Onde wɛ ekɔ suke dia membɛ Jehowa lo nsanganya yaso?
1 Ndjalɔngɔsɔla dia ndjɔtɛkɛta lo nsanganya yaso mendanaka ndo la ndjalɔngɔsɔla dia memba esambo wa lotombo. Tende alako wayela anɛ.
2 Shihodia esambo dimɛna: Divɛsa diɔsami osambo ndo avɛsa akina wele l’ekomelo k’osambo tshɛ kimanyiyaka dia mbika epole ɔsɛkɛ lo avɛsa wɔsami osambo.
3 Eka woho wa memba: Nyu kokaka nkamba lomingu tshɛ la etenyi kɛmɔtshi ka Ɔtɛmwɛlɔ wa lo nkumbo dia mbekaka esambo w’eyoyo. Nyembe l’ekimanyielo ka mishiki wakadjama lo piano wayokambaka la so l’oseka losanganya tshɛ. Nyu kokaka mbeka ngɛngu ndo ɛtɛkɛta w’esambo w’eyoyo ɛmɔtshi lo mpokamɛ esambo wakembama lo Tembe Jehowa—Esambo wa lemba l’onyɔ, Dɔnga 1.
4 Onde wɛ ayonga suke dia memba esambo lo nkamba la dibuku di’oyoyo Tembe Jehowa, etena kayotodilongola l’etshumanelo kaso? Wɛ ayokoka memba naka wɛ ntshungola etena ka nshihodia dimɛna kitshimudi y’esambo ndo wɛ mbeka woho wa memba.