“Nyonge la lɔkɛwɔ l’ɔlɔlɔ l’atei w’ase wedja”
1. Lande na kele ekɔ ohomba monga la lɔkɛwɔ l’ɔlɔlɔ etena kayotonga lo nsanganya ya weke?
1 Sho kotolaka yambalo y’anto ɔnɔnyi tshɛ wasalema losanganya laso la woke, diakɔ diele ekɔ ohomba dia sho mɛnya oma lo dionga diaso dia tekɔ enyimpala wa Nzambi katɛmɔlaso. (Lew. 20:26) Loshilambo, ɔlɔtɔ ndo ɔlɔngɔswɛlɔ aso wa divo pombaka mɛnya hwe dia tekɔ ambeki wa mɛtɛ wa Kristo. Etena kayotɔtɔ lo Losanganya la distrikɛ kana la wedja efula layaye, ngande wakokaso monga la ‘lɔkɛwɔ l’ɔlɔlɔ l’atei w’ase wedja’ ndo ntombola Shɛso lele l’olongo?—1 Pet. 2:12.
2. Waaso akɔna wayonga laso wa nkɛnɛmɔla lonto l’Okristo etena kayotonga lo losanganya la woke?
2 Tɔkɛnɛmɔlɛ lonto laso l’Okristo: Ngandji kokanaso lam’asaso ndo woho wasalɛso “wanɛ wele bu lo etshumanelo” akambo ntshikitana etale la anto wele la yimba ya l’andja ɔnɛ. (Kɔl. 3:10; 4:5; 2 Tim. 3:1-5) Sho pombaka monga la dionga di’ɔlɔlɔ ndo la solo dia lotusha otsha le anto wakamba l’ɔtɛlɛ ndo lo rɛstora oyadi etena katomba okakatanu ɔmɔtshi lam’asaso. Loshilambo layotokimanyiya nto dia nɛmiya kɛnɛ katotɛ ase olimu wa lo dihole diohangiso.
3. Waohwelo akɔna wambowosha ambutshi, ndo lande na?
3 Ambutshi pombaka namaka an’awɔ dimɛna etena kewɔ lo dihole dia losanganya, lo rɛstora ndo lo dihole diayowohanga. (Tuk. 29:15) Jɛra ya ɔtɛlɛ ɔmɔtshi akatɛ wadi l’omi amɔtshi ɔnɛ: “Sho nyolangaka efula. Nkumbo yanyu ndo ana anyu wekɔ la mbekelo y’amɛna ndo la loshilambo. Anto tshɛ wakamba lanɛ waki lo ntɛkɛta dimɛna lo dikambo dia nyu ndo sho kombolaka dia nyu ndjohangaka lanɛ wikɛndɛ tshɛ.”
4. Lo na ahombaso mbidja yimba etena keso lo dihole diayosalema losanganya la woke?
4 Ɔlɔtɔ wa dimɛna: Etena kayotonga lo losanganya la woke, sho pombaka ndɔta dimɛna ndo lo yoho yele la wɛdimo, koko aha ndɔta lo yoho yalɔta ase andja ɔnɛ ya kawotake. (1 Tim. 2:9) Oyadi etena keso lo dihole diodjashiso, kambototomba yema la ntondo kana l’ɔkɔngɔ wa losanganya, sho pombaka mbewɔ dia ndɔta lo yoho y’epakapaka kana ya kawotake. Naka sho nsala ngasɔ, kete hatotengenga dia ndɔta tshapa yaso ya losanganya ndo hatotoka nsɔnyi dia nsambisha etena katanaso diaaso. Ɛnamelo ndo dionga diaso dia dimɛna etena kayotonga lo nsanganya ya weke yayaye ya lo 2014, hokotola tsho yambalo y’anto wele l’etema ɛlɔlɔ oya lo losango la lo Bible lashimbɛ nsɛnɔ, koko dui sɔ diayɔngɛnyangɛnya ndo Jehowa.—Zef. 3:17.
[Kiombo ya lo lɛkɛ 4]
Waohwelo wendana la losanganya la woke la lo 2014
◼ Ekongelo ka wenya: Nshi yakɔ shato, losanganya layomɛka lo eshidi 8:20 wa pindju. Koko lo kɛnɛ kendana la nsanganya yayosalema lo esomba wa weke ɛnɛ: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ndo la Tshikapa, ekongelo kayotatɛka lushi tshɛ l’eshidi 9:20 wa pindju. Nkuke yayodihɔmaka lo eshidi 7:00 kana l’eshidi 8:00 wa pindju lo ndjela dihole la dihole. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo ntatɛ lo yoho yasha Jehowa lotombo. Ekongelo kayokomɛka l’eshidi 3:55 wa l’ɔkɔngɔ a midi wa Lushi la tanu la la samalo ndo Lushi la lomingu ekongelo kayokomɛ l’eshidi 2:40 wa l’ɔkɔngɔ wa midi. L’esomba wa weke ɛsɔ, ekongelo kayokomɛka wonya ɔtɔi l’ɔkɔngɔ.
