Onde wɛ koka mbidja welo dia nkimanyiya
olonganyi ɔmɔtshi wele bu ombetawudi?
1. Lande na kele aha paka Akristo wele lo nkumbo yatɔnyi l’awui w’ɔtɛmwɛlɔ ato mbahomba ndjasha dia nkimanyiya elonganyi awɔ wele bu ambetawudi dia mbetawɔ akambo wa mɛtɛ?
1 Onde apandjudi amɔtshi wa l’etshumanelo kanyu wekɔ la elonganyi wele bu ambetawudi? Naka eelo, kete aha la tâmu vɔ kombolaka dia elonganyi awɔ monga la wɔ kâmɛ lo ɔtɛmwɛlɔ wa mɛtɛ. Koko aha vɔ ato mbakombola dikambo sɔ. L’ɛnyɛlɔ kaki Nzambi, etshumanelo k’otondo nangaka dia “antu tshe nshimbamela ndu nkuma lu ewu ka mete.” (1 Tim. 2:4) Ngande wakokaso nsala la wolo dia nkimanyiya elonganyi wele bu ambetawudi wotshukanyi l’apandjudi wa lo etshumanelo kaso?
2. Ngande wele monga la shɛnɔdi ayotokimanyiya dia sho nkimanyiya olonganyi wele bu ombetawudi?
2 Ntondotondo, tosale la wolo dia mɛna akambo woho wawaɛna olonganyi wele bu ombetawudi. Elonganyi efula wele bu ambetawudi mbokaka nkumbo yawɔ ngandji, salaka la wolo dia monga elonganyi kana ambutshi w’ɛlɔlɔ. Ondo vɔ wekɔ la awui w’ɔtɛmwɛlɔ wetawɔwɔ l’otema ɔtɔi wotshikitanyi l’awui wetawɔso. Mbala mɔtshi ko haweye awui efula wendana la Ɛmɛnyi wa Jehowa lâdiko di’awui wa kashi wakawatɛ angɛnyi awɔ lo dikambo diaso. Amɔtshi momalaka l’ɔtɛ wele elonganyi awɔ wetsha wenya wakawetshaka kâmɛ lo nkumbo lo awui w’ɔtɛmwɛlɔ. Shɛnɔdi yayotokimanyiya dia salɛ onto lele bu ombetawudi akambo la ngandji, la dilɛmiɛlɔ ndo mbewɔ dia momalaka tshanana etena keso lalende.—Tuk. 16:20-23.
3. Naa yoho yoleki dimɛna ya nkotola olonganyi wele bu ombetawudi oya l’akambo wa mɛtɛ?
3 Toyasha le nde: L’etatelo, yoho yoleki dimɛna ya nkotola olonganyi wele bu ombetawudi oya l’akambo wa mɛtɛ mbeyaka monga oma l’etsha aso, koko aha oma lo sawo di’awui wa lo Bible. (1 Pet. 3:1, 2) Kɛnɛ koleki ohomba lo dikambo sɔ ele ndjasha le nde. Akadiyɛso wa l’etshumanelo kokaka ndjasha le olonganyi wa womoto wele bu ombetawudi ndo anangɛso le olonganyi wa pami wele bu ombetawudi. Lo yoho yakɔna na?
4. Ngande wakokaso ndjasha le olonganyi wele bu ombetawudi?
4 Naka wɛ atasawolaka l’olonganyi ɔmɔtshi wele bu ombetawudi, kete wɛ koka nsala dui sɔ l’ɔkɔngɔ wa wɛ nsawola l’olonganyi ande wele Okristo. Tɔkɔmɔke naka mbala ka ntondo olonganyi wele bu ombetawudi hakolongodi dimɛna. Woho wayotoyasha le nde la lɔngɛnyi tshɛ koka mbotshutshuya dia nde ndeka monga la kanyi y’ɔlɔlɔ le Ɛmɛnyi wa Jehowa. (Romo 12:20) Akristo amɔtshi wambotshunda wakelɛ olonganyi ɔmɔtshi wele bu ombetawudi la nkumbo kande dia tosanga la wɔ lonya la midi l’oyango wa ndeka mbekesanɛ la wɔ ndo mbakimanyiya dia minya dikanyiyakanyiya tshɛ diakoka monga la wɔ lo dikambo diaso. Vɔ wakasawola la wɔ lo awui wayashawɔ lo dihole dia tɔlɔnganya sawo paka l’awui wa lo nyuma. L’ɔkɔngɔ wa sho mbekesanɛ l’olonganyi wele bu ombetawudi sho mbeyaka ndjosawola la nde awui wa l’Afundelo. Kana nde kokaka mbetawɔ dia ndja lo losanganya laso lɔmɔtshi dia ndjoka kɛnɛ ketshama wadɛnde, djekoleko naka nde okeyaka anto amɔtshi wa lo etshumanelo. Oyadi nde bu suke dia mbeka akambo wa mɛtɛ, nde kokaka mandɔma lo woho wasukɛnde olonganyi ande wele ombetawudi.
5. Ngande wakoka dikumanyi nkimanyiya olonganyi wele bu ombetawudi?
5 Dikumanyi mbahomba ndeka nsala la wolo dia nkimanyiya elonganyi wele bu ambetawudi ndo monga suke dia nkamba la waaso wakondjawɔ dia mbâsambisha. Olonganyi wele bu ombetawudi wakatonaka awui wa lo Bible mbeyaka ndjetawɔ ekeketshelo k’oma lo Bible etena kende lo lopitadi kana kende la ekakatanu wa wolo wendana la yônge. Naka nkumbo kambatɔna l’awui w’ɔtɛmwɛlɔ kekɔ la okakatanu wa wolo, ɛnyɛlɔ nyɔi k’ose nkumbo ɔmɔtshi, kete dikumanyi mbeyaka mbelɛ olonganyi wele bu ombetawudi dia nde monga lawɔ etena kakeketshawɔ ase nkumbo kɛsɔ.
6. Naa ɛkɔkɔ wele la so wa mbidja welo dia nkimanyiya elonganyi wele bu ambetawudi?
6 Ande ɔngɛnɔngɛnɔ wayonga l’Okristo ɔmɔtshi wa lo etshumanelo kaso naka olonganyi ande ambetawɔ akambo wa mɛtɛ lee! Dui sɔ diayɔngɛnyangɛnya Jehowa efula kâmɛ ndo andjelo la ase etshumanelo akina. (Luka 15:7, 10) Koko, naka l’etatelo olonganyi wele bu ombetawudi ekɔ la wendjudi, sho koka ntetemala ngɛnangɛna lo mbeya dia welo wadjaso ngɛnyangɛnyaka Jehowa “[la]halangi nduku omotshi nshisho, keli ndi nangaka tshe wakadimuli etema.”—2 Pet. 3:9.
[Efundelo wa l’etei w’odingɔ wa lo lɛkɛ 6]
L’etatelo, yoho yoleki dimɛna ya nkotola olonganyi wele bu ombetawudi oya l’akambo wa mɛtɛ mbeyaka monga oma l’etsha aso, koko aha oma lo sawo di’awui wa lo Bible