Onde wɛ ambokambaka la lohoso la l’ɔkɔngɔ la periodikɛ?

Etena kalongola anto periodikɛ, mbala efula vɔ mbokaka sso lo lohoso la ntondo ndo la l’ɔkɔngɔ la periodikɛ. Lohoso la l’ɔkɔngɔ la Tshoto y’Etangelo y’anto tshɛ lekɔ la ambola w’amɛna wakotola yambalo y’anto, ditelo ndo numɛlɔ ya ndjɛkɛ yɛnya lɛnɛ akoka onto ntana elembetshielo wa ambola kana wa ditelo diakɔ.

Sho kokaka nkamba la lohoso la l’ɔkɔngɔ la periodikɛ dia nkondja tokanyi t’ɛlɔlɔ tendana la ambola wakokaso nkamba la wɔ dia ntatshiya sawo. Naka sho kindjakindjaka ɛtshi kaso ka nkɛtɛ mbala efula, kete tayokoka nkamba la mbɔtwɛlɔ yotshikitanyi l’edja ka ngɔndɔ k’otondo. Naka ompokami aso ekɔ la wesanu, kete sho kokaka nsusa mbɔtwɛlɔ kaso lo mbɛnya dimbola dimɔtshi l’atei wa ambola wele lo lohoso la l’ɔkɔngɔ la periodikɛ, ko sho mbotɛ ɔnɛ: “Naka wɛ nangaka nkondja ekadimwelo, dimi kokaka kotshikɛ periodikɛ nyɛ ndo sho kokaka ndjosawola kambe mbala kekina kayoyokondja diaaso.” Apandjudi amɔtshi kokaka mɛna ɔlɔlɔ ntatshiya sawo lo mɛnya ompokami ande awui wele lo lohoso la l’ɔkɔngɔ la periodikɛ ndo mbɔlɔmba dia nde nsɔna dimbola dimɔtshi di’ɔngɛnyangɛnya. Oma lâsɔ, ko vɔ mbufola lo lɛkɛ latanema okadimwelo ndo mbadia divɛsa diakawatasɔnyi. Ondo wɛ kokaka nkanyiya toho tokina takokayɛ nkamba la lohoso la l’ɔkɔngɔ la periodikɛ dia nomialomia nsaki y’anto oya lo Tshoto y’Etangelo.