Tolowanya akoka aso wa nsambisha—Lo sambishaka lo telefɔnɛ ka lo soko dia lokombo

Ohomba wa dikoka sɔ: Koka monga oko wetshelo a wenya dia nsambisha lo telefɔnɛ. Ngande wakokaso mbewɔ diaha tshikɛ okakatanu ɔsɔ diaaso dia nkitshakitsha ohetoheto aso lo elimu w’ɛlɔlɔ? Tohɔ dia nsambisha lo telefɔnɛ mbeyaka monga yoho yaamɛ ya nsambisha weho w’anto amɔtshi lokumu l’ɔlɔlɔ. (Rɔmɔ 10:14) Kɛnɛ kasalema mɛnyaka dia yoho y’esambishelo shɔ koka monga l’etombelo w’amɛna. (Enda Annuaire 2011 lk. 65-66, ndo Annuaire 2000 lk. 54, od. 3.) Nyɔsɛdingole alako wayela anɛ.

Woho wa nsala dui sɔ:

Lɔngɔsɔla mbɔtwɛlɔ ka lo tshena pe ndo fundatɔ lo dikatshi dia wɛ mbadiɛ ompokami ayɛ mbala kakɔ ɔtɔi lo telefɔnɛ. Dui sɔ diayokeketsha wɛkamu ayɛ. L’etatelo, lembetshiyande oyango woyeyɛ dia ndjowenda. Elɛnde lo lokombo lande naka lɔ mɛnyama. Komiya sawo dianyu lo mbootshikɛ (kana ntshika la soko diande) traktɛ kana periodikɛ kayowolembetshiya awui efula wendana la dui diosawodinyu.
Ɛna akambo la sso di’ɔlɔlɔ. Mɔnamɔnaka ndo salaka tɔjɛstɛ oko wɛ ekɔ lo ntɛkɛta la nde elundji lo elundji.
Onga l’osalosalo ndo sawola dimɛna. Honola ɛtɛkɛta dimɛna ndo diya dui. Ewɔ dia mumuyaka tshanana, kana ntɛkɛta esadi esadi.
Onga l’ekanelo k’ɔlɔlɔ. Lo nkombo mɔtshi ya weke, koka tanema telefɔnɛ efula ya lo soko dia lokombo. Ondo wɛ ayɔsɔna dia nsawola l’anto asato ato ndo funda nkombo ya wanɛ wosawodi la yɛ. Anto wele lo lokombo koka ndjoka wɔma naka tamboleka nsawola la wɔ edja lo telefɔnɛ.

Hemba nsala nganɛ lo ngɔndɔ kɛnɛ:

Etena kasalanyu ɔtɛmwɛlɔ wa lo nkumbo nyosale wɛnyɛlɔ wele anto ahende wasawola mangana.