Ngɔndɔ k’enanɛi konge ngɔndɔ k’olimu kayotshikala l’ɛkɔndɔ!

Traktɛ k’oyoyo kayokahanyema lo nkɛtɛ k’otondo

1. Lam’ele tekɔ lo tasukana otsha lo lushi layokotsha Diolelo dia Nzambi ɛnɔnyi 100, naa esambishelo ka laande kayosalema lo nkɛtɛ k’otondo?

¹ Diolelo dia Nzambi diaya suke la nkotsha ɔnɔnyi wa 100 wa eotwelo. Ande woho wayotombwama Jehowa naka sho ndjasha l’esambishelo ka laande lee! Lo Ngɔndɔ k’enanɛi, tayokahanya lo nkɛtɛ k’otondo traktɛ k’oyoyo kele la ɔtɛ a dui ɔnɛ: “Lende akokaso ntana ekadimwelo lo ambola w’ohomba wa lo lɔsɛnɔ?” Traktɛ kɛnɛ keketshaka ambadi dia nyanga ekadimwelo lo ambola wele lɔkɔ lo Bible ndo tɔ nembetshiyaka woho wakoka jw.org mbakimanyiya.

2. Ngande wakokaso mbisha lonya lo “waelu w’ongenongeno wa [ntombola Jehowa]” wayodama lo Ngɔndɔ k’enanɛi?

² Waelo wa lotombo: Dia nkimanyiya apandjudi dia mpamia olimu awɔ w’esambishelo, yɛdikɔ mɔtshi ya laande yakɔsama lo dikambo di’onto tshɛ lalanga nkamba oko ombatshi mboka wa tshanda lo Ngɔndɔ k’enanɛi. Lo ngɔndɔ kɛsɔ, apandjudi wambobatizama wayokondja diɛsɛ dia nkamba oko ambatshi mboka wa tshanda wa wenya 30. Lam’ele Ngɔndɔ k’enanɛi kayonga la nshi ya tanu, ya samalo ndo ya mingu tshanu, apandjudi efula wakamba elimu wa lo demba kana wɔtɔ kalasa wayonga la diaaso dia nkamba oko ambatshi mboka wa tshanda. Naka wɛ ekɔ la ombeki wa Bible watahame kana ɔna lalanga monga opandjudi, tɛ ɔnɔmbɔdi w’olui wa dikumanyi dui sɔ aha la ntshimbatshimba. Ande woho wayokeketshama anto asɔ lo monga kaamɛ la so oko apandjudi lo ngɔndɔ k’ohomba kɛsɔ lee! Kaanga mbele ambatshi mboka wa pondjo efula mbɔsaka vakashi lo Ngɔndɔ k’enanɛi l’ɔkɔngɔ wa vɔ nkotsha wenya walɔmbamawɔ lo ɔnɔnyi w’otondo, ayonga dimɛna dia vɔ ntshikitanya ekongelo kawɔ yema l’oyango wa ndjasha tshɛ lo tshɛ lo esambishelo ka laande kɛsɔ. Ɔnɛ mbele etena k’ase nkumbo nkɛtshanya dia mbeya woho wayowosha lonya lo “waelu w’ongenongeno wa [ntombola Jehowa]” wayodama lo Ngɔndɔ k’enanɛi.—Ez. 3:11; Tuk. 15:22.

3. Kakɔna kalongamɛso lo kɛnɛ kendana l’esambishelo ka laande kɛsɔ?

³ Kaanga mbele takasale esambishelo ka laande ka ngasɔ l’ɛnɔnyi wakete, sho nongamɛka dia okahanyelo ɔnɛ wayotshikala l’ɛkɔndɔ. Onde hatokoke nsala la wolo dia nkonya lofulo l’oyoyo la wenya, l’apandjudi ndo la ambatshi mboka wa tshanda lo Ngɔndɔ k’enanɛi? Lam’ele taya l’ekomelo ka ɔnɔnyi w’olimu wa 2014, Jehowa atshɔkɔlɛ welo wayodja ekambi ande wa lo nkɛtɛ k’otondo dia mbetɛ Ngɔndɔ k’enanɛi ngɔndɔ kayosalema esambishelo kahatasalemaka!—Mat. 24:14.