Woho wa nsambisha lo nkamba l’ɛngɔ kɛmɔtshi kanɛwɔ ekanda

Esambishelo ka la diangɔ dikina dianɛwɔ ekanda ekɔ yoho yoleki dimɛna ya nkotola etema w’anto w’ɛlɔlɔ oya l’akambo wa mɛtɛ. (Jni. 6:44) Dikumanyi diambokeketshamaka dia nkongɛ yoho y’esambishelo ka lo sɛkɛ shɔ l’ɛtshi ka nkɛtɛ ka l’etshumanelo kaleka anto mbeteta. Lam’ele dihomɔ dikina sɔ hadiɔkɛndakɛnda, hatonga ohomba nɔmba lotshungɔ oma le lɛɛta. Waa na wakoka nsala esambishelo kɛsɔ? Apandjudi wele l’ekanelo k’ɔlɔlɔ, washa ɛnyɛlɔ ka dimɛna ndo weya nsawola l’anto dimɛna. Dui diakoka mbakimanyiya ele, mbeya kɛnɛ kakokawɔ nsala la kɛnɛ kahawakoke nsala.

Kɛnɛ kakokayɛ nsala:

Onga onto ladja anto lo demba, lalongɔna ndo la nkimanyiya ambetshetshi. Apandjudi amɔtshi ndjayolaka anto la wangasanu, mbɔlaka la wɔ ndo mbishanaka la wɔ mɔyɔ la lɔngɛnyi tshɛ. Naka onto ɔmɔtshi ambenda diangɔ dianɛso ekanda etena katandete, wɛ mbeyaka mbotɛ wate: “Onde wɛ nangaka mbɔsa yangɔ mɔtshi ya tadia?”
Tanganake etale k’efula la mɛsa w’ekanda. Lo ahole amɔtshi apandjudi kondjaka etombelo w’amɛna etena kahawangana etale la mɛsa wanewɔ ekanda. Koko apandjudi akina mɛnaka dia yoho nyɛ mbotshaka ambetshetshi wɔma dia vɔ memala, diakɔ diele vɔ memalaka yema tshalola ndo nkonga polo ndo ombetshetshi ɔmɔtshi ambemala la mɛsa wanewɔ ekanda. Naka onto ambosukana suke la mɛsa, kete hemba ntatɛ nsawola la nde lo mbombola ɛnyɛlɔ ɔnɛ: “Onde wɛ atayambolaka dimbola nɛ ndooko lushi?”
Kambaka la Bible mbala la mbala naka kokaka.
Lembetshiya woho wekaso l’anto Bible le onto tshɛ lɔsa okanda aso ɔmɔtshi wekaso l’anto Bible, ɛnyɛlɔ oko dibuku Bible etshatɔ. Lɔmbande dia mbɛnya vidɛo yele l’ɔtɛ a dui ɔnɛ: Lande na mbeka Bible?
Lɔmbande numɛlɔ kande ka telefɔnɛ ndo adrɛsɛ ande naka kokaka. Naka onto akɔ hadjasɛ l’etshi kanyu ka nkɛtɛ, kete lodja fɔrmilɛrɛ Veuillez suivre l’intérêt (S-43) ko wɛ mbisha sekeletɛrɛ aha la ntshimbatshimba.