“Tuwaukaki woma”

1. Naa ekakatanu wafɔna la waki Jeremiya wakoka mpomana la so ɛlɔ kɛnɛ?

¹ Etena kakandasɔnama dia monga ɔprɔfɛta, Jeremiya akayaoke dia nde komonga la akoka. Koko Jehowa akoshikikɛ ate: “Tuwaukaki woma” ndo nde akokeketsha la ngandji tshɛ dia nde nkotsha ɔkɛndɛ ande. (Jer. 1:6-10) Lo nshi yaso nyɛ, ɔsɔnyi kana wɔma kokaka todjɛ wekamu diaha sho nsambisha dimɛna. Wɔma wa woho wayɔsa anto losango la so ndo wa woho wayowotɔsa koka tokaloya ɛkɔngɔkɔngɔ lo tena dimɔtshi. Ngande wakokaso minya wɔma ɔsɔ ndo ɛtshɔkɔ akɔna wayotokondja lo nsala ngasɔ?

2. Ngande wakoka ndjalɔngɔsɔla tokimanyiya dia nkitshakitsha wɔma wele la so l’esambishelo?

² Toyalɔngɔsɔlɛ la ntondo: Ndjalɔngɔsɔla dimɛna koka tokimanyiya efula dia nkitshakitsha wɔma aso. Ɛnyɛlɔ, naka sho tasɛdingodi la ntondo wekamu wakoka mpomana la so, kete tayɔlɔngɔswama dimɛna dia mbekola wekamu waleka mpomana la so. (Tuk. 15:28) L’etena kasalanyu Ɔtɛmwɛlɔ wa lo nkumbo, lande na kahanyasale tɔkɛnyɔ tɛnya woho wa nkandola ekakatanu wotshikitanyi wa la kalasa kana wa l’esambishelo?​—1 Pet. 3: 15.

3. Ngande wele ndjaɛkɛ le Jehowa tokimanyiyaka dia sho minya wɔma?

³ Toyaɛkɛ le Jehowa: Ndjaɛkɛ le Nzambi ayotokimanyiya dia sho minya wɔma. Jehowa toshikikɛka dia nde ayotokimanyiya. (Is. 41:10-13) Shi ɔsɔ mɛtɛ ekɔ ekokelo ka woke? Lâdiko dia lâsɔ, Yeso akatoshikikɛ dia kânga etena katokomɛ akambo wa wanyandja, nyuma k’ekila kaki Nzambi kayotokimanyiya dia sho nsambisha lo yoho ya dimɛna. (Mako 13:11) Ɔnkɔnɛ, tɔlɔmbake Jehowa nyuma kande k’ekila mbala la mbala.​—Luka 11:13.

4. Ɛtshɔkɔ akɔna wakondjaso lo ntetemala nsambisha kânga l’atei w’ekakatanu?

⁴ Ɛtshɔkɔ wayotokondja: Naka sho ntetemala nsambisha kânga l’atei w’ekakatanu, kete dui sɔ diayotokeketsha dia sho ndjotokomɛ dimɛna ekakatanu wa lo nshi yayaye. Tayonga la dihonga, dionga diele l’anto wambolodiama la nyuma k’ekila. (Etsha 4:31) Ndo nto, etena kanyaso wɔma wele la so l’ekimanyielo ka Jehowa, sho keketshaka mbetawɔ kaso ndo ɛkamelo kaso lo wolo wele la nde wa toshimbɛ. (Is. 33:2) Tayonga l’ɔlɔ ndo la ɔngɛnɔngɛnɔ waya lo mbeya dia tekɔ lo ngɛnyangɛnya Shɛso lele l’olongo. (1 Pet. 4:13, 14) Ɔnkɔnɛ, tatokake wɔma dia mbewoya losango la Diolelo la dihonga ndo toyaɛkɛke nshi tshɛ lo ekimanyielo kaki Jehowa.