Awui wakahomana l’anto amɔ
◼ Australie: John, pami kɛmɔtshi kakɔtɔ kalasa efula, akatshɔka l’ɔtɛmwɛlɔ etena kakinde dikɛnda, koko nde akayonga “l’olui w’anto wahetawɔ ɔnɛ Nzambi ekɔ.” Ombatshi mboka ɔmɔtshi akawosha biukubuku La vie a-t-elle été créée ? ndo oma laasɔ lo wembwelo wakayelana, nde akayowosha biukubuku Origine de la vie. Ombatshi mboka ɔsɔ akatetemala nomialomia nsaki kande lo mboshaka periodikɛ yeke katomba ndo ekanda ekina wele l’asawo wendana l’etongelo kana alaka wa lo Bible. Etena kakandɛnyi dia John ambotatɛ mbetawɔ, nde akawosha dibuku La Bible : Parole de Dieu ou des hommes ? L’ɔkɔngɔ wa John mbadia dibuku diakɔ, nde akayonga oko wanɛ wata ɔnɛ “ndooko lakoka mbeya kana Nzambi ekɔ kana bu.” Oma laasɔ, ombatshi mboka akɔ akatondja dibuku Bible etshatɔ, ko akɛnya John odingɔ 8 lo lɛkɛ 20 ndo odingɔ 13-16 lo lɛkɛ 23-24. Avɛsa woshilami lo awui akɔ wakambiya John polo ndo lo nde mbuta ɔnɛ: “Ondo dimi pombaka nyomoyasha lo Bible nto.”
◼ Mexique: Pami kɛmɔtshi akatɛ opandjudi ɔmɔtshi dia nde hetawɔ dia Bible kakafundama l’ɛlɔmbwɛlɔ ka Nzambi. Opandjudi akɔ akatatɛ mbɛnya tolembetelo tashikikɛ dia Bible kakafundama l’ɛlɔmbwɛlɔ ka Nzambi. L’ɔkɔngɔ w’ɛkɛtshanyelo ɛmɔtshi, pami kakɔ akanandema l’ɔtɛ w’awui wakinde lo mbeka oma lo Bible. Nde akanandema djekoleko etena kakandeke awui wendana la atɔndɔ waki Nzambi. Nde akatɛ opandjudi akɔ ate: “Lam’akayambadiyɛka Bible ntondo, lakɔsaka alako w’oma lɔkɔ oko alako w’oma lo abuku akina tshɛ ndo vɔ kominandaka otema ami. Koko kakianɛ, etena kadishaso awui w’oma lɔkɔ djekoleko alako wendana la lɔkɛwɔ, otema ami wambonandema.”
◼ États-Unis: Etena kakawatasambishaka lo dihole dimɔtshi diatanema anto efula, wadi la omi amɔtshi wakahomana la womoto ɔmɔtshi lakaye oma la Taïwan laketawɔka ɔnɛ Nzambi ekɔ koko akɔsaka Bible oko dibuku di’ase wedja wa lo Edjelo ka wonya. Nde akaye lo dihole diakitsha atshukanyi asɔ ekanda nɛ dia nde akayaokaka oko okalema kaanga mbakinde la lɔsɛnɔ la dimɛna. Nde aki l’elongamelo dia Bible ayowokimanyiya dia monga la lɔsɛnɔ lele l’oyango. Wadi la omi asɔ wakatatɛ mbeka la nde Bible l’ekimanyielo ka dibuku Bible etshatɔ kaamɛ la biukubuku La paix et le bonheur durables : comment les trouver. Lo dihole dia vɔ mbeka tshapita 2, vɔ wakakɛtshanya la nde awui wa lo etenyi ka biukubuku kata ɔnɛ: “Un guide bénéfique pour tous les humains.” L’ɔkɔngɔ wa nsɛdingola edingɔ esamalo w’etatelo wa lo etenyi kɛsɔ, womoto akɔ akate la diambo tshɛ dia Bible ekɔ dibuku dia laande lo diɛdika l’ekanda ekina w’awui w’ɔtɛmwɛlɔ. L’ɔkɔngɔ wa nsɛdingola alaka wa lo Bible ndo woho wakawakotshama, nde akate ate: “Hafɔnya di’ekɔ dibuku dikina diele l’akambo wa mɛtɛ wa nganɛ oko Bible!”
◼ Japon: Ompokami ɔmɔtshi akatɛ opandjudi ɔmɔtshi dia nde bu la mbetawɔ le Nzambi. Koko kaanga mbakandawotɛ ngasɔ, opandjudi akɔ akatetemala ntshɔ towembola lo mbɔtɔlɛ Reveillez-vous ! wele l’asawo wata ɔnɛ: “Hasard ou conception” Yema yema, pami kakɔ akayotshikitanya kanyi ndo akatatɛ mbetawɔ ɔnɛ ondo Otungi ɔmɔtshi ekɔ. Nshi nyɛ nde ambetawɔ dia Nzambi ekɔ ndo opandjudi akɔ ekɔ lo mbeka la nde Bible l’ekimanyielo ka biukubuku Lokumu l’ɔlɔlɔ l’oma le Nzambi!
◼ Canada: Kadiyɛso kɛmɔtshi akasha womoto ɔmɔtshi lakayatombaka oma lakande atatshu lo mutuka ande, periodikɛ yeke katomba. Etena kakayokalola kadiyɛso dia towembola, womoto akɔ akawotɛ l’eshikikelo tshɛ dia nde hayasha l’awui akɔ ndo ɔnɛ nde hetawɔ dia Nzambi ekɔ. Kadiyɛso kakɔ kopekɔ ndo nde akayɔtɔlɛ biukubuku Une vie pleinement satisfaisante : comment ? Etena kakayootana kadiyɛso lakande, kadiyɛso akawotɛ ate kaanga mbele nde akeyaka dia womoto akɔ hetawɔ ɔnɛ Nzambi ekɔ, nde akakanaka yimba lo dikambo diande nɛ dia kadiyɛso akeyaka dia nde aki ombutshi wodia anande ndamɛ. Kadiyɛso akɛnya womoto akɔ awui wele l’odingɔ 6 lo lɛkɛ 4 la biukubuku yakɔ yɛnya lɛnɛ akokaso ntana alako w’eshika. Oma laasɔ, kadiyɛso akookeketsha dia mbadia alako wele lo wekelo 2 wendana la woho wa mbodia ana. Womoto akɔ akangɛnangɛna efula ndo akɔshi biukubuku yakɔ.