Woho wa minanda etema w’anto wetshaso
1. Shɛngiya yakɔna yaki la wetshelo wa Yeso lo etema w’ampokami ande?
1 Yeso Kristo akanandaka etema w’ampokami ande. Lo diaaso dimɔtshi, etema waki ambeki ande ‘wakanandema’ l’ɔkɔngɔ wa nde mbalembetshiya Afundelo dimɛna. (Luka 24:32) Lam’ele okitanyiya w’otsha le Nzambi pombaka ndja oma k’ɛse otema, ngande wakokaso minanda etema wa wanɛ wetshaso dia vɔ nsala etshikitanu lo nsɛnɔ yawɔ?—Rɔmɔ 6:17.
2. Naa ohomba wele la ɔkɔmi ndo shɛnɔdi dia minanda otema w’onto?
2 Tonge la ɔkɔmi ndo la shɛnɔdi: Le anto efula, wɛ mbatɛ tsho kɛnɛ kele ɔlɔlɔ ndo kɛnɛ kele kɔlɔ, hatowakonya dia vɔ nsala etshikitanu. Ndo ntɛkɛta dikambo diendana la waetawɔ awɔ wa l’ɔtɛmwɛlɔ lo nkamba la avɛsa efula mbeyaka kaanga mbakonya dia vɔ ntshɔ dihole dikina. Dia minanda otema w’onto, sho pombaka ntondo nshihodia ɛkɔkɔ wetawɔnde ndo wasalande akambo lo ndjela kɛnɛ ketawɔnde. Ɔkɔmi, ambola w’eshika lo ndjela ekanelo kande ka yimba, ayowokimanyiya dia nde ntondja tokanyi tande t’oma lo otema. (Tuk. 20:5) Paka lo nsala ngasɔ, mbakokaso ndjɔsɔna awui w’oma lo Ɔtɛkɛta wa Nzambi wakoka minanda otema ande. Ɔnkɔnɛ, sho pombaka ndjasha le nde ndo monga la solo dia lotutsha. (Tuk. 25:15) Tohɔ dia anto pamaka lo nyuma lo toho totshikitanyi. Totshike nyuma k’ekila kaki Jehowa dihole dia tɔ monga la shɛngiya lo ekanelo kawɔ ndo etsha awɔ.—Makɔ 4:26-29.
3. Ngande wokaso nkimanyiya wanɛ wetshaso dia vɔ monga la waonga w’ɛlɔlɔ?
3 Towakimanyiya dia vɔ monga la waonga w’amɛna: Avɛsa wa lo Bible wɛnya ɔlɔlɔ ndo ngandji ka Jehowa, koka nkimanyiya wanɛ wetshaso dia monga la waonga w’amɛna. Sho koka nkamba la avɛsa wele oko, Osambu 139:1-4 kana Luka 12:6, 7 dia mɛnya woho wayasha Nzambi le ɔmɔmɔ la l’atei aso lo yɛdikɔ y’efula. Naka anto mpamia lowando l’oma k’ɛse otema lo ɔlɔlɔ waheyama mbɛdika waki Jehowa, kete ngandji kawɔ ndo omamemelo awɔ le Nzambi wayohama. (Rɔmɔ 5:6-8; 1 Jni. 4:19) Ndo nto, etena kekawɔ dia lɔkɛwɔ lawɔ minandaka Jehowa, vɔ koka tshutshuyama dia nsala akambo lo yoho yɔɔngɛnyangɛnya ndo yawosha nɛmɔ.—Osam. 78:40, 41; Tuk. 23:15.
4. Etena ketshaso anto lo olimu aso w’esambishelo ngande wakokaso mɛnya dia sho nɛmiyaka lotshungɔ lele la onto la mbɔsa yɛdikɔ?
4 Jehowa hatshutshuya ndooko onto dia nkitanyiya wadjango ande. Koko, nde nɔmbaka anto lo mbaɛnya lomba layowokondja lo ndjela alako ande. (Is. 48:17, 18) Sho mbokoyaka Jehowa etena ketshaso lo yoho yakimanyiya anto dia vɔamɛ mbɔsa tɛdikɔ tawɔ hita. Etena kashikikɛ anto vɔamɛ ohomba wa mbɔsa tɛdikɔ lo nsɛnɔ yawɔ, etombelo mongaka amɛna efula. (Rɔmɔ 12:2) Kɛsɔ nto ndekaka mbasukanya la Jehowa, ‘ɔsɛdingodi w’etema.’—Tuk. 17:3.