Woho wa nɔngɔsɔla mbɔtwɛlɔ y’amɛna
1. Naa ohomba wa nkamba la mbɔtwɛlɔ y’amɛna?
1 Oko watowodjaka lo mbo ya ndɛ diangɔ diasha onto nsaki ka nde ndɛ kaanga atatatɛ ndɛ, mbele mbɔtwɛlɔ ka dimɛna kimanyiyaka dia tatshiya ɔkɛtshanyelo wa dimɛna w’awui wa l’Afundelo. Mbɔtwɛlɔ y’amɛna mbeyaka ntshikitana oma l’etale ayɔ ndo lo ndjela awui wele lɔkɔ, koko l’ɛnyɛlɔ ka mbo ya ndɛ yasha onto nsaki, ekɔ ohomba tena tshɛ dia takanyi yimba la ntondo ndo ndjilɔngɔsɔlaka. (Tuk. 15:28) Kakɔna ketɛ mbɔtwɛlɔ kɛmɔtshi dimɛna?
2. Lande na kahombaso nɔngɔsɔlaka mbɔtwɛlɔ kangɛnyangɛnya anto?
2 Sɔna asawo wayɔngɛnyangɛnya anto: Mbɔtwɛlɔ kaso koka nkotola yambalo y’onto kana mbokonya dia mpembola sawo. Diakɔ diele etena kayilɔngɔsɔlaso, sho pombaka nkana yimba lo awui wakoka ngɛnyangɛnya anto wa l’ɛtshi kaso ka nkɛtɛ. Onde vɔ ngɛnangɛnaka nsawola awui wendana la lowandji la dimɛna, woho wa monga l’ɔngɛnangɛnɔ lo nkumbo kana di’ata nkomɛ? Anto lo tshɛ kawɔ kombolaka mbisha tokanyi tawɔ, diakɔ diele sho pombaka nɔngɔsɔla ambola wayowatshutshuya dia vɔ mbisha tokanyi. Shi sho koka nkamba la mbɔtwɛlɔ ya wɔdu yele lo Olimu aso wa Diolelo ndo ndjiɔtɔnganyiya l’anto wa l’ɛtshi kaso ka nkɛtɛ? Shi sho koka pembaka dia nkamba la mbɔtwɛlɔ mɔtshi etena kasalaso Ɔtɛmwɛlɔ wa lo nkumbo wa la dikɔlɔ?
3. Ngande wakokaso mbɔtɔnganyiya mbɔtwɛlɔ kaso lo ndjela mbekelo ndo ahole wasɛna anto wa l’ɛtshi kaso ka nkɛtɛ?
3 Dja yimba lo mbekelo ndo lo ahole wasɛna anto: Lo ahole amɔtshi, etena katshɔyɛ tembola onto, wɛ pombaka mbotɛ aha la ntshimbatshimba lande na kotshweyɛ dia towembola. Lo ahole akina, naka onto loye dia ndjembola onto hambodi onto akɔ ntondo dia mbeya woho wende kana mbolembetshiya awui amɔtshi wendana la nde, kete wayowɔsa dia nde keema la loshilambo. Lo ahole wayasha anto lo awui w’ɔtɛmwɛlɔ, sho koka nkamba la Bible mbala kakɔ ɔtɔi lo mbɔtwɛlɔ kaso. (Ets. 2:14-17) Koko, lo ahole wele ɛtɛmwɛlɔ wele bu w’Akristo, kana wele ndooko ɔtɛmwɛlɔ, ayoleka dimɛna sho ndjokamba la Bible lo wendelo w’oyoyo lo dihole dia nkamba la tɔ mbala ka ntondo kahomanaso l’onto.—Ets. 17:22-31.
4. Ahombaso nsala lo kɛnɛ kendana la ɛtɛkɛta aso wa mbɔtwɛlɔ?
4 Ɛtɛkɛta wa mbɔtwɛlɔ: Lɔngɔsɔla ɛtɛkɛta ayɛ wa mbɔtwɛlɔ dimɛna. Mbala efula ndeka dimɛna nkamba l’ɛtɛkɛta wa tomondo ndo wa wɔdu. Yoho yataso ɛtɛkɛta aso wa mbɔtwɛlɔ ekɔ nto ohomba. Onga la wangasanu. Mɔnɛmɔnɛ onto la lɔngɛnyi tshɛ dia mɛnya dia wɛ ndjashaka le nde. Naka sho ndjela alako asɔ, kete vɔ wayotokimanyiya dia nɔngɔsɔla mbɔtwɛlɔ yayolomialomia nsaki y’anto wa l’ɛtshi kaso ka nkɛtɛ dia vɔ ndja ndjoleshama lo “mɛsa wa Jehowa.”—1 Kɔr. 10:21.