Onde wɛ ekɔ suke dia nsala etshikitanu?
1. Etshikitanu wasalema l’andja ɔnɛ tɔlɔmbaka dia sho nsala etshikitanu l’akambo akɔna?
1 Lo 1 Kɔrɛtɔ 7:31, Bible mbɛdikaka andja ɔnɛ la kɛnyɔ mɔtshi yele akɛnyi wa lɔkɔ mengengɔka mbala la mbala. Etshikitanu wasalema l’andja ɔnɛ nɔmbaka dia ndo sho lawɔ salaka etshikitanu mbala la mbala wendana la toho taso ta nsambisha, la ekongelo kaso ndo la mbekelo yaso. Onde wɛ ekɔ suke dia nsala etshikitanu?
2. Lande na kahombaso nsala etshikitanu l’oyango wa nkɛndakɛnda kaamɛ l’okongamelo?
2 Toho tayɛ ta nsambisha: Tena tshɛ, etshumanelo k’Akristo salaka etshikitanu. Etena kakatome Yeso ambeki ande mbala ka ntondo dia tosambisha, nde akawatɛ diaha vɔ ntɔla atapa wa mbo ya ndɛ kana totapatapa ta falanga. (Mat. 10:9, 10) Koko l’ɔkɔngɔ diko, nde akayotshikitanyaka dako sɔ, nɛ dia nde akeyaka dia ambeki ande wakahombe mpomana la wendjudi ndo olimu w’esambishelo wakahombe kokanɛ lo bɛtshi dikina dia nkɛtɛ. (Luka 22:36) Lo ntambe kakete, okongamelo wa Jehowa wakakambe la toho t’esambishelo totshikitanyi. Ɛnyɛlɔ, mpakatɛ efundelo washa losango, nsambisha lo aradiyo ndo nkamba la mituka waki la wɛɛndjɔ lo ndjela ehomba wa lo nshi shɔ. Lam’ele nshi nyɛ anto efula hawoyoleka tanema lawakawɔ, okongamelo wamboleka mɛnya ohomba wa salaka esambishelo ka lo sɛkɛ ndo ka lo tshakitudi l’ahole watanema anto efula kaamɛ l’esambishelo ka lo luudu la luudu. Tekɔ lo keketshama nto dia sambishaka lo luudu la luudu lo wenya w’akɔlɔ naka anto wa l’ɛtshi kaso ka nkɛtɛ tshɔɔka l’elimu la yanyi. Lam’ele pusupusu ka Jehowa ka l’olongo kekɔ lo takɛndakɛnda, onde wɛ ekɔ lo ntetemala kiyela lɛnɛ tshɛ atshɔtɔ?—Ezek. 1:20, 21.
3. Ngande wele monga suke dia nsala etshikitanu tokimanyiyaka dia monga esambisha wa tomanamana lo ɛtshi kaso ka nkɛtɛ?
3 Mbɔtwɛlɔ kayɛ: Lo akambo akɔna waleka anto wa l’’ɛtshi kayɛ ka nkɛtɛ ndjasha lɔkɔ? Lo awui w’okanda? Awui wa nkumbo? Awui w’ata? Ekɔ ohomba mbeya awui waleka salema ndo ekakatanu wahomana l’anto wa l’ɛtshi kaso ka nkɛtɛ l’oyango wa sho nsala mbɔtwɛlɔ yahombama. (1 Kɔr. 9:20-23) Etena katɔkɛnɛmɔlɛ ompokami aso kanyi yande lo dui dimɔtshi, lo dihole dia sho ntɛkɛta akambo efula ndo kalolɛ paka mbɔtwɛlɔ kaso, shi ayoleka dimɛna kitshikitanya dia kiɔtɔnganyiya l’ekiyanu ande?
4. Lande na kahombaso nsala etshikitanu aha la ntshimbatshimba?
4 Kem’edja, etenyi k’ekomelo ka ‘kɛnyɔ’ ya l’andja ɔnɛ kayanga nkomɛ ndo mfɔnu ka woke kayanga ntatɛ. “Etena kambotshikala kambosusama.” (1 Kɔr. 7:29) Ɔnkɔnɛ, ekɔ mɛtɛ ohomba efula dia sho monga suke dia nsala etshikitanu aha la ntshimbatshimba dia nkamba efula la etena kambototshikalɛ.