Ekongelo ka losanganya la lânde la lushi ɔtɔi layaye
Losanganya la lânde la lushi ɔtɔi la l’ɔnɔnyi w’olimu 2009 lekɔ l’ɔtɛ a dui wata ɔnɛ: ‘Tolamake olimu w’esambishelo, dia sho mbôkotsha.’ Vɔ mbɔsama oma lo Kolosai 4:17. Oko weso Akristo, sho mbɔsaka ɛtɛkɛta ɛsɔ la nɛmɔ di’efula. Oyango aso ele wa kotsha olimu aso la kɔlamelo tshɛ woho wakasale Yeso. (Joa. 17:4) Ɔpɔstɔlɔ Paulo nde lawɔ akatotshikɛ ɛnyɛlɔ ka dimɛna efula lo dikambo sɔ. Nde akayashikikɛ dia shidiya olimu ande.—Etsha 20:24.
Sawo diayoshama oma le omendji w’otshimbedi diayɛnya woho watondoya apandjudi efula ekakatanu wahomana lawɔ l’olimu w’esambishelo. Oma lâsɔ, sawo diele l’ɔtɛ a dui ɔnɛ: “Tɔlɔngɔsɔlɛ kɛnɛ kakatonɛ” diayotɛnya woho wakokaso kimanyiya wanɛ ‘wakoka kondja lɔsɛnɔ la pondjo.’ (Etsha 13:48) Lo sawo diande dia ntondo diele l’ɔtɛ a dui ɔnɛ: “Woho wayaeyanyaso oko ekambi,” ɔtɛkɛtshi w’ɔngɛndangɛnda ayolembetshiya 2 Koreto 6:1-10 divɛsa lo divɛsa. Lo etenyi ka l’ɔkɔngɔ a midi, nde ayosha sawo diele l’ɔtɛ a dui ɔnɛ: “Tɔsake olimu w’esambishelo la nɛmɔ di’efula.” Aha la tâmu tayokeketshama oma lo asawo wata ɔnɛ: “Akɛnda ndo epalanga ngɛnangɛnaka sambisha” ndo “Ɛlɔngɔlɔngɔ l’esekaseka wakotsha olimu awɔ.” Wanɛ wakombola nongola batismu dia mɛnya ndjakimɔ kawɔ le Nzambi lo losanganya l’otshimbedi kana la lânde la lushi ɔtɔi layaye pombaka mbewoya omendji walɔmbɔla aha la tshimbatshimba. Ɔsɛdingwelo wa Tshoto y’Etangelo ekɔ etenyi kɛmɔtshi k’ohomba efula ka nsanganya yaso ya weke. Kanyoye la Tshoto y’Etangelo yayekama lo lomingu layosalema losanganya la lânde la lushi ɔtɔi.
Etena kalamaso olimu w’esambishelo dia mbokotsha, sho salaka la wolo diaha awui akina tɔsɛ wenya wa sala kɛnɛ kakatosha Jehowa. Ekeketshelo k’oma lo Afundelo kayotokondja lo losanganya la lânde la lushi ɔtɔi kayotokimanyiya dia sho shihodia kɛnɛ kahombaso sala dia ndeka ndjasha l’olimu akɔ dia sho mbokotsha dimɛna.