Vidɛo y’oyoyo yɛnya woho wa ntatɛ mbeka l’onto Bible

Vidɛo ya mondo yele l’ɔtɛ a dui ɔnɛ: “Lande na mbeka Bible”? yekɔ lo mendama oma le anto efula lo jw.org. Vidɛo shɔ yakalɔngɔswama dia ntshutshuya anto wɛnya nsaki dia vɔ mbetawɔ mbeka la so Bible ofele. Yɔ koka ntanema lam’ofundjiwɔ ɔnɛ: “Lɔmba di’onto ndjoketshaka Bible ofele” l’ɛse ka dikatshi dia ntondo dia l’Ɛtɛrnɛtɛ kana skanɛ kodɛ kelɛwɔ QR (okadimwelo w’esadi) katanema la nkoma ya dikatshi dia traktɛ tshɛ y’eyoyo. Toho tɔmɔtshi takokaso nkamba la vidɛo shɔ dimɛna tɔ tɔnɛ.

• Etena kasalayɛ wendelo w’oyoyo, mbola ompokami ayɛ ɔnɛ: “Onde dimi koka kɛnya vidɛo ya mondo yalembetshiya woho wakokayɛ nkondja ekadimwelo w’oma lo Bible lo ambola ayɛ?” Naka nde ambetawɔ, ɛnyande vidɛo yakɔ lo ɔrdinatɛrɛ ayɛ wa l’anya kana lo ɔrdinatɛrɛ ande.

• Naka tekɔ lo tasha anto traktɛ y’eyoyo etena keso l’esambishelo ka lo tshakitudi kana ka lo sɛkɛ, tokotole yaambalo y’ompokami lo kodɛ ka okadimwelo w’esadi ndo tookeketsha dia nde kiskanɛ l’ɔrdinatɛrɛ ande wa l’anya. Oko wele l’ɛtɛkɛta efula kodɛ kɛsɔ konyaka onto mbala kakɔ ɔtɔi lo vidɛo shɔ yele lo sitɛ kaso k’Ɛtɛrnɛtɛ, wɛ koka mɛnya onto vidɛo shɔ l’ɔrdinatɛrɛ ayɛ wa l’anya.

• Tɛ asekayɛ wa l’olimu, wa la kalasa, ewotɔ ayɛ ndo anto akina weyayɛ dikambo dia vidɛo shɔ ndo lɔmbawɔ dia mbaɛnyayɔ. Kana tomɛwɔ mesajɛ lo yoho yakokawɔ klikɛ ko menda vidɛo yakɔ ndo tɛwɔ woho wakokawɔ toyienda vɔamɛ.

Naka sho nkamba la ehomɔ k’oyoyo kɛnɛ, kete tayonga l’akoka wa ntatɛ mbeka Bible l’anto efula ndo tayokimanyiya anto wele “suke dia mbetawɔ akambo wa mɛtɛ wakonya lo lɔsɛnɔ la pondjo” lo nyuma.—Etsha 13:48.