Kamba la waaso tshɛ wele la yɛ dia dianganya losango la Diolelo

1. Wetshelo akɔna wakokaso nkondja oma l’ɛnyɛlɔ ka Davidɛ?

¹ Nkumekanga Davidɛ kombetawɔ di’akambo waki la nde mboshimba dia nsala kɛnɛ kakinde l’akoka. Ɛnyɛlɔ, Davidɛ akalange mbikɛ Jehowa tɛmpɛlɔ. Etana kakandashimbama dia nsala dui sɔ, Davidɛ akatshikitanya eyango waki la nde ndo akakimanyiya Sɔlɔmɔna dia ntshumanya diangɔ diaki ohomba dia mbika tɛmpɛlɔ. (1 Khum. 8:17-19; 1 Ek. 29:3-9) Lo dihole dia nde ndjakiyanya l’ɔtɛ wa kɛnɛ kakinde komonga l’akoka wa nsala, Davidɛ akayasha lo kɛnɛ kakandakoke nsala. Ngande wakokaso mbokoya ɛnyɛlɔ ka Davidɛ etena kayangaso waaso wa dianganya losango la Diolelo?

2. Ɔsɛdingwelo akɔna w’onto daamɛ wakokaso nsala?

² Nsala kɛnɛ keyɛ l’akoka wa nsala: Anto efula waketɛ nsɛnɔ yawɔ ɔsɛlɛngɛ l’oyango wa monga ambatshi mboka wa tshanda kana wa pondjo. (Mat. 6:22) Shi wɛ koka mbaokoya? Naka wɛ nsɛdingola akambo wele la yɛ lo dɔmbɛlɔ, kete wɛ koka mɛna dia “soko dia woke diasha diaaso dia nkamba olimu” diekɔ hwe dikambo diayɛ. Naka ngasɔ mbediɔ, kete nkamba la diaaso sɔ.—1 Kɔr. 16:8, 9.

3. Naa waaso wasambisha wakokaso nkondja wahɔ oma lɔkɔ oyadi akambo wele laso hawotosha diaaso dia monga ombatshi mboka?

³ Ko, akokayɛ nsala naka akambo wele la yɛ hawokosha diaaso dia monga ombatshi mboka? Tohandjake waaso akina wele la yɛ. Ɛnyɛlɔ, naka olimu wa l’emunyi wakambayɛ kokonyaka dia monga kaamɛ l’anto wele bu ambetawodi, shi wɛ koka nkamba la diaaso dia dimɛna sɔ dia mbasambisha? Kana naka wɛ ekɔ lo diɛnɛ l’ekakatanu wendana la yonge ya demba, shi wɛ koka nkandja wahɔ oma lo waaso asɔ dia nsambisha enganga wakosakɛ? Ohɔ dia, ekɔ yɛdikɔ mɔtshi yakɔsama dikambo dia wanɛ wele bu l’akoka kaanga yema dia nkamba olimu awɔ, dia kimɔka alapɔlɔ w’esambishelo wele la minitɛ 15. Etena kalodiayɛ dikatshi di’alapɔlɔ w’olimu, yashikikɛ dia wɛ ambofunda wenya wakayetsha l’esambishelo ka lo tshakitudi ndo tobukubuku tshɛ takayakahe, mbidja ndo traktɛ ndo akatshi wa leeta l’oya lo Eohwelo ndo w’oya lo sanganya ya weke. Wɛ koka mambiyama woho wayodɛ lofulo la wenya esadi esadi diɛsɛ la waaso wɛnama oko totshitshɛ asɔ.

4. Kakɔna kamboyoyashikikɛ dia nsala?

⁴ Oyadi akambo akɔna wele la so, nyɛsɔ tokambe la waaso tshɛ wele la so dia dianganya lokumu l’ɔlɔlɔ. Paka lo nsala ngasɔ mbayotonga l’ɔngɛnɔngɛnɔ waya oma lo mbeya ɔnɛ tekɔ lo nsala kɛnɛ tshɛ kakokaso nsala dikambo dia Diolelo.—Makɔ 14:8; Luka 21:2-4.