Tolowanya akoka aso wa nsambisha​—Lo nkimanyiya ambeki aso wa Bible dia vɔ mpama, ndjakimɔ ndo batizama

OHOMBA WA DIKOKA SƆ: Dia mbetawɔma le Jehowa, ambeki wa Bible pombaka nambola nsɛnɔ yawɔ le nde ndo batizama. (1Pe 3:21) Oma laasɔ, wanɛ wasɛna lo yoho yɔtɔnɛ la ndjakimɔ kawɔ kokamɛka lo nyuma. (Os 91:1, 2) Okritso ndjakimɔka le Jehowa, koko aha le onto, olimu kana okongamelo ɔmɔtshi. Diakɔ diele, ambeki wa Bible pombaka mfudia ngandji ndo lowando lawɔ le Nzambi.​—Rɔm 14:7, 8.

WOHO WA NSALA DUI SƆ:

• Etena kekanyu Bible, kɛtshanya lande kɛnɛ kɛnya awui akɔ lo dikambo dia Jehowa. Tɛtɛnde dia mbadiaka Bible lushi la lushi ndo ‘ntetemala nɔmba Jehowa.’​—1Tɛ 5:17; Jak 4:8

• Keketsha ombeki ayɛ dia nde ndjadjɛ eyango wa lo nyuma wa ndjakimɔ ndo Batizama. Ndo nto, kimanyiyande dia nde nkotsha eyango ekina wele oko mbishaka kɔmatɛrɛ lo nsanganya kana nsambisha asukanyi ande ndo asekande wa l’olimu. Ohɔ dia Jehowa hatshutshuya ndooko onto dia mbokambɛ. Onto ndamɛ mbɔsa yɛdikɔ ya ndjakimɔ.​—Euh 30:19, 20

• Keketsha ombeki ayɛ dia nsala etshikitanu wahombama dia nde ngɛnyangɛnya Jehowa ndo nkotsha kɛnɛ kalɔmbama dia mbatizama. (Tu 27:11) Lam’ele mbeyaka monga ko waonga ndo mbekelo mɔtshi yambokaka edio, ombeki wa Bible koka monga l’ohomba w’ekimanyielo ka mbala la mbala dia nde nkolola lonto l’edjedja ko ndɔta lonto l’oyoyo. (Ɛf 4:22-24) Kɔsɛdingolake kaamɛ la nde sawo diokotombaka mbala la mbala lo Tshoto y’Etangelo diele l’ɔtɛ a dui ɔnɛ: “Bible tshikitanyaka nsɛnɔ y’anto”

• Kɔndɔlɛkande ɔngɛnɔngɛnɔ wakondjayɛ lo kambɛ Jehowa.​—Is 48:17, 18