Naa ɛkɔkɔ watotshutshuya dia nsambisha?
1. Diɔtɔnganelo diakɔna diele lam’asa ngandji la olimu aso w’esambishelo?
1 Nsambisha lokumu l’ɔlɔlɔ la Diolelo diaki Nzambi ekɔ olimu woleki dimɛna efula wakokaso nkamba ɛlɔ kɛnɛ. Lo mɛtɛ, lo nkamba olimu ɔsɔ, sho mɛnyaka dia sho kitanyiyaka wadjango ahende woleki weke, mbuta ate ngandji kokaso Jehowa ndo wonyaso onto. (Makɔ 12:29-31) Ngandji mbatotshutshuya dia sho monga l’ohetoheto l’olimu w’esambishelo.—1 Jni. 5:3.
2. Ngande wɛnyaso ngandji kokaso Jehowa oma l’esambishelo kaso?
2 Ngandji kokaso Jehowa: Ngandji kokaso ɔngɛnyi aso woleki woke Jehowa, totshutshuyaka dia sho nsambisha akambo wendana la nde. Aya ɛnɔnyi suke la 6 000 wambɔnywama Nzambi oma le Satana. (2 Kɔr. 4:3, 4) Diakɔ diafɔnya anto efula ɔnɛ Nzambi soyaka atshi wa pɛkato lo dja ya pondjo, ekɔ Losato l’osanto, ndo ɔnɛ nde hayakiyanya dikambo di’asui w’anto. Anto amɔtshi wamboyokoma polo lo mbuta ɔnɛ Nzambi bu. Ande woho wakombolaso di’anto asɔ tshɛ mbeya akambo wa mɛtɛ wendana la Shɛso lele l’olongo lee! Welo wa l’otema ɔtɔi wadjaso dia mbewoya anto akina akambo wendana la Nzambi mboshaka ɔngɛnɔngɛnɔ w’efula ndo dui sɔ mbishaka Satana sɔnyi.—Tuk. 27:11; Hɛb. 13:15, 16.
3. Ngande wakokaso mɛnya ngandji kokaso wonyaso onto oma l’esambishelo kaso?
3 Ngandji kokaso wonyaso onto: Etena tshɛ kasambishaso onto ɔmɔtshi, sho mɛnyaka ngandji kawokaso. Anto efula wambɔkɔmɔ ngɛnangɛnaka mboka nkumu y’ɛlɔlɔ lo nshi ya paa nyɛ. Efula l’atei awɔ wekɔ oko ase Niniva wa lo nshi y’omvutshi Jɔna ‘waki kombeyaka ntshikitanya lonya lawɔ l’omi kana la lɔmɔsɔ.’ (Jona 4:11) Olimu aso w’esambishelo mbetshaka anto woho wa monga la lɔsɛnɔ l’ɔngɛnɔngɛnɔ ndo wa ntondoya lo nsɛnɔ yawɔ. (Is. 48:17-19) Lɔ mbashaka elongamelo. (Rɔmɔ 15:4) Naka vɔ mpokamɛ ndo nkamba la kɛnɛ kekawɔ, kete vɔ “[w]ayoshimbamɛ.”—Rɔmɔ 10:13, 14.
4. Kakɔna kele Jehowa hohɛki pondjo?
4 Ana wele l’okitanyiya hawɛnya ngandji kokawɔ ambutshi awɔ paka lo waaso amɔtshi ato. Vɔ mbaokaka ngandji tena tshɛ. Woho akɔ waamɛ mbele, ngandji k’efula kokaso Nzambi ndo wonyaso onto kayototshutshuya dia sho nkambaka la diaaso tshɛ diakokaso nkondja dia nsambisha, koko aha sambishaka tsho paka lo nshi yakakongɛ etshumanelo kaso. Ndo nto, tayotetemala nsambisha aha la mpekɔ. (Etsha 5:42) Kɛnɛ koleki ele, Jehowa hohɛki ngandji kaso pondjo.—Hɛb. 6:10.