Onde wɛ mbeyaka ɔsɔnwɛlɔ ayɛ?
Lo mpitadi efula ya lo andja w’otondo, woleka sala anto epaso aha la mbidja dikila. Onde wɛ mbeyaka dimɛna ɛsɔnwɛlɔ wakokayɛ sala lo kɛnɛ kendana la esakelo wahawakambe la dikila? Ekɔ ohomba wɛ mbeya dikambo sɔ dia wɛ mbɔsa tɛdikɔ tendana l’awui wa osakelo ndo w’epaso. Enda bandɛ vidɛo kele l’ɔtɛ a dui ɔnɛ: Pas de sang : la médecine relève le défi. Oma lâsɔ, vusola lo ekimanyielo ka dɔmbɛlɔ kɛnɛ kamboyeka lo kamba la ambola wayela anɛ.—Diewoyelo: Lam’ele lo bandɛ vidɛo kɛnɛ vɔ mɛnya lo tshena pe weho ɛmɔtshi wasalema epaso, ambutshi pombaka monga la yewo etena kendawɔ vidɛo kɛnɛ la anawɔ wa totshitshɛ.
1) Naa ɔkɔkɔ woleki woke watona Ɛmɛnyi wa Jehowa kaloya dikila? 2) Lo kɛnɛ kendana l’osakelo, kakɔna kakombola Ɛmɛnyi wa Jehowa? 3) Lotshungɔ lakɔna lele la ɛkɔnyi? 4) Bonde kele sɔna weho ekina w’esakelo wahawakambe la dikila mɛnyaka dia tekɔ l’ekanelo k’ɔlɔlɔ? 5) Naka ɔkɔnyi amboshisha dikila efula, naa akambo ahende wahomba dɔkɔtɛlɛ sala aha la tshimbatshimba? 6) Naa atɔndɔ anɛi wendana la esakelo ekina wahawakambe la dikila? 7) Ngande wakoka adɔkɔtɛlɛ a) kitshakitsha oshishelo wa dikila, b) kokɛ tokama ta beela, c) kimanyiya dia dikila mbotôtɔ lo demba, ndo d) sala dia dikila dioshishwe kalola? 8) Kɔndɔla woho wasalema osakelo welɛwɔ a) ɔlɛlwɛlɔ wa dikila (hémodilution) ndo b) okotolelo wa dikila diakɛla lo mpota. 9) Awui akɔna wahombayɛ kombola dia mbeya lo kɛnɛ kendana la weho w’esakelo ekina wahawakambe la dikila? 10) Onde epaso wa wolo kokaka salema aha la kaloya onto dikila? 11) Ohamelo akɔna wa dimɛna watasalema laka aseka enganga?
Mbetawɔ esakelo ɛmɔtshi wɛnyishawɔ lo vidɛo kɛnɛ ekɔ yɛdikɔ yahomba onto ndamɛ mbɔsa lo ndjela nkum’otema kande kambetshama oma lo Bible. Onde wɛ amboshila sɔna toho ta esakelo tahawakambe la dikila tayoyetawɔ dikambo diayɛ ndo dia anayɛ ndo nyambolodja kartɛ k’otonelo wa dikila (DPA)? Dia nyu mbeya awui wendana la akambo asɔ, nyɔsɛdingole la yambalo tshɛ “Ambola w’oma le ambadi” wele lo Tshoto y’Etangelo ya Ngɔndɔ ka samalo 15, 2004, lo Falase ndo Tshoto y’Etangelo ya Ngɔndɔ ka dikumi l’ɔtɔi 1, 2000. Oma lâsɔ, nyokambe la dikatshi di’ekadimwelo dia okotsha wa Olimu aso wa Diolelo wa Ngɔndɔ ka dikumi l’ɔtɔi 2006 lo ɔtɛ a dui wata ɔnɛ: “Ngande wɔsami tangangɔ tɔsami oma lo dikila ndo ɛgzamɛ kana esakelo walɔmbawɔ dia kamba la dikila diami?” dia nyu mbɔsa tɛdikɔ tanyu hita lo kɛnɛ kendana la ɛsɔnwɛlɔ wayonyetawɔ kana wayonyotona. L’ekomelo, nyoyashikikɛ dia nyakafundji ɛsɔnwɛlɔ anyu lo kartɛ yanyu ya DPA. Enganga wayonyɔsɔna ndo ewotɔ anyu wele kema Ɛmɛnyi wa Jehowa pombaka mbeya ɛsɔnwɛlɔ anyu dimɛna dimɛna.
[Kiombo ya lo lɛkɛ 3]
• Onde wɛ amboshila nsɔna esakelo wayoyetawɔ lo dikambo diayɛ ndo dia anayɛ?
• Onde wɛ ambolodja kartɛ ka DPA kayɛ tshɛ dia ndjalɔngɔsɔla dikambo dia akambo wa wanyandja wakoka tomba?