Totshikalake tsho ki etena katayasambisha l’opandjudi okina

1. Ngande wakokayɛ mbokoya ɔpɔstɔlɔ Pɔɔlɔ etena katayasambisha l’opandjudi okina?

¹ Ɔpɔstɔlɔ Pɔɔlɔ akɔsaka etena kakandasambishaka kaamɛ l’asekande ambetawudi oko diaaso dia ‘keketshana.’ (Rɔmɔ 1:12) Etena katayasambisha kaamɛ l’opandjudi ɔmɔtshi, onde wɛ mbɔsaka diaaso sɔ oko etena ka wɛ keketshana la nde ndo mbokimanyiya? Lo dihole dia wɛ ntshikala tsho ki, shi wɛ koka tawɔkɔndɔlɛka kɛnɛ kakakokimanyiya dia monga opandjudi wa manamana?

2. Akokaso nsala dia nkimanyiya opandjudi watasambisha la so dia nde monga l’eshikikelo, ndo lande na kele dui sɔ ohomba?

² Kimanyiyande dia monga l’eshikikelo: Apandjudi amɔtshi bu l’eshikikelo lo kɛnɛ katawɔ ndo dui sɔ mɛnamaka oma lo ɛnamelo k’elungi kana wondjo awɔ wa dui. Sho koka mbakeketsha dia monga l’eshikikelo lo mbawandola l’otema ɔtɔi. Naa toho tokina takokaso mbakimanyiya dia monga l’eshikikelo? Omendji weteta ɔmɔtshi akatɛ opandjudi ɔmɔtshi wakatasambishaka la nde woho wakinde la wɔma ntondo ndo woho wakandalɔmbaka mbala efula dia ntondoya dui sɔ. Ɔnangɛso okina akate dia kɛnɛ kakokimanyiya dia monga l’eshikikelo ele: “Ntatɛ mɔnamɔna. Lo tena dimɔtshi, dimi lakasalaka dɔmbɛlɔ dia monga l’ɛtɛkɛta wokɛma hwe.” Onde dui dimɔtshi diakakokimanyiya dia wɛ ndeka monga l’eshikikelo l’esambishelo? Tɛ onto latasambisha la yɛ dui diakɔ.

3. Kakɔna kakokaso mbutɛ opandjudi watasambisha la so kayowokimanyiya dia nde monga manamana l’esambishelo?

³ Ɛnyande toho ta nsambisha: Onde wɛ ekɔ la tɔtɛkɛta kana dimbola dimɔtshi dia wɔdu, ɛnyɛlɔ dui dimɔtshi diendana l’ɛtshi kanyu ka nkɛtɛ diakokayɛ ntatshiya sawo lo yoho ya dimɛna? Onde wɛ ekɔ la dui dimɔtshi diakakokomɛ diatokambaka la yɛ oko mbɔtwɛlɔ kele l’etombelo w’amɛna? Tɛ opandjudi watasambisha la yɛ dui diakɔ. (Tuk. 27:17) Etena katanyatshu dia tosala wendelo w’oyoyo, wɛ koka tawɔkɔndɔlɛka awui wakayakonge ndo woho wayonyotaakɛtshanya. L’ɔkɔngɔ wa nyu mbeka l’onto Bible, wɛ koka nembetshiya opandjudi watasambisha la yɛ lande na kakayasɔnyi dui, divɛsa kana yoho mɔtshi ya mbetsha yɔtɔnɛ l’ehomba w’ombeki.

4. Lande na kahombaso ndjasha dia nkimanyiya asekaso apandjudi?

⁴ Esambisha wa lo ntambe ka ntondo kondjashaka tsho dia nkimanyiya wanɛ waki bu ambetawudi. Koko, vɔ wakɛnaka nto ohomba wa kimanyiyana ndo keketshana lam’asawɔ. (Ets. 11:23; 15:32) Ɔpɔstɔlɔ Pɔɔlɔ akalowanya ɔlɔngɔlɔngɔ Timɔte ndo akookeketsha dia nde mbutɛ anto akina awui wakandeke. (2 Tim. 2:2) Naka sho salɛ anangɛso w’Akristo kɛnɛ kele ɔlɔlɔ etena keso l’esambishelo, kete tayowafudiɛ ɔngɛnɔngɛnɔ ndo vɔ wayonga tomanamana, nɛ dia dui sɔ ngɛnyangɛnyaka ndo Shɛso lele l’olongo.—Hɛb. 13:15, 16.