Akatshi wa leeta la laande
1. Etena kakɔna kayotatɛ okahanyelo w’akatshi wa leeta l’oya lo nsanganya ya weke ya l’ɔnɔnyi 2014?
1 Tɔshi dia wɛ ekɔ lo nɔngɔsɔlɛ ase nkumbo ndo angɛnyi ayɛ dambo dia laande diakɔlɔmba dia nkamba olimu ndo nshisha falanga efula, ondo wɛ ayowaelɛ la waasaso tshɛ dia vɔ ndjɔlɛ. Woho akɔ waamɛ mbele, elimu efula wekɔ lo salema dia nɔngɔsɔla dambo dia lo nyuma diayosalema lo Losanganya la distrikɛ ndo la wedja efula l’ɔnɔnyi 2014. Mingu shato la ntondo ka losanganya laso ntatɛ, tayonga la diɛsɛ dia laande dia mbelɛ anto akina oya lo losanganya lɔsɔ. Kakɔna kayotokimanyiya dia nkahanya akatshi wa leeta la waasaso tshɛ?
2. Kakɔna kayototshutshuya dia ndjasha tshɛ lo tshɛ l’okahanyelo ɔsɔ?
2 Tayotshutshuyama dia ndjasha tshɛ l’okahanyelo ɔsɔ naka sho kana yimba la lowando tshɛ lo wahɔ wakondjaso oma lo dambo dia lo nyuma diatosalɛ Jehowa lo nsanganya yaso yaweke. (Is. 65:13, 14) Tatohɛke nto dia okahanyelo w’akatshi wasalema ɔnɔnyi tshɛ mongaka l’etombelo w’amɛna. Anto amɔtshi wayotelɛ wayoya dia ndjɔtɔ lo losanganya la woke kaamɛ la so. Oyadi lofulo lakɔna l’anto layoya lo losanganya lɔsɔ, welo wa l’otema ɔtɔi wayotodja lo nshi y’okahanyelo ɔsɔ ayotombola Jehowa ndo wayɛnya lokaho lande.—Osam. 145:3, 7; Ɛny. 22:17.
3. Ngande wayokahanyema akatshi wa leeta?
3 Elui wa dikumanyi tshɛ pombaka nshikikɛ woho wakoka ase etshumanelo nkahanya akatshi wa leeta l’ahole tshɛ, mbidja ndo anto wahawotana lawakawɔ kana woho wa mbakahanya lo esambishelo ka lo nsɛkɛ l’ɛtshi kawɔ ka nkɛtɛ. Etena kakahanyaso akatshi wa leeta lo wikɛndɛ, sho koka mbisha anto periodikɛ naka kokaka. Naka Lushi la samalo la ntondo la ngɔndɔ lamboyohomana la etena kasalema okahanyelo ɔsɔ, tayoleka ndjasha l’okahanyelo w’akatshi wa leeta lo dihole dia nyanga dia ntatɛ mbeka l’anto Bible. L’ɔkɔngɔ wa sho nshidiya okahanyelo ɔsɔ, ande ɔngɛnɔngɛnɔ wayonga la so dia mbeya ɔnɛ takasha lonya l’osalosalo tshɛ l’okahanyelo ɔsɔ ndo takelɛ anto efula oya lo dambo dia lo nyuma diakatosalɛ Jehowa lee!
[Kiombo ya lo lɛkɛ 3]
Kakɔna kayoyota?
L’ɔkɔngɔ wa mbisha onto mɔyɔ, wɛ koka mbuta ɔnɛ: “Tekɔ lo takahanya akatshi wa leeta wakahanyema l’andja w’otondo dia mbelɛ anto oya lo dui dimɔtshi di’ohomba efula. Datɛ, wonya ndo dihole diayosalema losanganya mɛnyama lo dikatshi nɛ.”