‘Tokimɔ nsɛnɔ yaso’ lo wahɔ w’ambeki aso
1. Kakɔna kalɔmbama dia nkimanyiya ombeki wa Bible?
1 Dia nkimanyiya ombeki wa Bible dia nde ndjoyakimɔ, akambo efula nɔmbamaka lâdiko dia nɔmbɔlaka wekelo wa Bible wa mbala la mbala kâmɛ la nde. Ɔpɔstɔlɔ Paulo akɛdika diɔtɔnganelo diaki lam’asande l’anto wakandasambishaka la nɛ diele lam’asa ombutshi wa womoto l’ɔnande l’ashashi. Sho lawɔ ngɛnangɛnaka dia ‘nkimɔ nsɛnɔ yaso’ dia nkimanyiya ambeki aso wa Bible dia vɔ mpama lo nyuma.—1 Tes. 2:7-9.
2. Lande na kahombaso ndjasha l’otema ɔtɔi le ambeki aso, ndo ngande wakokaso nsala dui sɔ?
2 Toyasha l’otema ɔtɔi le nde: Etena kakamba ombeki wa Bible la kɛnɛ kekande, nkum’otema kande kayowoshimba dia nde ntetemala mbɔtɔnɛ la wanɛ wahasɛnɛ lo yoho y’ɔtɔnɛ l’atɔndɔ wa lo Bible. (1 Pet. 4:4) Nkumbo kande mbeyaka mbɔsɛka. (Mat. 10:34-36) Sho kokaka mbokimanyiya dia nde nshidiya lonyangu lande lo ndjashaka l’otema ɔtɔi le nde. Misiɔnɛrɛ ɔmɔtshi wa manamana ekɔ lo mbuta ate: “Tosasɛke dia nkalola otsha lakayɛ kam’ashidiyayɛ mbeka l’ombeki ayɛ.” Naka kokaka, tshikala dia nsawola la nde lo tshanda mɔtshi. Onga nsuke dia nkimanyiya ombeki ayɛ lo yoho ya shikaa. Ɛnyɛlɔ, shi wɛ kokaka mbêlɛ lo telefɔnɛ kana towenda naka nde ekɔ la hemɔ? Shi wɛ kokaka mbidjasɛ suke l’ombeki ayɛ lo nsanganya ndo mbokimanyiya lo mbɛmbɛ anande naka kokaka?
3. Ngande wakokaso nkimanyiya ambeki aso wa Bible dia vɔ nkondja ekeketshelo oma le ase etshumanelo?
3 Ekimanyielo k’oma le ase etshumanelo: Naka wɛ ekɔ lo nsambisha suke la laka ombeki ayɛ, shi wɛ kokaka ntshɔ towenda lo tshena pe ko mbêyanya opandjudi wakatombi la yɛ? Naka kokaka, kete kɔsɛngɔlake apandjudi wotshikitanyi, mbidja ndo dikumanyi, dia vɔ kotshindɛ dia tɔlɔmbɔla wekelo. Ndo nto, l’ɔkɔngɔ wa nyu mbokana dia mbekaka, keketsha ombeki ayɛ wa Bible dia nde mbɔtɔka lo nsanganya yasalema lo Mbalasa ka Diolelo. Kɛsɔ ayowokimanyiya dia nde monga la diɔtɔnganelo dia dimɛna l’anto wa l’etshumanelo wakoka ndjonga ase nkumbo kande ka lo nyuma.—Mako 10:29, 30; Heb. 10:24, 25.
4. Ɛtshɔkɔ akɔna wakokaso nkondja naka sho monga l’etete?
4 Ombutshi wakimanyiya anande lo nyuma l’etete tɔngɛnangɛnaka otamanya etena ketawɔ lo wedi wa Jehowa ndo kakɛndakɛndawɔ l’akambo wa mɛtɛ. (3 Joa. 4) Sho kokaka monga la woho w’ɔngɛnɔngɛnɔ wa ngasɔ etena kakimɔso nsɛnɔ yaso lo wahɔ w’ambeki aso wa Bible.