Ekadimwelo lo ambola anyu

◼ Atɔndɔ akɔna wa lo Bible wakoka tokimanyiya lo kɛnɛ kendana l’okambelo wa la telefɔnɛ etena keso lo nsanganya y’Akristo kana l’esambishelo?

“Engo tshe keko la etena kato.” (Und. 3:1): Telefɔnɛ ekɔ ehomɔ kakimanyiya anto efula dia vɔ nsawola l’anto akina, fundanɛ la wɔ mesajɛ wonya tshɛ walangawɔ. Koko, ekɔ tena dimɔtshi diahahombe Akristo mbetawɔ fukutanyema la telefɔnɛ yawɔ. Ɛnyɛlɔ, etena keso lo nsanganya yaso, ɔsɔ ekɔ etena katɛmɔlaso Jehowa, kalongolaso wetshelo wa lo nyuma, ndo kakeketshanaso lo nyuma. (Euh. 31:12; Osam. 22:22; Rɔmɔ 1:11, 12) Laasɔ, onde hatokoke nyimaka telefɔnɛ yaso etena keso lo nsanganya, ko ndjoyidiholaka l’ɔkɔngɔ wa nsanganya? Ko naka tekɔ la dui dimɔtshi dia wanyandja dialɔmba dia paka sho ntshika telefɔnɛ hwe, kete sho pombaka mbidja l’adidimu diaha mfukutanya anangɛso l’akadiyɛso akina.

‘Tosalake akambo tshɛ lo wahɔ wa lokumu l’ɔlɔlɔ.’ (1 Kɔr. 9:23): Lo tena dimɔtshi, telefɔnɛ kekɔ nto ohomba l’olimu w’esambishelo. Ɛnyɛlɔ, ɔnangɛsɔ lalɔmbɔla losanganya l’otsha l’esambishelo koka nkamba la tɔ dia mbeya ahole amɔtshi wa l’ɛtshi kaso ka nkɛtɛ wahombaso ntshɔ tosambisha. Apandjudi vɔ lawɔ kokaka nkamba la telefɔnɛ lo tena dimɔtshi dia mbutɛ onto ɔmɔtshi lɛnya nsaki kana ombeki wa Bible ɔnɛ tekɔ lo ndjaye, djekoleko naka onto akɔ mbidjasɛ dihole di’etale. Ɔnkɔnɛ, naka tekɔ la telefɔnɛ, kete sho pombaka mbɔsa tɛdikɔ tahombama diaha tɔ tofukutanya etena kekaso l’onto ɔmɔtshi Bible. (2 Kɔr. 6:3) Etena kalɔmbɔla onto lakatombi la so l’esambishelo wekelo wa Bible kana kasambishande onto ɔmɔtshi, lo dihole dia sho ntatɛ mbelɛ angɛnyi aso kana mbafundɛ mesajɛ, shi ayoleka dimɛna sho mbidja yimba l’olimu w’esambishelo kaamɛ la ɔnɛ lakatombi la so?

Tendake ndo wahɔ w’anto akina. (1 Kɔr. 10:24; Fil. 2:4): Hatohombe pondjo mɔnyɔla tena diasalema nsanganya y’otsha l’olimu w’esambishelo, lo monga la kanyi y’ɔnɛ naka lambokoma l’ɔkɔngɔ, kete layotelefɔnɛ kana layofundɛ ɔnangɛso ɔmɔtshi mesajɛ dia dimi mbeya lɛkɛ lahombami ntshɔ dia tosambisha. Sho pombaka mbidja yimba lo dikambo sɔ, nɛ dia naka tambokoma l’ɔkɔngɔ, kete kɛsɔ mbeyaka nɔmba dia paka ntshikitanya anto. Eelo mɛtɛ, ekɔ akambo amɔtshi wakoka ndjotokonya l’ɔkɔngɔ. Koko, naka sho ndjadjɛ oyango wa komaka la wonya lo nsanganya y’otsha l’esambishelo, kete tayɛnya dia sho nɛmiyaka tɛdikɔ takɔshi Jehowa, anangɛso watɔlɔmbɔla, ndo asekaso ambetawudi.