Tokambake la tɔ lo diaaso tshɛ
1. Traktɛ Mbeya akambo wa mɛtɛ tokimanyiyaka dia nsala na?
1 Traktɛ kele l’ɔtɛ a dui ɔnɛ: Onde wɛ nangaka mbeya akambo wa mɛtɛ? kakatondjama dia tokimanyiya dia ntatɛ mbeka l’anto Bible. Koko tɔ kekɔ nto ehomɔ ka dimɛna efula kakokaso kamba la tɔ dia dianganya ntɔngɔ y’akambo wa mɛtɛ. (Und. 11:6) Alako amɔtshi wele lanɛ l’ɛse kokaka tokimanyiya dia nkamba la traktɛ kɛsɔ dimɛna.
2. Ngande wakokaso nkamba la traktɛ dia ntatshiya sawo?
2 Dia ntatshiya sawo: Wɛ kokaka mbisha ompokami ayɛ traktɛ kakɔ, mbɛnya ambola asamalo wele lo lɛkɛ l’etatelo ndo mbombola ɔnɛ: “Lo ambola anɛ, diakɔna diele wɛ amboyaokaka?” L’ɔkɔngɔ wa nde kokadimola, nyɔsɛdingole okadimwelo wele lo traktɛ washa Bible lo dimbola diakandasɔnyi ndo adia divɛsa dimɔtshi dioshilami. Adia kana lembetshiyande lo tshena pe awui wele lo lɛkɛ l’ekomelo la traktɛ ndo shande dibuku Bible etshatɔ. Kânga nde hetawe dibuku, ka nde akalongodi traktɛ kayowokimanyiya di’akambo wa mɛtɛ mpika edio l’otema ande.—Mat. 13:23.
3. Naka ompokami aso ekɔ la wesanu, kakɔna kakokaso nsala?
3 Naka ompokami aso ekɔ la wesanu: Wɛ kokaka mbotɛ ɔnɛ: “Lam’ele wɛ eke la wesanu, dimi nangaka kotshikɛ traktɛ kɛnɛ. Tɔ kekɔ la ambola asamalo wamboyaokaka efula l’atei aso ndo tɔ mbishaka ekadimwelo w’oma lo Bible wasembɔ tɔɔ lo dikambo lo dimbola la dimbola. Lam’ayomoya dia ndjokenda mbala kekina, layolanga mbeya kanyi yayɛ lo ambola asɔ.”
4. Kakɔna kakokaso mbuta etena kashaso onto traktɛ l’esambishelo ka lo toshinga?
4 Etena katatasambisha lo toshinga: Wɛ kokaka mbuta ɔnɛ: “He mɔyɔ! Onde wɛ atayaokaka dimbola dimɔtshi lo ambola anɛ? [Tshikande akadimole.] Traktɛ kɛnɛ mbishaka ekadimwelo wokɛma hwe, w’amɛna w’oma lo Bible.” Naka onto bu prɛse, kete wɛ mbeyaka kɛtshanya la nde okadimwelo ɔmɔtshi wele lo traktɛ ndo kânga mbosha dibuku Bible etshatɔ.
5. Ngande wakokaso nkamba la traktɛ kɛnɛ tena la tena naka hatotanyi anto lawakawɔ?
5 Naka anto bu lawakawɔ: Lo bɛtshi dimɔtshi dia nkɛtɛ, mbala efula apandjudi tshikɛka anto wele bu lawakawɔ traktɛ lo dihole diahakoke ambetshetshi mɛna. Naka etshumanelo kanyu kekɔ la mbekelo kɛsɔ, shi kete nyu kokaka mbatshikɛka ndo traktɛ Mbeya akambo wa mɛtɛ mbala la mbala? Etena kayoyokalola wɛ kokaka mbuta ɔnɛ: “Etena kakatasambisha lanɛ, wɛ komonga la ngelo, lâsɔ takakotshikɛ traktɛ kɛnɛ la soko diayɛ. L’atei wa ambola anɛ, diakɔna diakombolayɛ nkondja okadimwelo?”
6. Kakɔna ketɛ traktɛ Mbeya akambo wa mɛtɛ ehomɔ ka dimɛna efula l’olimu w’esambishelo?
6 Traktɛ Mbeya akambo wa mɛtɛ mbewoyaka akambo wa mɛtɛ lo yoho ya wɔdu ndo yasembɔ tɔɔ lo dikambo. Tɔ ngɛnyangɛnyaka anto wa l’ɛtɛmwɛlɔ ndo wa l’ahole tshɛ. Tɔ bu wolo mbisha anto ndo oyadi akɛnda kana apandjudi w’eyoyo kokaka kisha anto. Onde wɛ kambaka la tɔ lo diaaso tshɛ di’ɔlɔlɔ?