◼ Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu laamɛ kana ambeki ayɛ wa Bible mbahombayɛ namɛ ahole wa mbidjasɛ.
◼ Olelo wa la midi: Sho nɔmbaka anto tshɛ dia ndjaaka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. Mbewɔ dia nsomba diangɔ dia ndɛ le anto asɔ ayokimanyiya dia pudipudi monga lo dihole dia losanganya. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Jni. 2:13-17).
◼ Pudipudi: Akɛnama dia mbala efula, wanɛ watosombaka mbo ya ndɛ mbikashaka mposo kana akatshi wa diangɔ sɔ lo sɛkɛ. Laasɔ sɛkɛ di’otondo ndjololanɛka tɔɔ la akatshi, mposo, kana ɛlɔndɔ wa ponde la mindo nkina. Naka onto ambolanga nsomba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa laande dia ntshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ nsala kɛnɛ kahombande nsala, kete sɛkɛ dia losanganya diayotshikala pudipudi. Sho nangaka nkɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Weshasha: Sho koka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo. Lo shɛkɛ tshɛ, nyɛnya dia “ Association ‘ Les Témoins de Jéhovah ’ ” mbahomba nongola falanga.
◼ Aksida ndo awui wa wanyandja: Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo Departɛma diendana la esakelo ka wanyandja, ko vɔ wayosha ekimanyielo kahombama.
◼ Ekanga: Naka wɛ ekɔ lo mbɔsa ekanga, kete tohɛke dia ndja la wɔ nɛ dia ekanga wa mbisha anto bu lo dihole dia losanganya. Tɛdi yakawɔ wanɛ wele la diabɛtɛ pombaka mombama dimɛna ndo aha ndjidja lo diangɔ diakashawɔ mindo diokitshami lo dihole dia losanganya.
◼ Wondelo wa foto: Lam’alangayɛ, naka wate munde foto wonya wa losanganya, kete tokambake la angadimu. Lam’alanganyu, tanyelɛke anto wanda foto lo dihole dia losanganya. Naka nyambowaɛna lo dihole dia losanganya, kete tanyaalɔmbake dia vɔ nyonda foto.—Jni. 2:13-17.
◼ Fɔrmilɛrɛ Veuillez suivre l’intérêt (S-43): Lo esambishelo ka lo tshakitudi kayonyosala lo nshi ya losanganya la woke lɔnɛ, kanyokambe la fɔrmilɛrɛ kɛnɛ dia mbewoya nsaki tshɛ kɛnyisha anto. Opandjudi tshɛ kaatshu la fɔrmilɛrɛ (S-43) ɔtɔi kana hiende. Oma l’ɔkɔngɔ wa nde ndjilodja, ko nde mbisha wanɛ wakamba l’awui w’ekanda kana sekeletɛlɛ ka l’etshumanelo kande.
◼ Rɛstora: Nyɔlɛmiya lokombo la Jehowa oma lo lɔkɛwɔ lanyu l’ɔlɔlɔ. Katɔlɔtɛ lo yoho yakoka monga l’etombelo w’amɛna l’olimu aso w’Okristo. Kanyotshike yema ya dikuta l’ɔtɛ wonyokimanyishawɔ naka mbekelo kɛsɔ kekɔ l’ɛtshi kanyu ka nkɛtɛ.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la ntshimbatshimba. 3) La ntondo ka wɛ nkatɛ, tambodi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami. 4) Aha wɛ nkamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga la diɔ ele wɛdimo ndo kanɛ anto akina. 5) Kotshikake mpango kayɛ wonya tshɛ kɔmba ndo pudipudi. Dikambo sɔ mendanaka ndo la Mbalasa ka Diolelo, kakokawɔ mpangiya anangɛso la akadiyɛso w’oma lo tshumanelo dia tale. 6) Kɛnɛmɔla olowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka mpanga la yɛ dihole ɔtɔi.—Ngal. 5:22, 23.
◼ Olimu wa wanɛ wayakimɔ la lolango: Onto tshɛ lalanga nsala dikambo sɔ kokaka nkimɔ lokombo lande lo Departɛma di’anto wayakimɔ la lolango. Ana wele l’ɛse k’ɛnɔnyi 16 kokaka mbisha ekimanyielo ka dimɛna efula lo nkamba l’ɛlɔmbwɛlɔ k’ombutshi awɔ ɔmɔtshi, olami ɔmɔtshi wa dihole sɔ kana l’ɛlɔmbwɛlɔ k’opalanga okina wambetawɔma oma le ombutshi kana olami ɔsɔ.