Asawo w’ohomba wayotokimanyiyaka l’esambishelo
1. Naa eyango ehende wele l’asawo wele l’ɔtɛ a dui ɔnɛ: “Sawo kaamɛ l’osukanyi ɔmɔtshi”?
1 Mbala la mbala Tshoto y’Etangelo y’anto tshɛ mongaka l’asawo wele l’ɔtɛ a dui ɔnɛ: “Sawo kaamɛ l’osukanyi ɔmɔtshi.” Asawo asɔ wekɔ l’eyango ehende ɛnɛ: Tokimanyiya dia mbetsha awui wa lo Bible lo yoho yangɛnyangɛnya anto ndo tɛnya woho wakokaso nkana l’onto yimba lo awui amɔtshi l’ɔkɔmi tshɛ. (1 Pet. 3:15) Ngande wakokaso nkamba la asawo asɔ dimɛna?
2. Ngande wakokaso nkamba l’asawo anɛ l’esambishelo?
2 Kamba la wɔ l’esambishelo: Wɛ koka nama numɛlɔ ya Tshoto y’Etangelo yele la sawo dia ngasɔ yakiyɛ kombisha anto. Naka ompokami, onto ɔmɔtshi layasha kana ombeki wa Bible ambokoka dimbola kana ambonyiya wekamu wakatɛkɛtama lo sawo dimɔtshi l’atei wa asawo asɔ, ko wɛ mbosha numɛlɔ kɛmɔtshi ndo nkɛtshanya la nde awui wele lo sawo diakɔ. Naka wɛ bu la numɛlɔ ka periodikɛ kele la sawo diakɔ, kete wɛ koka kitelesharjɛ lo jw.org.
3. Ngande wakokaso nkɛtshanya l’onto awui wele lo asawo anɛ?
3 Ngande wakokayɛ nkɛtshanya l’onto awui wele lo asawo anɛ? Apandjudi amɔtshi nɔmbaka onto okina dia nde taadiaka awui waki osukanyi la dui dia wolo, ko vɔamɛ taadiaka awui waki Ɔmɛnyi wa Jehowa. Onto la sato lataadia awui akɔ koka ndjokotwama nɛ dia dui sɔ mboshaka diaaso dia nde nsɛdingola dietawɔ diaso lo yoho yahawomadja.—Euh. 32:2.
4. Ngande wakokaso nkamba l’asawo anɛ dia ndjalowanya?
4 Yalowanya ndo lowanya anto akina: Etena katayadia asawo akɔ, kotadjaka yimba lo avɛsa, bɛnyɛlɔ ndo awui wakimanyiya dia nkana l’onto yimba. Lembetɛ wondjo wa dui wokambi la wɔ lo sawo diakɔ. Oma laasɔ, hemba yoho yakɔ l’esambishelo. (Tuk. 1:5; 9:9) Kadiyɛso kɛmɔtshi akate ate: “Mbadia awui wa lo asawo asɔ ekɔ oko onto letshama oma le ombatshi mboka wa manamana, wokeyaka dui dia dimɛna diakokande mbuta.”
5. Ngande wakokaso nkimanyiya ambeki aso wa Bible dia ndjalɔngɔsɔla dia tosambisha?
5 Wɛ koka nkamba nto la bɛnyɛlɔ diele lɔkɔ dia nkimanyia ombeki ayɛ wa Bible dia nde ndjalɔngɔsɔla dia tosambisha. Nyadɛ awui wele lɔkɔ wɛ la nde, ombeki onge lo dihole dia opandjudi. Lo nsala ngasɔ ambeki wa Bible mbeyaka ntatɛ mbewoya anto akina dietawɔ diawɔ l’ɔkɔmi tshɛ. (Kɔl. 4:6) Lo mɛtɛ asawo anɛ wekɔ l’atei wa toho efula tatokimanyiya Jehowa dia sho ‘nkotsha olimu aso’ w’esambishelo dimɛna.—2 Tim. 4:5.