Wɛ kokaka monga ombetsha!
1. Diɛsɛ diakɔna dia lânde diele l’oseka opandjudi tshɛ wa Diolelo?
1 Etenyi kɛmɔtshi ka dimɛna efula k’olimu aso w’esambishelo ele mbetsha onto ɔmɔtshi akambo wa mɛtɛ. Mɛna woho wetawɔnde losango la Diolelo lo mbokimanyiya dia nde ndjasukanya la Nkum’Olongo ekɔ dikambo diangɛnangɛnaso efula. (Jak. 4:8) Mbetsha onto lele la mposa k’akambo wa mɛtɛ ndo mɛna woho wasalande etshikitanu wa weke lo lonto lande, lo ekanelo kande ka yimba ndo lo lɔkɛwɔ lande mbele oyango wele l’opandjudi wa Diolelo tshɛ.—Mat. 28:19, 20.
2. Lande na kakoka anto amɔtshi mengenga dia nɔmbɔla wekelo wa Bible, ndo kakɔna kayowakimanyiya dia tondoya dikambo sɔ?
2 Yaɛkɛ le Jehowa: Lo nshi y’edjedja, ekambi wa kɔlamelo waki Nzambi wakɛnyi dia vɔ bu l’akoka wa sala olimu wakawasha Jehowa. Ndjaɛkɛ le Jehowa Nzambi akakimanyiya Mɔsɛ, Jeremiya, Amɔsɛ ndo anto k’anto akina dia tondoya wengengo waki lawɔ ndo kotsha olimu awɔ dimɛna. (Etum. 4:10-12; Jer. 1:6, 7; Am. 7:14, 15) Ɔpɔstɔlɔ Paulo lawɔ ‘aki la dihonga.’ Lo woho akɔna? Nde mbutaka diaki ‘lo wolo wa Nzambi.’ (1 Tes. 2:2) Eelo, sho tshɛ kokaka ndjaɛkɛ le Jehowa dia nde tokimanyiya, tosha lomba ndo wolo weso lawɔ ohomba dia nɔmbɔla wekelo wa Bible watahame.—Is. 41:10; 1 Kor. 1:26, 27; 1 Pet. 4:11.
3, 4. Wetshelo akɔna walongolaso dia mbetsha Ɔtɛkɛta wa Nzambi?
3 Etawɔ wetshelo: Jehowa Nzambi, Ombetsha aso wa woke tetshaka lo tshimbo y’ekanda walembetshiya Bible dia sho monga embetsha wa tomanamana. (Is. 54:13; 2 Tim. 3:16, 17) Etawɔ wetshelo ɔsɔ lo sala tshɛ kakokayɛ sala dia pamia eokelo kayɛ k’Afundelo ndo ndowanya dikoka diayɛ dia mbetsha akambo wa mɛtɛ wa lo Bible. Kânga mbele dui sɔ mbele oyango wa ntondo wa Kalasa k’olimu wa teokrasi ndo Losanganya l’olimu, nsanganya tshɛ ya l’etshumanelo tetshaka woho wa sho mbetsha Ɔtɛkɛta wa Nzambi.
4 Yaketembola dia mbeka toho ta wɔdu dia mbetsha akambo wa mɛtɛ wa lo nyuma woshami etale. Dibuku Kalasa k’olimu, lɛkɛ 227, mbutaka ɔnɛ: “Wɛ la dia shihodia dui diayoyɔmbɔla dimɛna naka wɛ nangaka di’anto akina todishihodia.” Mbishaka kɔmatɛrɛ lo nsanganya tokimanyiyaka dia kakatshiya awui w’ohomba lo timba taso dia ndjokamba la wɔ lo nshi yayaye. Ɔnkɔnɛ, naka wɛ ndjalɔngɔsɔlaka dimɛna, kete dikoka diayɛ dia mbetsha diayolowana.
5. Wetshelo akɔna nto wele laso l’etshumanelo watokimanyiya dia sho koma embetsha wa tomanamana?
5 Aha la tâmu, oma k’edjedja, ekambi w’Akristo kimanyiyanaka lam’ewɔ l’olimu wa mbetɛ anto ambeki. (Luka 10:1) Naka kokaka, tomba l’apandjudi wa tomanamana ɛnyɛlɔ oko ambatshi mboka, dikumanyi ndo emendji w’eteta l’olimu wa mbeka l’anto Bible. Enda woho wakambawɔ la esato, ɛtɛkɛta walembetshiya esato ndo dihomɔ dikina dia wetshelo diele l’ekanda wekaso l’anto dia nembetshiya akambo wa mɛtɛ wa lo Afundelo. Mbolawɔ kɛnɛ kakokayɛ sala dia wɛ monga ombetsha wa manamana. (Tuk. 1:5; 27:17) Onga la lowando lo wetshelo ɔsɔ w’oma le anangɛso l’akadiyɛso, nɛ dia vɔ wekɔ mɛtɛ wetshelo w’oma le Nzambi.—2 Kor. 3:5.
6. Kakɔna kahombama dia koma ombetsha wa manamana w’Ɔtɛkɛta wa Nzambi?
6 Yaɛkɛ le Jehowa ndo kondja wahɔ oma lo wetshelo watoshande. Lɔmba Nzambi dia nde kokimanyiya dia wɛ pama. (Osam. 25:4, 5) Wɛ lawɔ kokaka kondja ɔngɛnɔngɛnɔ waya lo kimanyiya onto ɔmɔtshi dia nde monga oko wɛ, mbuta ate ombetsha w’Ɔtɛkɛta wa Nzambi!