anto ndo lo mbatɛ dikambo dia elanyelo kaya k’emembe.—2 Tes. 1:6-9.
3 Ekɔ ohomba tetemala: Lam’ele anto wekɔ l’akambo efula wekola yimba ndo wawaetshɛ wenya efula, ekɔ ohomba efula dia sho monga la etete etena kasalaso la wolo dia nomialomia nsaki yele lawɔ. L’edja ka ɔnɔnyi w’otondo, Ɛmɛnyi wa Jehowa wakatshɔka lomingu tshɛ la ka womoto ɔmɔtshi la ntondo ka nde ndjetawɔ sawola la wɔ awui wa lo Bible. Nde akangɛnangɛna kɛnɛ kakandokaka efula ko nde akayetawɔka dia mbeka Bible, akatatɛ mbɔtɔ lo nsanganya ndo akɛnya nsaki kande ka batizama esadi eto.
4 Akambo wa l’andja ɔnɛ wekɔ lo tatshikitana esadi esadi, woho akɔ wâmɛ mbatatshikitana ndo waonga w’anto. Anto efula wakatonaka losango laso mbeyaka ndjetawɔ elongamelo kaso kakeketsha. Naka onto ɔmɔtshi ambetawɔ losango la Diolelo, kete kokaka mɛtɛ dia sho tetemala.
5 L’andja w’otondo, anto efula wekɔ lo ‘nkuma akumu ndo wekɔ lo ndela l’ɔtɛ w’akambo wa kɔlɔ tshɛ wasalema.’ (Ezek. 9:4) Etombelo waya oma l’esambishelo kaso mɛnyaka dia wanɛ wakoka wekɔ lo mbetawɔ losango la Diolelo. (Is. 2:2, 3) Ɔnkɔnɛ, nyɛsɔ totetemale sambisha aha la mpekɔ la ngandji tshɛ lo ‘mbewoya anto lokumu l’ɔlɔlɔ la dui dimɔtshi di’ɔlɔlɔ.’—Is. 52:7; Etsha 5:42.